ខេត្តរតនគិរី ៖ ស្ត្រីម្នាក់បានសំរាលកូនលើចិញ្ចើមផ្លូវ ខណៈឈឺពោះជិះម៉ូតូទៅមន្ទីរពេទ្យមិនទាន់ ហេតុការណ៍នេះបានកើតឡើងកាលពីវេលាម៉ោង០៣ និង២០នាទីរសៀលថ្ងៃទី១៨ កក្កដា ២០១៦ ស្ថិតក្នុងភូមិភ្នំស្វាយ សង្កាត់បឹងកន្សែង ក្រុងបានលុង ។
ទាក់ទិនរឿងនេះ ត្រូវស្ត្រីដែលសំរាលកូនលើចិញ្ចើមផ្លូវឱ្យដឹងថា គាត់ឈ្មោះឈុំ សំអាត អាយុ៣៧ឆ្នាំ ជនជាតិខ្មែរ ជាអ្នកលក់សាច់គោអាំង នៅទល់មុខសាខាពន្ធដាខេត្តរតនគិរី មានប្តីឈ្មោះលី ចំរើន អាយុ៤០ឆ្នាំ ជាកម្មករសំណង់ មានទីលំនៅក្នុងភូមិ-ឃុំកើតហេតុខាងលើ ។
ស្ត្រីខាងលើរៀបរាប់ទៀតថា គាត់សំរាលកូននេះជាកូនទី៣ ហើយជាកូនប្រុស ដោយមុនពេលកើតហេតុ គាត់ឈឺពោះយ៉ាងខ្លាំង ហើយប្តីគាត់អត់បាននៅផ្ទះទេ គឺជាប់រវល់ទៅធ្វើកម្មករសំណង់ក្បែរកន្លែងកើតហេតុដែរ ។ ហើយបានពឹងប្អូនប្រុស ដឹកគាត់ទៅមន្ទីរពេទ្យ ស្រាប់តែឡើងជិះម៉ូតូបានតែ៣-៤ម៉ែត្រ គាត់បានឈើពោះយ៉ាងខ្លាំង ហើយក៏ប្រាប់ប្អូនប្រុសឱ្យឈប់ម៉ូតូ គាត់
ទម្លាក់ខ្លួនអង្គុយនៅចិញ្ចើមផ្លូវ ស្រាប់តែសំរាលកូនតែម្តង ធ្វើឱ្យមានការភ្ញាក់ផ្អើលដល់ប្រជាពលរដ្ឋនៅក្បែរកន្លែងកើតហេតុ នាំគ្នាមកជួយ និងបុរសជាប្តី បានរត់ចេញពីកន្លែងធ្វើការមកជួយប្រពន្ធទាន់ប្រពន្ធ កំពុងសំរាលកូនលើចិញ្ចើមផ្លូវ ដែលគ្មានឆ្មប និងមន្ត្រីពេទ្យនោះទេ ។
មានអាសន្នបែបនេះ ត្រូវប្រជាពលរដ្ឋបានទូរស័ព្ទហៅរថយន្តសាមុយរបស់មន្ទីរពេទ្យបង្អែកខេត្តរតនគិរី ដឹកស្ត្រីរងគ្រោះទៅសង្គ្រោះទាន់ពេលវេលា ។
លោកវេជ្ជបណ្ឌិត ហ៊ីង ផានសគន្ធា ប្រធានមន្ទីរពេទ្យបង្អែកខេត្តប្រាប់ឱ្យដឹងថា ស្ត្រីខាងលើបានផុតពីគ្រោះថ្នាក់ហើយ ដោយក្រុមគ្រូពេទ្យយកចិត្តទុកដាក់មើលថែរក្សាដោយមិនគិតកម្រៃសេវានោះទេ ។ លោកបន្តថា ពេលនេះស្ត្រីរូបនោះកំពុងដេកសម្រាកក្នុងមន្ទីរពេទ្យ ក្រោមការមើលថែយ៉ាងយកចិត្តទុកដាក់បំផុត ។ ស្ត្រីខាងលើមានសុខភាពល្អទាំងម្តាយ និងកូន ហើយជាកូនប្រុស មានទម្ងន់២,៥គីឡូក្រាម ។
គួរបញ្ជាក់ថា នៅកន្លែងកើតហេតុមានចំងាយ៣គីឡូម៉ែត្រ ទើបមកដល់មន្ទីរពេទ្យបង្អែកខេត្ត ស្ត្រីខាងលើបានត្អូញត្អែរថា គាត់មានជីវភាពក្រីក្រ ប្តីធ្វើការកម្មករសំណង់ ខណៈដែលសំរាលកូនលើកទី៣នេះ គាត់មានប្រាក់តែជាង១០ម៉ឺនរៀលទេ គាត់ខ្វះទាំងលុយទិញសម្ភារដូចជាទឹកដោះគោ ម្ហូបអាហារសំរាប់ហូបខ្លួនឯង ក៏មានគ្មានដែរ ។
ចែករំលែកព័តមាននេះ