រាជធានីភ្នំពេញ ៖ តារាសម្តែងមុខកាត់ចិន លោកឡុង ប៊ុនហេង បានផ្អាកកិច្ចការសិល្បៈមួយអន្លើរ ដើម្បីងាកមកធ្វើការងារក្រៅសិល្បៈមួយរយៈ ។ យ៉ាងណាតារាសម្តែងរូបនេះ បានវិលមកកាន់វិថីសិល្បៈវិញ ដោយមិនទាន់បោះបង់ទៅណាឡើយ ដោយលោកបានសម្តែងរឿងថ្មីមួយ ឱ្យផលិតកម្ម អិលឌីភីកឆើ ដែលជាផលិតកម្ម កំពុងជោគជ័យលើស្នាដៃផលិតភាពយន្ត ។
ដោយខ្លាចមានការរសាត់កេរ្តិ៍ឈ្មោះក្នុងវិថីសិល្បៈ ព្រោះធ្លាប់ប្រយុទ្ធជាមួយភារកិច្ចក្នុងជំហានសិល្បៈនេះយ៉ាងលំបាកហើយ ទើបលោកឡុង ប៊ុនហេង កំលោះរូបសង្ហារ មកពីទឹកដីខេត្តស្ទឹងត្រែង បានសម្រេចចិត្តមកកាន់សិល្បៈវិញ តាមបំណងប្រាថ្នាម្តងទៀតគ្រាការងារក្រៅសិល្បៈរាងស្បើយខ្លះ ។
តារារូបនេះ បានបាត់មុខមួយរយៈ ដើម្បីទៅមើលការខុសត្រូវក្នុងក្លិបកម្សាន្តដ៏ពេញនិយមមួយ ក្នុងរាជធានីភ្នំពេញដែលលោកស្ទើរតែមិននឹកថា អាចគ្រប់គ្រងបានហើយមានការចាប់អារម្មណ៍ពីភ្ញៀវមកកម្សាន្តឡើយ ។ ម្ល៉ោះហើយ ទើបតម្រូវឱ្យលោករិះរកវិធីជាបន្តបន្ទាប់គ្រងតំណែងក្នុងក្លិប ដើម្បីរកចំណុចទាក់ទាញរហូតតម្រូវឱ្យលោកមានការរយារពេលមួយរយៈនៅលើតួនាទីសិល្បៈជាតារាសម្តែងដែលលោកមិនទាន់ចិត្តដាច់អាចកាត់ផ្តាច់បាននៅឡើយ ។
បញ្ជាក់ប្រាប់អ្នកយកព័ត៌មានយើង កាលពីពេលថ្មីៗនេះ តារាសម្តែងឡុង ប៊ុនហេង បានឲ្យដឹងថា ពេលនេះដូចជាមិនទាន់ស្បើយពីការងារក្នុងក្លិបកម្សាន្តទាំងស្រុងទេ លោកនៅតែមមារញឹក ក្នុងការមើលខុសត្រូវនៅឡើយក្នុងមុខរបរនាពេលរាត្រីនេះ ។យ៉ាងណាលោកមិនអាចបណ្តោយឱកាសឲ្យរំលងផុតពីដៃទៀតឬត្រូវនិយាយពាក្យបដិសេធជាបន្តទៀតនោះទេរឿងមានអ្នកទំនាក់ទំនងហៅថតសម្តែងគឺត្រូវតែត្រឡប់មកវិញព្រោះពេលវេលាអត់ចាំបានទេឱកាសមានតែម្តងឡើយត្រូវតែចាប់ឲ្យបាន។
តារាដែលមិនចង់ឲ្យការកសាងស្នាដៃសិល្បៈរំលងទៅរូបនេះនិយាយទៀតថា ជាការរីករាយម្យ៉ាងដែរ គឺគ្រាដែលមកកាន់សិល្បៈវិញ លោកត្រូវបានផលិតកម្មអិលឌីអនុញ្ញាត ហៅសម្តែងរឿងភាគមួយមានចំណងជលងថា «ម្ទេសហិរប៉ះអំបិលប្រៃ» ដែលចាក់បញ្ចាំងនៅលើកញ្ចក់ទូរទស្សន៍ភីអិនអិន ដោយប្រមូលផ្តុំទៅដោយតារាជើងចាស់ថ្មីបង្ហាញទេពកោសល្យព្រមគ្នាតែម្តង។
ក្នុងដំណាក់កាលនេះ លោកកំពុងតែព្យាយាមហាត់ប្រាណសម្រកគីឡូឲ្យមើលទៅស្រកជាងមុន ដើម្បីចេញថតទៅមានដងខ្លួនសមរម្យជៀសវាងការធាត់ពេកក្នុងនាមតារាដែលការពាររឿងឡើងទម្ងន់។ស្របពេលជាមួយគ្នាដែលលោកមកសម្តែងវិញនេះនៅមិនទាន់ដឹងថាការទាញយកចំណាប់អារម្មណ៍ពីទស្សនិកជនបានប៉ុន្មានឡើយប៉ុន្តែលោកមានតែការបង្ហាញលើទេពកោស្យស្នាដៃប៉ុណ្ណោះទុកសម្រាប់វាយតម្លៃ ។
សំខាន់ពេលនេះចិត្តស្រឡាញ់សិល្បៈរបស់លោក នៅតែមានហើយមិនដែលគិតថា នឹងលាឈប់ពីសិល្បៈនោះទេគឺតែងតែគិតថាវិលវិញ ព្រោះចិត្តស្រឡាញ់សិល្បៈមានតាំងពីនៅតូចមកម្ល៉េះ ។ អ៊ីចឹងហើយ ទើបខំរកវិធីងាកមកវិញ បើទោះជាពេលនេះការងារនៅក្រៅសិល្បៈមិនទាន់ស្បើយបែបនេះក៏ដោយ ព្រោះមិនចង់ចាយពេលវេលាទៅយូរជាងនេះទៀត ។
ចែករំលែកព័តមាននេះ