ខេត្តស្ទឹងត្រែង ៖ ផ្សារថ្មស្ទឹងត្រែង ក្រោយពីរងគ្រោះដោយអគ្គិភ័យ កាលពីថ្ងៃទី៧ មេសា ២០១៦ កន្លងមក រហូតបច្ចុប្បន្នផ្សារនេះត្រូវបានសាងសង់ដោយកងវិស្វកម្មក្រោមបទបញ្ជារបស់សម្តេចនាយករដ្ឋមន្ត្រី សម្រចបាន៦៥ភាគរយ និងពន្លឿនការសាងសង់សម្រចជាស្ថាពរមុនគោលការណ៍នៅក្នុងខែសីហា ខាងមុខ ដើម្បីសម្រួលឲ្យអាជីវករបានលក់ដូរសមស្រប។
លោកឧត្តមសេនីយ៍ត្រី ម៉ូវ ចាន់នី ស្នងការង ស្នងការភស្តុភារ បញ្ជាការដ្ឋានកងវិស្វកម្ម អគ្គបញ្ជាការ ក្នុងពិធីអភិបាលខេត្តសួរសុខទុក្ខ និងនាំអំណោយគ្រឿងឧបភោគ បរិភោគជូនដល់កងកម្លាំងកងវិស្វកម្ម លោកបានឲ្យដឹងថា ការសាងសង់ផ្សារមរតកតេជោ រ៉ានី ស្ទឹងត្រែង កម្លាំងកងវិស្វកម្មបានចុះធ្វើកាលពីថ្ងៃទី២១ មេសា ២០១៦ ហើយបច្ចុប្បន្នសាងសង់បាន៦៥ភាគរយ និងបញ្ចប់មុនគោលការណ៍នៅក្នុងខែសីហា ២០១៦ ខាងមុខនេះ ដោយមិនគិតពីការសាងសង់តូបនោះឡើយ។
លោកឧត្តមសេនីយ៍បានបន្តថា ផ្សារមរតកតេជោ រ៉ានី ស្ទឹងត្រែង បានសាងសង់តាមស្តង់ដាដោយមានប្រព័ន្ធទឹក ប្រព័ន្ធភ្លើង ទ្វារជុំវិញ ដែលមានកងកម្លាំងកងវិស្វកម្មចំនួន១៣៥នាក់ អនុវត្តការសាងសង់ទាំងយប់ទាំងថ្ងៃ តែក៏មានបញ្ហាប្រឈមមួយចំនួនដែលធ្វើឲ្យមានការរាំងស្ទះផងដែរ ដូចជាបញ្ហាអាកាសធាតុ ធ្លាក់ភ្លៀង និងប្រព័ន្ធភ្លើងមិនទាន់គ្រប់គ្រាន់។
ឆ្លើយតបនឹងការសំណូមពររបស់លោកឧត្តមសេនីយ៍ត្រី ម៉ូវ ចាន់នី លោក ម៉ុម សារឿន អភិបាលខេត្តស្ទឹងត្រែង បានថ្លែងថា នៅថ្ងៃទី១៦ កក្កដា អង្គភាពអគ្គិសនី និងចុះទៅពិនិត្យផ្ទាល់ និងតម្លើងកម្លាំងអគ្គិសនី ដើម្បីងាយស្រួលដល់ដំណើរការសាងសង់ ព្រមទាំងអង្គភាពទឹកស្អាត ក៏និងត្រូវបំពេញការខ្វះខាតដែលមិនទាន់រៀបចំគ្រប់គ្រាន់នោះដែរ។
ចែករំលែកព័តមាននេះ