រាជធានីភ្នំពេញ ៖ ប៉ូលិសខណ្ឌដង្កោសហការជាមួយប៉ូលិសប្រឆាំងគ្រឿងញៀនរាជធានីភ្នំពេញ ព្រមទាំងលោកអភិបាលរងខណ្ឌផង បានចុះបង្ក្រាបព័ទ្ធចាប់ខ្លួនជនជាប់សង្ស័យចែកចាយថ្នាំញៀន២នាក់ កាលពីវេលាម៉ោង៩យប់ថ្ងៃទី១៩ កុម្ភៈ ២០១១ នៅក្បែររោងចក្រស្បែកជើងឈ្មោះម៉ាណេតហ្វូតវែរ ស្ថិតក្នុងភូមិជង្រុក សង្កាត់ត្រពាំងក្រសាំង ខណ្ឌដង្កោ ខណៈពួកគេកំពុងចែកចាយជាក់ស្តែងតែម្តង ។
ជនជាប់សង្ស័យជួញដូរថ្នាំញៀន២នាក់នេះមិនទាន់ត្រូវបានប៉ូលិសឱ្យស្គាល់ឈ្មោះនៅឡើយទេ ប៉ុន្តែពេលនេះកំពុងកសាងសំណុំរឿងនិងឃាត់ខ្លួននៅអធិការដ្ឋាននគរបាលខណ្ឌដង្កោត្រៀមបញ្ជូនទៅកាន់តុលាការ ដើម្បីចាត់ការតាមច្បាប់ ។ ជនទាំង២នាក់នេះជាមុខសញ្ញាចាស់ និងមេខ្លោងចែកចាយត្រូវបានប៉ូលិសតាមដានជាយូរមកហើយ ខណៈឃាត់ខ្លួនប៉ូលិសរឹបអូសបានថ្នាំញៀន៣គ្រាប់ជាប់ខ្លួនប៉ុណ្ណោះ ប៉ុន្តែមានថ្នាំញៀនជាច្រើនទៀតមិនដឹងថា គេបោះចោលនៅកន្លែងណាទេ…រឹបអូសរថយន្តកូរ៉ូឡាពណ៌ស្ករ ១គ្រឿងផងដែរ ។
មកដល់វេលារសៀលថ្ងៃទី ២០ កុម្ភៈ ២០១១ សមត្ថកិច្ចចំរុះដដែលបានទៅឆែកឆេរលំនៅឋានជនទាំង២នាក់នេះបន្តទៀត ស្ថិតនៅខាងក្រោយវត្តគោកបញ្ជាន់ ភូមិថ្មគោល សង្កាត់ចោមចៅ រកឃើញថ្នាំញៀនប្រភេទម៉ាទឹកក២កញ្ចប់តូចថែមទៀត…ចំណែកស្ត្រីជាម្តាយជនជាប់សង្ស័យខាងលើនេះ ក៏ជាមេខ្លោងក្នុងសកម្មភាពចែកចាយថ្នាំញៀនផងដែរ ឥឡូវរត់គេចខ្លួនបាត់ហើយខណៈប៉ូលិសកំពុងស្វែងរកមុខ ។ ព័ត៌មានលម្អិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព.
ចែករំលែកព័តមាននេះ