រាជធានីភ្នំពេញ ៖ បើទោះជាវិស័យកីឡានៅកម្ពុជាកាន់តែរីកចម្រើន ប៉ុន្តែក្នុងចំណោមកីឡាទាំងអស់ គឺមានតែប្រភេទកីឡាតេក្វាន់ដូប៉ុណ្ណោះដែលបានជួយឱ្យពិភពលោកស្គាល់កម្ពុជាកាន់តែច្បាស់រហូតអ្នកខ្លះលាន់មាត់
រាជធានីភ្នំពេញ ៖ បើទោះជាវិស័យកីឡានៅកម្ពុជាកាន់តែរីកចម្រើន ប៉ុន្តែក្នុងចំណោមកីឡាទាំងអស់ គឺមានតែប្រភេទកីឡាតេក្វាន់ដូប៉ុណ្ណោះដែលបានជួយឱ្យពិភពលោកស្គាល់កម្ពុជាកាន់តែច្បាស់រហូតអ្នកខ្លះលាន់មាត់សរសើរកីឡាករ-កីឡាការិនីកម្ពុជាថា ខ្លាំងមិនធម្មតា ។ ក្រោយការបញ្ជាក់ថា កីឡាតេក្វាន់ដូដណ្ដើមបានមេដាយចំនួន២៤គ្រឿងពីព្រឹត្តិការណ៍អន្តរជាតិនាពេលកន្លងមក តេក្វាន់ដូក៏កាន់តែជួយឱ្យកម្ពុជាមានមុខមាត់លើឆាកអន្តរជាតិតាមរយៈជ័យជម្នះរបស់កញ្ញា ស៊ន សៀវម៉ី ដែលទើបដណ្ដើមបានកៅអីអូឡាំពិកផ្លូវការនាខែកញ្ញា ក្នុងឆ្នាំ២០១៦នេះផងដែរ។ នេះជាមោទនភាពធំមួយរបស់កម្ពុជា ក្នុងពេលដែលកីឡាប្រភេទផ្សេងក៏បានកំពុងបោះជំហានលើការពង្រឹងគុណភាពផងដែរ ។
បន្ទាប់ពីមានការប្រកាសថា តេក្វាន់ដូបានក្លាយជាកីឡានាំមុខធំមួយដែលដណ្ដើមបានមេដាយច្រើនជាងគេធ្វើឱ្យកីឡាករ-កីឡាការិនីប្រភេទនេះ មានមុខមាត់យ៉ាងខ្លាំង ហើយក៏ទទួលបាននូវការកោតសរសើរណាស់ដែរសម្រាប់ឱកាសនេះ ។ យ៉ាងណាក៏ដោយកម្ពុជានៅមិនទាន់ដណ្ដើមបានមេដាយនៅឡើយទេពីព្រឹត្តិការណ៍អូឡាំពិក និងព្រឹត្តិការណ៍ដែលប្រទេសភាគច្រើននៅលើពិភពលោកផ្សេងទៀតចូលរួម ។ កម្ពុជាដណ្ដើមបានតែមេដាយពីព្រឹត្តិការណ៍ស៊ីហ្គេម និងកីឡាអាស៊ីកាលពីឆ្នាំ២០១៤មុននោះប៉ុណ្ណោះ ។ ប៉ុន្តែក៏ចាត់ទុកថាជាកិត្តិយសរបស់កម្ពុជាមិនអាចមើលរំលងបានដែរ ក្នុងពេលដែលកីឡាមួយនេះកាន់តែធ្វើបានល្អក្នុងការដណ្ដើមយកមុខមាត់មកជូនកម្ពុជានៅលើឆាកអន្តរជាតិនោះ ។ អ៊ីចឹងហើយនៅពេលទទួលបានមេដាយម្ដងៗ គឺកីឡាករ-កីឡាការិនីរបស់កម្ពុជា រមែងទទួលបានការយកចិត្តទុកដាក់ និងផ្ដល់រង្វាន់លើកទឹកចិត្តជាប្រចាំទើបគេឃើញកីឡាប្រភេទនេះកាន់តែមានសន្ទុះចង់បានមេដាយត្រឡប់មកវិញ ។ ម្យ៉ាងកីឡាតេក្វាន់ដូត្រូវគេមើលឃើញថាចាប់ផ្ដើមមានកម្រិតប្រហាក់ប្រហែលនឹងកីឡាករ-កីឡាការិនីបរទេសនោះផងទើបកីឡាប្រភេទនេះកាន់តែមានសន្ទុះឡើងជាបន្តបន្ទាប់។ មានការប៉ាន់ស្មានថា មេដាយដែលកីឡាករ-កីឡាការិនីកម្ពុជាដណ្ដើមបានលើឆាកអន្តរជាតិ មិនមែនជាទីបញ្ចប់នោះទេ ដោយសារតែជើងខ្លាំងនៅក្នុងប្រភេទកីឡានេះ ក៏កាន់តែមានសមត្ថភាព។ ប្រសិនបើ ស៊ន សៀវម៉ី បំបែកប្រវត្តិសាស្ត្រអាចដណ្ដើមបានមេដាយណាមួយពីព្រឹត្តិការណ៍អូឡាំពិកក្នុងពេលខាងមុខ នោះកីឡាតេក្វាន់ដូពិតជាបានឈានឡើងបន្ថែមទៀតហើយក្នុងការដណ្ដើមមេដាយលើឆាកអន្តរជាតិ។
យោងតាមការប្រកាសឱ្យដឹងចាប់តាំងពីកម្ពុជាបានបញ្ជូនកីឡាករ-កីឡាការិនីតេក្វាន់ដូឱ្យទៅប្រកួតនៅលើឆាកអន្តរជាតិ កម្ពុជាទទួលបានមេដាយចំនួន២៤ហើយដែលក្នុងនោះរួមមាន៖
-១៩៩៧ ដណ្ដើមបានមេដាយសំរឹទ្ធិពីព្រឹត្តិការណ៍ស៊ីហ្គេមដោយកីឡាករ ហៀង សុត្រា
-២០០១ ដណ្ដើមបានមេដាយសំរឹទ្ធិចំនួន២ ពីកីឡាស៊ីហ្គេមដោយកីឡាករ ថេន ថាវរៈ និងកីឡាករម៉េង សុគ្រី។
-២០០៣ ដណ្ដើមបានមេដាយសំរឹទ្ធិមួយគ្រឿងពីស៊ីហ្គេម ដោយកីឡាករ ប៊ុត វិចិត្រ
-២០០៥ ដណ្ដើមបានមេដាយសំរឹទ្ធិមួយគ្រឿងពីស៊ីហ្គេម ដោយកីឡាករ ប៊ុត វិចិត្រ
-២០០៧ ដណ្ដើមបានមេដាយប្រាក់មួយគ្រឿងពីស៊ីហ្គេម ដោយកីឡាករថិប ដារិន និងដណ្ដើមបានមេដាយសំរឹទ្ធិ២គ្រឿងពីព្រឹត្តិការណ៍នេះដូចគ្នា ដោយកីឡាករស៊ន អេលីត និងកីឡាការិនី ឈឿង ពុទ្ធារីម
-២០០៩ ដណ្ដើមបានមេដាយប្រាក់៣គ្រឿពីស៊ីហ្គេម ដោយកីឡាករ ឆូយ ប៊ូថង កីឡាករស៊ន អេលីត និងកីឡាករសូរ ណារ៉ូ។ ក្នុងព្រឹត្តិការណ៍ដដែល មេដៃសំរឹទ្ធិចំនួន៤ក៏ត្រូវដណ្ដើមបានផងដែរ តាមរយៈកីឡាករជាតិ ខេមរា កីឡាការិនី ជាង ប៊ុនណា កីឡាការិនី ស៊ន ដាវីន និងកីឡាការិនី ឈឿង ពុទ្ធារីម។
-២០១១ ដណ្ដើមបានមេដាយប្រាក់មួយគ្រឿងដោយកីឡាការិនី ស៊ន ដាវីន និងសំរឹទ្ធិ៣គ្រឿងពីស៊ីហ្គេមដូចគ្នាដោយកីឡាការិនីឈឿង ពុទ្ធារីម កីឡាការិនីស៊ន សៀវម៉ី និងកីឡាករផន វិរៈ។
-២០១៣ ទទួលបានមេដៃមាសពីស៊ីហ្គេម ដោយកីឡាការិនី ស៊ន សៀវម៉ី ប្រាក់២គ្រឿងដោយកីឡាករ ម៉ៅ សុផល កីឡាការិនី ស៊ន ដាវីន និងមេដាយសំរឹទ្ធ២គ្រឿងពីស៊ីហ្គេមដូចគ្នាដោយកីឡាការិនី ឈឿង ពុទ្ធារីម និងកីឡាការិនី ឈឿង លីណា។
-២០១៤ ដណ្ដើមបានមេដាយមាសពីព្រឹត្តិការណ៍កីឡាអាស៊ីដោយកីឡាការិនីស៊ន សៀវម៉ី
-២០១៥ ដណ្ដើមបានមេដាយសំរឹទ្ធ២គ្រឿងពីស៊ីហ្គេម ដោយកីឡាការិនី ឈឿង ពុទ្ធារីម និងកីឡាករ ផល សុវណ្ណាត់។
មេដាយដែលប្រកាសខាងលើមិនទាន់រាប់បញ្ចូលមេដោយដែលកីឡាករស៊ន អេលីត ដណ្ដើមបានពីអន្តរជាតិក្រៅពីព្រឹត្តិការណ៍អាស៊ាននោះផង៕
ចែករំលែកព័តមាននេះ