រាជធានីភ្នំពេញ ៖ ចាប់តាំងពីមានការលើកកម្ពស់ និងជំរុញអោយស្ត្រីចូលរួមក្នុងការធ្វើអាជីវកម្មនៅក្នុងប្រទេសកម្ពុជា និងមានការគាំទ្រ រង់ចាំការជួយបណ្ដុះបណ្ដាលដល់ស្ត្រីពីស្ថាប័នជាតិ និងអន្តរជាតិនានា សហគ្រិនជាស្ត្រីនៅក្នុងប្រទេសកម្ពុជាកាន់តែមានចំនួនច្រើនឡើងៗ និងបានធ្វើឱ្យស្ត្រីកម្ពុជាកាន់តែមានសក្ដានុពលក្នុងអាជីវកម្ម ជាពិសេសលើអាជីវកម្មខ្នាតតូច និងមធ្យម ។ ជាក់ស្ដែងលទ្ធផលនៃការប្រកួតប្រជែងពានរង្វាន់សហគ្រិនវ័យក្មេងកម្ពុជា ២០១៦ ក្នុងវគ្គពាក់កណ្ដាលផ្ដាច់ព្រ័ត្រ ជាប់ជំរើស១២រូប ក្នុងនោះមានបេក្ខភាពជាស្ត្រី៦នាក់ ស្មើនឹងបុរស ។
ថ្លែងនៅក្នុងពិធីប្រកាសសហគ្រិនវ័យក្មេងឆ្នើមទាំង១២រូប កាលពីថ្ងៃទី០៥ កក្កដា ២០១៦ នៅសណ្ឋាគារភ្នំពេញ លោកស្រី កែវ មុំ ប្រធានសមាគមសហគ្រិនស្ត្រីកម្ពុជា បានមានប្រសាសន៍ថា សមាគមសហគ្រិនស្ត្រីបង្កើតឡើងក្នុងគោលបំណងជួយដល់ស្ត្រី ពង្រឹងសមត្ថភាពក្នុងអាជីវកម្ម ដូចជាបង្កើតវគ្គបណ្ដុះបណ្ដាលនានា ជួយដល់ស្ត្រីក្នុងសមាគមសហគ្រិនស្ត្រី ។ លោកស្រីមានប្រសាសន៍ថា «ក្នុងចំណោមសហគ្រិនទាំងអស់នៅក្នុងប្រទេសកម្ពុជា មានស្ត្រីរហូតដល់៦០ភាគរយ ចឹងហើយបានជាយើងបង្កើតសមាគមសហគ្រិនស្ត្រីនេះឡើង ដើម្បីគៀងគរបណ្ដាសហគ្រិនជាស្ត្រី ទទួលបាននូវវគ្គបណ្ដុះបណ្ដាលពង្រឹងសមត្ថភាព ព្រមទាំងយកចំណេះដឹងនានា ដែលយើងផ្ដល់ជូនទៅចែករំលែកដល់ស្ត្រីផ្សេងៗទៀតនៅក្នុងប្រទេសកម្ពុជា» ។
លោកស្រីឧកញ៉ាបន្តថា មិនតែប៉ុណ្ណោះ ដើម្បីឱ្យសហគ្រិនជាស្ត្រីកាន់តែងាយស្រួលក្នុងការធ្វើអាជីវកម្ម សមាគមក៏បានទាក់ទងនឹងបណ្ដាធនាគារ ហិរញ្ញវត្ថុនានា ផ្ដល់ឥណទានសម្រាប់ស្ត្រីក្នុងការធ្វើអាជីវកម្ម ព្រោះថា កន្លងមក នៅពេលស្ត្រីទៅរកឥណទានពីធនាគារមានផលវិបាកច្រើនត្រូវការបំពេញបែបបទច្រើន។ ម្យ៉ាងទៀតសមាគមក៏បានទំនាក់ទំនងជាមួយរដ្ឋាភិបាល ស្វែងរកការជួយអន្តរជាតិធ្វើយ៉ាងណាសម្រួលដល់សហគ្រិនស្ត្រីទាំងក្នុងសមាគម និងសហគ្រិនស្ត្រីផ្សេងៗទៀតផងដែរ ។
លោក ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្ម បានមានប្រសាសន៍ផងដែរថា បច្ចុប្បន្ននេះ នៅក្នុងប្រទេសកម្ពុជាទាំងមូល មានសហគ្រាសប្រមាណជាង៥២ម៉ឺន ហើយក្នុងនោះ៩៩,៨ជាសហគ្រាសធុនតូច និងមធ្យម និងផ្ដល់ការងារសរុបប្រមាណ៧០ភាគរយដល់ប្រជាពលរដ្ឋកម្ពុជាទាំងមូល ។ ចំពោះចំណូលពីវិស័យសហគ្រាសធុនតូច និងមធ្យម មានប្រមាន៥៥ភាគរយនៃចំណូលសរុប ដែលវាជាចំណូលមួយធំសម្រាប់ជំរុញកំណើនសេដ្ឋកិច្ចកម្ពុជា ។
លោក ហេង សុខគង់ បានបន្តថា « នៅក្នុងចំណោមសហគ្រាសទូទាំងប្រទេសជាង៥២ម៉ឺនសហគ្រាសនោះ ស្ត្រីដែលជាម្ចាស់សហគ្រាសមានរហូតដល់៦២ភាគរយ ដែលចំនួននេះបានបង្ហាញឱ្យឃើញថា ស្ត្រីកម្ពុជា កាន់តែច្រើនបានចូលរួមក្នុងការធ្វើអាជីវកម្ម » ។
គួរបញ្ជាក់ថា ការប្រកួតប្រជែងពានរង្វាន់សហគ្រិនវ័យក្មេងកម្ពុជា ឆ្នាំ២០១៦នេះ ជាលើកទី២ រៀបចំឡើងដោយសភាយុវពាណិជ្ជករអន្តរជាតិកម្ពុជា និងសមាគមសហគ្រិនវ័យក្មេងកម្ពុជា ។ នៅវគ្គផ្ដាច់ព្រ័ត្រ នឹងជ្រើសរើសយកសហគ្រិនឆ្នើមចំនួន៤រូប ដើម្បីទទួលពានចំនួន៤ដែរ ទី១-ពានរង្វាន់សហគ្រិនឆ្នើមប្រចាំឆ្នាំ ២០១៦ ទី២-ពានរង្វាន់សហគ្រិនឆ្នើមផ្នែកសង្គម ទី៣-ពានរង្វាន់សហគ្រិនឆ្នើមស្ត្រី និងទី៤-ពានរង្វាន់សហគ្រិនវ័យឆ្លាតផ្នែកបច្ចេកវិទ្យា ។ ចំពោះលទ្ធផលនឹងប្រកាសនៅចុងខែកក្កដា ឆ្នាំ២០១៦ ខាងមុខនេះ ៕
ចែករំលែកព័តមាននេះ