សារព័ត៌មានបរទេសកាលពីពេល ថ្មីៗកន្លងមកផ្សាយថា ប្តី-ប្រពន្ធជនជាតិនូវែលសេឡង់ ដែលដើរកម្សាន្តក្នុងថ្ងៃឈប់សម្រាក់នៅប្រទេសហ្វ៊ីជី ប្រទះឃើញថង់ច្រកក្បាលមនុស្សនៅលើឆ្នេរខ្សាច់ ។ អាជ្ញាធរហ្វ៊ីជីសន្និដ្ឋានថា ជាផ្នែកមួយនៃអវយវៈរបស់ជនរងគ្រោះក្នុងរឿងក្តីធ្វើឃាតកាត់ ជាកង់ៗ ។
លោក Graeme និងនាង Jan Bickley បានដើរលេងកម្សាន្តក្នុងថ្ងៃឈប់សម្រាកនៅប្រទេសហ្វ៊ីជី រយៈពេល១សប្តាហ៍ក្នុងខែមិថុនា ២០១៦ ។ អំឡុងពេលនោះ លោក Graeme ប្រទះឃើញកញ្ចប់ម្យា៉ងនៅក្នុងទឹក ខណៈពេលដើរលេងនៅលើឆ្នេរខ្សាច់ ។ លោក Graeme ប្រាប់ AP ថា «ខ្ញុំដើរទៅរើសមកកាន់ តែដោយកញ្ចប់នោះធ្ងន់ក៏បោះវាទៅលើខ្សាច់ ហើយឮសំឡេងហាក់ដូចជាមានដុំថ្មនៅខាងក្នុង នៅពេលទៅបើកមើលស្រាប់តែឃើញក្បាលមនុស្ស» ។
មានអ្នកប្រទះឃើញស្បោងច្រកអវយវៈរបស់មនុស្ស រសាត់អណ្តែតទើរលើឆ្នេរហ្វ៊ីជី ជាច្រើន ដោយស្បោងទី១ ជាជើងមនុស្សមួយគូ ខណៈពេលប៉ូលិសសន្និដ្ឋានថា ជាជើងរបស់គូស្នេហ៍រុស្ស៊ី ដែលបាត់ខ្លួនពីកសិដ្ឋានមួយនៅប្រទេសហ្វ៊ីជី តាំងពីខែមិថុនា កន្លងមក ។ ស្របពេលជាមួយគ្នានេះ សារព័ត៌មានក្នុងស្រុកផ្សាយថា ពួកគេទាំង២នាក់ធ្លាប់មានបញ្ហាហិរញ្ញវត្ថុ ក្រោយពេលកសិដ្ឋានរបស់ពួកគេត្រូវព្យុះបោកបក់ បង្កឱ្យខូចខាតកាលពីខែកុម្ភៈ៕
ចែករំលែកព័តមាននេះ