យោងតាមការសិក្សាថ្មីមួយបានបង្ហាញថា បណ្តាបុរសដែលចំណាយពេលច្រើនអង្គុយស្ងៀមមួយកន្លែងឬធ្វើសកម្មភាពរាងកាយដែរប៉ុន្តែបន្តិចបន្តួចគឺប្រឈមខ្លាំងនឹងការកើតមានជំងឺខ្សោយបេះដូង ។
ការសិក្សាដែលធ្វើដោយអ្នកវិទ្យាសាស្ត្រអាមេរិកលើកនេះបានពិសោធលើបុរសអាយុចន្លោះពី៤៥ឆ្នាំដល់៦៩ឆ្នាំ និងគ្មានជំងឺខ្សោយបេះដូងប្រមាណ៨ម៉ឺន៤ពាន់១៧០នាក់ ។ ក្រោយការពិសោធដែលមានរយៈពេល៨ឆ្នាំ ក្រុមអ្នកវិទ្យាសាស្ត្របានរកឃើញថា បុរសដែលអង្គុយស្ងៀមមួយកន្លែងចាប់ពី៥ម៉ោងក្នុងមួយថ្ងៃ៣៤ភាគរយប្រឈមនឹងកើតជំងឺខ្សោយបេះដូងធៀបទៅនឹងបណ្តាបុរសដែលអង្គុយតិចជាង២ម៉ោងក្នុងមួយថ្ងៃ ។ ចំណែកបុរសដែលហាត់ប្រាណដែរ ប៉ុន្តែតិចតួច ៥២ភាគរយប្រឈមនឹងជំងឺខ្សោយបេះដូងធៀបទៅនឹងបុរសដែលហាត់ប្រាណច្រើន ។ នេះអាចនិយាយបានថា ជាការសិក្សាលើកដំបូងដែលបានពិនិត្យលើទិន្នន័យសកម្មភាពរាងកាយបុរសរាប់ម៉ឺននាក់ ។
វេជ្ជបណ្ឌិត Deborah Young អ្នកដឹកនាំការសិក្សាមកពីមជ្ឈមណ្ឌលសេវាកម្មសុខភាព Kaiser Permaneste រដ្ឋកាលីហ្វ័រនីញ៉ា សហរដ្ឋអាមេរិកបានថ្លែងថា វាមិនតម្រូវឱ្យមានការធ្វើដំណើរកន្លែងហាត់ប្រាណណាមួយនោះទេ ។ ការដើរគឺជាលំហាត់ប្រាណមួយដ៏ល្អបំផុតសម្រាប់មនុស្សភាគច្រើន ។ ការដើរឱ្យបានលឿនត្រឹម៣០នាទីក្នុងមួយថ្ងៃគឺពិតជាអស្ចារ្យ ៕
ចែករំលែកព័តមាននេះ