នៅតាមឱសថស្ថានជាច្រើន គេឃើញមានការផ្តល់ថ្នាំដល់អ្នកជំងឺ ដោយគ្មានវេជ្ជបញ្ជាត្រឹមត្រូវឡើយ ។ ឱសថការី ឬអ្នកលក់ថ្នាំក៏បានក្លាយជាគ្រូពេទ្យផ្តល់ថ្នាំព្យាបាលជំងឺជំនួសគ្រូពេទ្យ ។ ការប្រើប្រាស់ថ្នាំពេទ្យមិនត្រឹមត្រូវនឹងធ្វើឱ្យមានគ្រោះថ្នាក់ដល់មនុស្សគ្រប់រូបពេលអនាគត ។
ការប្រើប្រាស់ថ្នាំពេទ្យមិនបានត្រឹមត្រូវនឹងធ្វើឱ្យមានបញ្ហាជំងឺស៊ាំនឹងថ្នាំ ហើយមិនអាចព្យាបាលជំងឺនោះ បានជាសះស្បើយ។ នៅប្រទេសកម្ពុជា មិនទាន់មានឯកសារផ្លូវការថា តើមានមនុស្សប៉ុន្មាននាក់បានស្លាប់ដោយសារតែភាបស៊ាំនឹងថ្នាំ ( antimicrobial resistance)។ ប៉ុន្តែទោះបីជាយ៉ាងណាក៏ដោយចុះ ភាពស៊ាំនឹងថ្នាំនេះ អាចនឹងធ្ងន់ធ្ងរនៅក្នុងប្រទេសមួយដែលមានការគ្រប់គ្រងការប្រើប្រាស់ឱសថមិនបានត្រឹមត្រូវ។
នៅលើពិភពលោក គេបានប៉ាន់ស្មានថា មានមនុស្សចំនួនរហូតដល់៧០០.០០០នាក់បានស្លាប់ដោយសារតែជំងឺដែលស៊ាំនឹងថ្នាំ (drug-resistant infections)ជារៀងរាល់ឆ្នាំ។ គេរំពឹងថាដល់ឆ្នាំ២០៥០ តួលេខនឹងឡើងខ្លាំងដល់១០លាននាក់ក្នុងមួយឆ្នាំដែលស្លាប់ដោយសារតែបញ្ហានេះ។ ចំណែការខាតបង់ជាសេដ្ឋកិច្ចពិភពលោកវិញនឹងមានចំនួនរហូតដល់១០០ ០០០ ០០០ លានដុល្លាអាមេរិកឯណោះ ។
ប្រទេសកម្ពុជាត្រូវយកចិត្តទុកដាក់លើបញ្ហានេះអោយបានម៉ត់ចត់ដើម្បីចៀសវាងគ្រោះថ្នាក់សម្រាប់ប្រជាជនកម្ពុជានៅពេលអនាគត។ ចំណែកប្រជាជនកម្ពុជាខ្លួនឯងក៏ត្រូវតែចៀសវាងការប្រើថ្នាំផ្តេសផ្តាសហើយមិនត្រូវពឹងផ្អែកលើការផ្សំថ្នាំតាមឪសថស្ថានដើម្បីព្យាបាលជំងឺរបស់ខ្លួនឡើយ។ ចំណែកគ្រូពេទ្យក៏ត្រូវតែប្រើប្រាស់ថ្នាំដោយប្រយ័ត្នប្រយែងទៅតាមភាពធ្ងន់ធ្ងររបស់ជំងឺ។ ឪសថស្ថានទាំងឡាយត្រូវតែបញ្ឈប់ជាបន្ទាប់ការផ្សំថ្នាំដល់អ្នកជំងឺ។
មនុស្សគ្រប់គ្នាពិសេសក្រសួងសុខាភិបាលមានចំណែកទទួលខុសត្រូវ នៅក្នុងការទប់ស្កាត់ភាពស៊ាំរបស់មេរោគទៅនឹងថ្នាំព្យាបាល ពីព្រោះវាទាក់ទងនឹងជីវិតមនុស្សគ្រប់គ្នា។
ការបរាជ័យណាមួយនៅក្នុងការទប់ស្កាត់ភាពស៊ាំរបស់មេរោគនេះនឹងធ្វើអោយប្រជាជនកម្ពុជាកាន់តែច្រើនអាចនឹងស្លាប់ដោយសារតែការមានជំងឺដែលស៊ាំនឹងថ្នាំ ឬក៏ថ្នាំលែងមានប្រសិទ្ឋភាពព្យាបាលជំងឺ ៕
ចែករំលែកព័តមាននេះ