ចេញលទ្ធផលហើយ! របួស ចាន់ វឌ្ឍនាកា ត្រូវកំណត់ឱ្យផ្អាកប្រកួត6ខែ
រាជធានីភ្នំពេញ ៖ អ្នកគាំទ្រវិស័យបាល់ទាត់មិនតិចទេ បង្ហាញអារម្មណ៍តក់ស្លុត ក្រោយពីកីឡាករ ចាន់ វឌ្ឍនាកា ប្រកាសជា
រាជធានីភ្នំពេញ ៖ អ្នកគាំទ្រវិស័យបាល់ទាត់មិនតិចទេ បង្ហាញអារម្មណ៍តក់ស្លុត ក្រោយពីកីឡាករ ចាន់ វឌ្ឍនាកា ប្រកាសជាសាធារណៈថា របួសជើងធ្ងន់ធ្ងរកាលពីថ្ងៃមុន គឺបានចេញលទ្ធផលហើយ គឺដាច់ខាតត្រូវតែតម្រូវឱ្យលោកវះកាត់សម្រាកព្យាបាលរហូតដល់៦ខែ ។ លោកបង្ហាញនូវការខកចិត្តយ៉ាងខ្លាំង ដែលត្រូវបង្ខំចិត្តខកខានពីការប្រកួតធំៗ ខណៈដែលក្នុងរយៈពេល៦ខែនេះ គឺសុទ្ធតែជាព្រឹត្តិការណ៍សំខាន់ៗ ដែលលោករំពឹងថា នឹងបានជួយក្រុមកម្ពុជាឱ្យលេចធ្លោ។
លោកបានបង្ហោះនូវសារក្រោយពិនិត្យសុខភាពជាផ្លូវការថា«កុំមានការតក់ស្លុត កុំមានការភ័.យខ្លា.ច ខ្ញុំគ្រាន់តែសម្រាកមួយពេលប៉ុណ្ណោះ វាគ្រាន់តែជាការវះកាត់តូចមួយប៉ុណ្ណោះ សម្រាប់ខ្ញុំ ខ្ញុំមិនខ្លាច ។ ខ្ញុំធ្លាប់នៅក្រៅទីលានដោយមិនប្រកួត៦ខែទៅ៧ខែ តែខ្ញុំអាចត្រលប់មកវិញបាន ចុះគ្រាន់តែរបួសប៉ុននេះចង់មករារាំងផ្លូវជីវិតរបស់ខ្ញុំមិនអាចទៅរួចទេ ។ អរគុណអ្នកគ្រប់គ្នាផ្ដល់កម្លាំងចិត្តនិងលើកទឹកចិត្តខ្ញុំ ជួបគ្នា៦ខែទៀតក្រោយការវះកាត់ជោគជ័យ» ។
ជាមួយនឹងការបង្ហោះសារនេះ ចាន់ វឌ្ឍនាកា មិនអស់សង្ឃឹមឡើយ ទោះបីរូបគេត្រូវអវត្តមានពីការប្រកួតយ៉ាងតិចរយៈពេល៦ខែ ដែលអ្នកខ្លះយល់ថានឹងធ្វើអោយលោកអាចនឹងបាត់បង់ភាពលេចធ្លោ ពេលត្រលប់មកវិញ ។ ខ្សែប្រយុទ្ធឆ្នើមរបស់បឹងកេតរូបនេះ នៅតែមានក្តីសង្ឃឹមថា ខ្លួននឹងអាចបង្ហាញទម្រង់ល្អដូចដើម ក្រោយវះកាត់ និងសម្រាកព្យាបាលហើយ ។ អ្នកគាំទ្រច្រើនណាស់ បានបង្ហាញអារម្មណ៍សោកស្ដាយ ដែលលោកបែរជាជួបរឿងរ៉ាវដ៏អាក្រក់មួយនេះ ខណៈដែលលោកត្រូវបានគេរំពឹងថា នឹងទទួលបានការចាប់អារម្មណ៍សម្រាប់ការប្រកួតធំៗដែលកម្ពុជាកំពុងត្រៀមខ្លួន ។
ការរបាត់បង់ឱកាសរបស់លោក គឺស្មើនឹងក្រុមគោព្រៃកម្ពុជាបាត់បង់កីឡាករល្អម្នាក់ ហើយការវះកាត់ជើងលើកនេះ ដ្បិតថានឹងធ្វើឱ្យលោកអាចមានសភាពជាដូចដើម តែភាពរស់រវើកនៅ៦ខែក្រោយ ក៏មិនមែនងាយសាងនោះដែរ ស្របពេលកីឡាករស៊េរីក្រោយ ក៏មានសមត្ថភាព ធ្វើឱ្យគេមើលឃើញពីភាពខ្លាំងជំនួសលោកក្នុងក្រុម ។ ហ្វេនហ្វេនច្រើនណាស់ បានបង្ហោះពីការជូនពរ ហើយអ្នកគាំទ្រក៏មិនតិចនោះដែរ ជឿជាក់ថា លោកក្រោយពេលសះស្បើយ គឺពិតជាអាចត្រលប់មកបង្ហាញទម្រង់លេងល្អបានដូចដើម ដោយសារតែលោកក៏មានឆន្ទៈមិនតិចដែរ ថានឹងត្រឡប់មកកាន់ទីលានវិញក្រោយសម្រាក៦ខែ។
គួរបញ្ជាក់ផងដែរថា ខ្សែប្រយុទ្ធបឹងកេត ចាន់ វឌ្ឍនាកា បានរងរបួសនៅក្នុងជំនួបវិសាខា ក្នុងពានរង្វាន់ Prince Beer Pre-season Cup កាលថ្ងៃទី២៦ ខែមករា ឆ្នាំ២០២២ នៅកីឡដ្ឋានព្រីនស៍ ។ កីឡាកររូបនេះ ដាច់សរសៃជង្គង់ខាងស្ដាំ ហើយលោកត្រូវបានគ្រូពេទ្យតម្រូវឱ្យវះកាត់ និងសម្រាករហូតដល់៦ខែ ដោយមិនអោយមានចលនាសាច់ដុំជើង ក្នុងរយៈពេលសម្រាកព្យាបាលនោះទេ ទើបមានការបារម្ភថា នឹងប៉ះពាល់ទម្រង់លេងដ៏ល្អរបស់លោក ស្របពេលដែល ចាន់ វឌ្ឍនាកា ក៏បារម្ភដូចគ្នាថាតើក្រោយសម្រាក៦ខែ តើលោកអាចត្រឡប់មកកាន់ទីលានបានដូចដើមទៀតទេ ។ របួសដ៏ធ្ងន់របស់លោកបានធ្វើឱ្យបឹងកេត ដែលនឹងមានការប្រកួត Cambodian Airway Pre-Season Cup មុនបើករដូវកាលលីគកំពូល(Cambodian Premier League) នៅអំឡុងខែកុម្ភៈ ត្រូវអវត្តមានលោក តែក្រុមនេះបានអះអាងថា មិនប៉ះពាល់ដល់ក្រុមនោះទេ ដោយប្រធានក្រុមអះអាងថា ក្រៅពីចាន់ វឌ្ឍនាកា គឺមានកីឡាករល្អៗ ច្រើនទៀត ៕
ចែករំលែកព័តមាននេះ