LG Electronics បង្ហាញផលិតផលស៊េរីថ្មីឆ្នាំ2016 ក្នុងពិធីជប់លៀងប្រចាំឆ្នាំ
7 ឆ្នាំ មុន
រាជធានីភ្នំពេញ ៖ ក្រុមហ៊ុន LG Electronics និងក្រុមហ៊ុន G Gear ដែលជាក្រុមហ៊ុនដៃគូយុទ្ធសាស្ត្រតែមួយគត់នៅក្នុងប្រទេសកម្ពុជា បានរៀបចំកម្មវិធី LG VIP Night 2016 ជួបជុំអ្នកតំណាងចែកចាយលក់ផលិតផល LG
រាជធានីភ្នំពេញ ៖ ក្រុមហ៊ុន LG Electronics និងក្រុមហ៊ុន G Gear ដែលជាក្រុមហ៊ុនដៃគូយុទ្ធសាស្ត្រតែមួយគត់នៅក្នុងប្រទេសកម្ពុជា បានរៀបចំកម្មវិធី LG VIP Night 2016 ជួបជុំអ្នកតំណាងចែកចាយលក់ផលិតផល LG និងអតិថិជនដៃគូអាជីវកម្មនៅទូទាំងប្រទេសកម្ពុជា កាលពីល្ងាចថ្ងៃទី៦ កក្កដា ឆ្នាំ២០១៦ នៅមជ្ឈមណ្ឌលកោះពេជ្រ ។ នៅក្នុងពិធីនោះដែរ ក្រុមហ៊ុន LG Electronics ក៏បានបង្ហាញផលិតផលថ្មីៗនៅក្នុងឆ្នាំ២០១៦ទាំងអស់របស់ខ្លួន ដែលរួមមានដូចជា ទូរស័ព្ទដៃ ទូរទស្សន៍ OLED TV និងUHD TV ម៉ាស៊ីនបោកគក់ ម៉ាស៊ីនត្រជាក់ ទូទឹកកក ម៉ាស៊ីនកំដៅចំណីអាហារ ម៉ាស៊ីនបូមធូលី និងផលិតផលសម្រាប់អាជីវកម្មធំៗដូចជា ទូរទស្សន៍សម្រាប់សណ្ឋាគារ (Commercial TV) និងផលិតផលផ្សេងៗជាច្រើនទៀត ។
លោក Bong Soak Kim អគ្គនាយក ក្រុមហ៊ុន LG Electronics ប្រចាំព្រះរាជាណាចក្រកម្ពុជាបានឱ្យដឹងថា ក្រុមហ៊ុន LG Electronics មានវត្តមាននៅប្រទេសកម្ពុជាយូរណាស់មកហើយ ក្នុងការធ្វើសកម្មភាពផ្សេងៗទាក់ទងនឹងការលក់នៅលើទីផ្សារនៃគ្រឿងអេឡិចត្រូនិកចាប់តាំងពីឆ្នាំ២០០៧ ។ មកទល់ពេលនេះ យើងមានមោទនភាពណាស់ដែលបានចាប់ដៃគូជាមួយនឹងក្រុមហ៊ុនតំណាងចែកចាយគឺ ក្រុមហ៊ុន G Gear ដែលជាក្រុមហ៊ុនឈានមុខក្នុងការចែកចាយផលិតផលអេឡិចត្រូនិកប្រើប្រាស់ក្នុងផ្ទះរួមទាំង ទូរស័ព្ទដៃផងដែរ ។ ម្យ៉ាងទៀត ក្នុងរយៈពេលជាច្រើនឆ្នាំចុងក្រោយនេះ យើងក៏បានគាំទ្រ និងជួយសហការជាមួយ សមាគមក្រុមគ្រូពេទ្យស្ម័គ្រចិត្តយុវជនសម្តេចតេជោ ដើម្បីជួយដល់ប្រជាជនក្រីក្រ ក្នុងការពិនិត្យព្យាបាលជំងឺនៅតាមបណ្តាខេត្តនានា ។ នេះជាផ្នែកមួយនៃបេសកកម្មរបស់យើងដែល ស្រឡាញ់ប្រជាជនកម្ពុជាដូចជាក្រុមគ្រួសាររបស់យើង ។
លោក ឧកញ៉ា សុខ ពិសិដ្ឋ នាយកប្រតិបត្តិក្រុមហ៊ុន G Gear បានមានប្រសាសន៍ឱ្យដឹងដែរថា ក្រុមហ៊ុន G Gear ពិតជាមានមោទនភាពណាស់ដែលបានចាប់ដៃគ្នាយ៉ាងរឹងមាំជាមួយក្រុមហ៊ុន LG Electronics ដែលជាក្រុមហ៊ុននាំមុខគេនៅក្នុងពិភពលោក ដើម្បីបម្រើនូវតម្រូវការទីផ្សារបច្ចេកវិទ្យានៅព្រះរាជាណាចក្រកម្ពុជា ។ ក្នុងឆ្នាំ២០១៦នេះ តម្រូវការរបស់ផលិតផល LG បានកើនឡើងយ៉ាងគំហុក ។ ការកើនឡើងនូវតម្រូវការ និងការផ្តល់ទំនុកចិត្តកាន់តែខ្លាំងពីអតិថិជនប្រើប្រាស់ផលិតផលម៉ាក LG គឺមិនមែនគ្រាន់តែបានមកពីការផ្សាយពាណិជ្ជកម្មរបស់ក្រុមហ៊ុន LG Electronics នោះទេ តែដោយសារតែក្រុមហ៊ុនបានប្រើប្រាស់នូវបច្ចេកវិទ្យាចុងក្រោយដែលផ្ដល់ភាពងាយស្រួលដល់អ្នកប្រើប្រាស់ទាំងអស់ និងជាបច្ចេកវិទ្យាដែលក្រុមហ៊ុនប្រកួតប្រជែងមិនអាចធ្វើបាន ។
នៅក្នុងពិធីនោះដែរ ក៏មានការបង្ហាញនូវកំពូលស្មាតហ្វូនស៊េរីថ្មីរបស់ LG គឺ LG G5SE មានអេក្រង់ទំហំ 5,3អ៊ីញ QHD និងមានកាមេរ៉ាភ្លោះ (Dual Camera) 16 MP និង8MP ដែលអាចថតបានរូបភាពទំហំធំទូលាយជាមួយនឹងកាមេរ៉ា Wide Angle Len 135ដឺក្រេ សើ្មនឹងរូបភាពដែលមើលឃើញដោយភ្នែកទទេ និងជាទូរស័ព្ទស្មាតហ្វូនដំបូងគេបំផុតនៅលើពិភពលោកដែលអាចដោះថ្មបានយ៉ាងងាយស្រួល ថែមទាំងអាចសាកថាមពលថ្មបានយ៉ាងរហ័សឆាប់ពេញ និងប្រើរយៈពេលត្រឹមតែ៣០នាទីប៉ុណ្ណោះ ថាមពលបាន៨៣% ថ្មកាន់បានយូរ ៕
ចែករំលែកព័តមាននេះ