កូនប្រុសរបស់អូសាម៉ា ប៊ីឡាឌែន បានធ្វើការគំរាមថា នឹងធ្វើការសងសឹកទៅលើសហរដ្ឋអាមេរិក ដែលបានសម្លាប់ឪពុករបស់ខ្លួន។ យោងតាមសារសំឡេងដែលបានធ្វើការបង្ហោះលើអ៊ីនធើរណេត កូនប្រុសរបស់ប៊ីឡាឌែនបានសន្យាថា នឹងបន្តក្រុមទាហានប្រឆាំងនឹងសហរដ្ឋអាមេរិក ។
ក្រុមស៊ើបអង្កេតបានប្រាប់ឱ្យដឹងថា ក្នុងសារសំឡេងមួយនោះ ដែលមានរយៈពេល២១នាទី គឺលោកបានអះអាងថា «ពួកយើងទាំងអស់ជាអូសាម៉ា» ។ «ពួកយើងនឹងបន្តប្រឆាំងនឹងអ្នក និងដាក់គោលដៅលើអ្នកនៅក្នុងប្រទេសរបស់អ្នក ក៏ដូចជាប្រទេសដទៃក្នុងគោលបំណងឆ្លើយតបនឹងការជិះជាន់របស់អ្នកទៅលើប្រជាជន Palestine, Afghanistan, Syria, Iraq, Yemen, Somalia និងកន្លែងដទៃទៀត ដែលជាទឹកដីរបស់អ្នកកាន់សាសនាអ៊ីស្លាមដែលបានស្លាប់» កូនរបស់ប៊ីឡាឌែនបាននិយាយ។
លោកបានបន្ត «សម្រាប់ការសងសឹករបស់ជាតិអ៊ីស្លាម ដើម្បីអូសាម៉ា សូមឲ្យព្រះអាឡោះជួយប្រណីដល់លោកផង នេះមិនមែនជាការសងសឹកចំពោះអូសាម៉ា ដែលជាមនុស្សតែម្នាក់នោះទេ តែជាការសងសឹកចំពោះអ្នកទាំងអស់ ដែលបានការពារអ៊ីស្លាម»។
គួររំលឹកថា លោកអូសាម៉ា ប៊ីឡាឌែន បានត្រូវគេសម្លាប់នៅប្រទេសប៉ាគីស្ថាន ក្នុងផ្ទះលាក់ខ្លួនរបស់គាត់កាលពីឆ្នាំ២០១១ ដែលវាជាការប៉ះពាល់យ៉ាងខ្លាំងដល់ក្រុមទាហានរបស់លោក ។
បើតាមឯកសារដែលបានប្រមូលមកពីផ្ទះលាក់ខ្លួនរបស់លោកនោះបានបញ្ជាក់ថា ជំនួយការរបស់លោកបានព្យាយាមធ្វើការជួបជុំឪពុក និងកូន ។ កូនរបស់លោក ត្រូវបានគេឃុំខ្លួននៅប្រទេសអ៊ីរ៉ង់ និងបន្ទាប់មក ក៏ត្រូវបានផ្លាស់ទៅប្រទេសប៉ាគីស្ថាន ដើម្បីទៅរកឪពុក។ កូនរបស់លោក គឺប្រហែលជាមានអាយុក្នុងខ្ទង់ពាក់កណ្តាល២០ឆ្នាំ និងកំពុងជះឥទ្ធិពលដល់ក្មេងជំនាន់ក្រោយឱ្យប្រយុទ្ធ ដើម្បីអ៊ីស្លាម ។
តាមលោក Bruce Riedel ពីវិទ្យាស្ថាន Brookings បាននិយាយថា «Hazma (កូនរបស់ប៊ីឡាឌែន) គឺជាតំណាងថ្មីរបស់អាល់កៃដា ដែលជាមនុស្សម្នាក់ដែលជាប់សាច់ឈាមផ្ទាល់ជាមួយលោកប៊ីឡាឌែនផងដែរ ។ លោកជាសត្រូវដ៏ច្បាស់លាស់ និងដ៏គ្រោះថ្នាក់ម្នាក់» ។
ចែករំលែកព័តមាននេះ