យោងតាមការសិក្សាស្រាវជ្រាវចុងក្រោយបង្អស់របស់មជ្ឈមណ្ឌលឧតុនិយមអាមេរិក (NSIDC) បានឱ្យដឹងថា ផ្ទាំងទឹកកកនៅតំបន់សមុទ្រអាកទិក បានរលាយយ៉ាងខ្លាំងខុសពីធម្មតា ពោលគឺ៥៨០.០០០គីឡូម៉ែត្រការ៉េ ក្នុងខែឧសភា ឆ្នាំ២០១៦នេះ ។ នាយកប្រតិបត្តិប្រចាំ NSIDC លោកសាស្ត្រាចារ្យ Mark Serreze បានថ្លែងថា៖ «យើងមិនដែលឃើញបាតុភូតបែបនេះទេពីមុនមក ។ ការស្រុតចុះនៃផ្ទាំងទឹកកកនេះ មានទំហំច្រើនជាងឆ្នាំមុន ។ ការរលាយដ៏ច្រើននេះវាហាក់ដូចកាលពីឆ្នាំ២០១២អីុចឹងដែរ ។
ផ្ទាំងទឹកកកនៅក្នុងសមុទ្របានរលាយច្រើនជាងការធ្វើកំណត់ត្រាកាលពីខែឧសភាឆ្នាំមុន ប្រសិនបើយើងប្រៀបធៀបមធ្យមភាគខែឧសភាឆ្នាំ១៩៨១ និងឆ្នាំ២០១០ នោះភាពខុសគ្នាមានកាន់តែមានទំហំធំជាង » ។
ការរលាយផ្ទាំងទឹកកកនេះ មិនបណ្តាលឱ្យកើននីវ៉ូទឹកសមុទ្រទេ ព្រោះដុំទឹកកកជាធម្មតាអណ្តែត ។ ទោះបីជាយ៉ាងណាក្តី ការរលាយនេះនឹងមានផលប៉ះពាល់ខ្លាំងមកផែនដី (រលកកម្តៅព្រះអាទិត្យជះមកផែនដីកាន់ខ្លាំង)។ ពេលដុំទឹកកកចាប់ផ្តើមរលាយ វានឹងធ្វើឱ្យផ្ទៃទឹកសមុទ្រនៅតំបន់នោះប្រែជាខ្មៅ ដែលងាយនឹងស្រូបពន្លឺព្រះអាទិត្យ ជាហេតុធ្វើឱ្យផែនដីកើនកម្តៅជាងមុន។ បច្ចុប្បន្ននេះតំបន់អាកទិកកំពុងតែកើនកម្តៅទ្វេដង ដូចតំបន់ផ្សេងទៀតក្នុងពិភពលោកដែរ ។
NSIDC បានចេញសេចក្តីថ្លែងការណ៍ពន្យល់ថាខ្យល់បក់ពីភាគខាងជើងតំបន់អឺរ៉ុប និងរដ្ឋអាឡាស្កា មានកម្រិតខ្ពស់ជាងខ្យល់បក់ជាមធ្យមចូលទៅតំបន់សមុទ្រអាកទិក ដោយបង្កើតឱ្យមានកម្តៅនៅតំបន់នោះ ។ សីតុណ្ហភាពខ្យល់កាលពីខែឧសភា គឺ ២,៨ អង្សាសេ ដែលសីតុណ្ហភាពនេះមានកម្រិតខ្ពស់ជាងធម្មតា។
លោកសាស្ត្រាចារ្យ Chris Rapley ពីសាកលវិទ្យាល័យមួយក្នុងទីក្រុងឡុងដ៍បាននិយាយថា៖ «ផលប៉ះពាល់លើប្រព័ន្ធទឹកសមុទ្រ និងផ្ទៃដីមានភាពប្រែប្រួលគួរឱ្យកត់សម្គាល់ ។ ជាងនេះទៅទៀតស្ថានភាពសព្វថ្ងៃនេះកំពុងតែផ្លាស់ប្តូរបរិយាកាសនៅតំបន់សមុទ្រ » ។
បន្ថែមលើភាពថមថយនៃផ្ទាំងទឹកកកក្នុងតំបន់នោះ ផ្ទាំងទឹកកក ក្រាស់ៗក៏កំពុងតែរលាយ ជាពិសេសនៅសមុទ្រ Beaufort Sea (ប្រហែលជា៤០សង្ទីម៉ែត្រច្រើនជាងធម្យមភាគឆ្នាំ២០១១-២០១៦) រួមទាំងនៅសមុទ្រ Barents និងសមុទ្រ Kara (១០ទៅ៣០សង្ទីម៉ែត្រស្តើងជាងឆ្នាំ មុនៗ) ។
ដូចបង្ហាញក្នុងរូបភាពដែលថតផ្តិតដោយអង្គការ NASA កាលពីថ្ងៃទី២១ខែឧសភា ២០១៦ ឱ្យដឹងថា បំណែកទឹកកកដ៏ច្រើនផ្ទាំងនៅសមុទ្រ Beaufort និងចន្លោះដ៏ធំនៃផ្ទៃទឹកសមុទ្រ ពុះចែកដុំទឹកកកពីឆ្នេរ។ នេះបញ្ជាក់ឱ្យឃើញថាឆ្នាំ២០១៦នេះអាចនឹងវិលទៅដូចសភាពក្នុងកំណត់ត្រាឆ្នាំ២០១២ ឬយ៉ាងណានោះទេ វាអាស្រ័យលើសីតុណ្ហភាពនៅរដូវក្តៅ ។
លោកសាស្ត្រាចារ្យ Serreze និយាយថា៖ «អ្វីដែលយើងអាចនិយាយបាន គឺថាពួកយើងកំពុងស្ថិតនៅគោលជំហរដ៏អាក្រក់មួយ តែទោះជាយ៉ាងណាក៏ដោយ វាគឺជាផ្នែកមួយនៃបម្រែបម្រួលដែលយើងធ្លាប់បានដឹងមកហើយ ថាតំបន់អាកទិក ងាយនឹងប្រែប្រួល ដូចអ្វីដែលយើងកំពុងជួបប្រទះនាពេលបច្ចុប្បន្ននេះ» ៕
ចែករំលែកព័តមាននេះ