ខេត្តកំពង់ស្ពឺ ៖ បុរសម្នាក់មានជំងឺហើមរលួយដៃឆ្វេង ព្រោះតែមុតធ្មុងត្រីអណ្ដែងពេលទៅធ្វើកម្មករសំណង់ ពេលនេះសូម្បីតែលុយព្យាបាល ក៏មិនមានដែរសព្វថ្ងៃរស់តាមយថាកម្មតែប៉ុណ្ណោះ ។ ពេលនេះសូមអំពាវនាវសុំអោយសប្បុរសជន និងគ្រូពេទ្យមេត្តាជួយព្យាបាលដៃរបស់គាត់ផង ។
បុរសដែលមានដៃហើមរលួយនេះឈ្មោះចក់ សៅ អាយុ៣៤ឆ្នាំ មានប្រពន្ធឈ្មោះគឹម អាយុ៣៩ឆ្នាំ រស់នៅភូមិអង្គសខ្នាយ ឃុំមហាឬស្សី ស្រុកគង់ពីសី ខេត្តកំពង់ស្ពឺ ។
ជួបជាមួយអ្នកយកព័ត៌មានកោះសន្ដិភាពនៅរសៀល ថ្ងៃទី៨ ខែកក្តដា ២០១៦ លោកចក់ សៅ បានរៀបរាប់ថា ដៃរបស់គាត់ដែលបើមរលួយនេះ គឺមុតធ្នុងត្រីអណ្ដែងកាលពីអំឡុងពេលទៅធ្វើជាកម្មករសំណង់ នៅរាជធានីភ្នំពេញ កាលពីថ្ងៃទី១៤ មិថុនា ឆ្នាំ២០១៦ ។ ពេលនោះក្រោយពីមុតលោកបានយកលុយដែលបានពីធ្វើកម្មករទៅទិញ ថ្នាំលេបដែរតែមិនជាសះស្បើយ គឺដៃចេះតែហើមធំទៅៗ រហូតមកដល់ពេលនេះ គឺចង់រលួយទៅហើយ ។
លោកចក់ សៅ បានបន្តថា នេះមិនមែនលោកបណ្ដែតបណ្ដោយឱ្យកើតដល់ថ្នាក់នេះទេ គឺព្រោះតែលោកមិនមានលុយទិញថ្នាំ យកមកព្យាបាល ណាមួយមិនមានលទ្ធភាពទៅពេទ្យទៀត នេះមកពីលោកមិនមានប្រាក់តែម្ដង ។
លោកបន្តទៀតថា លោកអស់សង្ឃឹមហើយ ពេលនេះលោកមិនដឹងថា ទៅរកពឹងអ្នកណាទៀតទេ ហើយការងារក៏មិនអាចធ្វើបាន គឺមានតែបណ្ដោយតាមយថាកម្មទៅចុះ ។
ចំណែកឯស្ត្រីជាប្រពន្ធ លោកចក់ សៅ ក៏បានសំណូមពរដល់អស់លោកជាសប្បុរសជន និងក្រុមគ្រូពេទ្យចិត្តធម៌សូមមេត្តាជួយដល់គ្រួសាររបស់គាត់ផង ពេលនេះក្ដីសង្ឃឹម មានទៅលើប្ដីរបស់គាត់ ជាអ្នករកប្រាក់ចិញ្ចឹមគ្រួសារ បានរលាយបាត់អស់ហើយ ព្រោះតែកម្មអកុសលដែលបណ្ដាលមកពីមុតធ្មុងត្រីអណ្ដែង ។
ស្ត្រីជាប្រពន្ធបានសំណូមពរដល់ថ្នាក់ដឹកនាំ មេត្ដាប្រណីដល់គ្រូសារគាត់ផង ពេលនេះគោលបំណងធំបំផុតគឺចង់អោយដៃប្ដីរបស់គាត់ បានជាសះស្បើយ ដើម្បីបានប្រកបរបរយកប្រាក់មកផ្គត់ផ្គង់គ្រួសារឡើងវិញ ។ គាត់ក៏បានសំណូមពរដល់សប្បុរសជនមេត្ដា ជួយផ្ដល់សម្ភារគ្រឿងបរិភោគហូបចុកដល់គ្រួសារគាត់ផង ពេលនេះកុំថាឡើងលុយព្យាបាលប្ដី សូម្បីតែអង្ករក៏មិនមានច្រកឆ្នាំងដែរ សព្វថ្ងៃរស់បានដោយសារអ្នកជិតខាងហុចបាយសម្លតែប៉ុណ្ណោះ ។
សម្តីលាយឡំទឹកភ្នែករបស់ស្ត្រីជាប្រពន្ធព្រមទាំងកាយវិការលើកដៃសំពះផង បានសុំការសណ្ដោយប្រណីពីសំណាក់សម្ដេចតេជោ និងសម្ដេចកិត្តិព្រឹទ្ធបណ្ឌិត សូមលោកទាំងពីរមេត្តាជួយដល់ប្ដីគាត់ផង ព្រោះអត់ពីប្ដីទៅ ក្ដីសង្ឃឹមត្រូវរលាយជាក់មិនខានឡើង ៕
ចែករំលែកព័តមាននេះ