សារព័ត៌មានបរទេសកាលពីថ្ងៃទី៥ កក្កដា ២០១៦ ផ្សាយថា អង្គការទ្រទ្រង់ថាមពលស្អាតចំនួន៤ រួមមានអង្គការសុខភាព និងបរិស្ថាន មូលនិធិសត្វព្រៃអន្តរជាតិ (WWF) អង្គការស្ថានភាពអាកាសធាតុនៅអឺរ៉ុប និងអង្គការ
សារព័ត៌មានបរទេសកាលពីថ្ងៃទី៥ កក្កដា ២០១៦ ផ្សាយថា អង្គការទ្រទ្រង់ថាមពលស្អាតចំនួន៤ រួមមានអង្គការសុខភាព និងបរិស្ថាន មូលនិធិសត្វព្រៃអន្តរជាតិ (WWF) អង្គការស្ថានភាពអាកាសធាតុនៅអឺរ៉ុប និងអង្គការ Sandbag បានបង្ហាញពីផលប៉ះពាល់ពីរោងចក្រអគ្គិសនីប្រើធ្យូងថ្មនៅអឺរ៉ុប ដោយបញ្ជាក់ថា ល្អងធូលីខ្នាតតូចដែលបញ្ចេញពីរោងចក្រអគ្គិសនីធ្យូងថ្មចំនួន២៥៧ នៅសហភាពអឺរ៉ុប (EU) បង្កឱ្យមានការស្លាប់បាត់បង់ជីវិតប្រហែល២៣.០០០នាក់ ក្នុងមួយឆ្នាំ ។
ទោះបីជាបានងាកទៅប្រើថាមពលស្អាតរួមមានខ្យល់ និងពន្លឺព្រះអាទិត្យ មានកំណើនខ្ពស់ក៏ដោយ ប៉ុន្តែនៅមានថាមពលពីធ្យូងថ្មប្រហែល១៨% នៃការបញ្ចេញកម្តៅនៅ EU។ ក្រៅពីស្លាប់ដោយសារស្ថានភាពបរិយាកាសរោងចក្រអគ្គិសនីធ្យូងថ្មនោះក៏ជាមូលហេតតុបង្កឱ្យកើតជំងឺរលាកផ្លូវដង្ហើមជិត១២.០០០នាក់ និងជំងឺហឺតដង្ហក់លើកុមារជាងកន្លះលាននាក់នៅ EU កាលពីឆ្នាំ២០១៣កន្លងមក ។
របាយការណ៍បញ្ជាក់ថា ស្ថានភាពល្អងធូលីដែលបញ្ចេញពីបំពង់ផ្សែងធ្យូងថ្មអាចរសាត់អណ្តែតទៅឆ្ងាយជាច្រើនរយគីឡូម៉ែត្រ និងមិនត្រឹមតែប៉ះពាល់ដល់ពលរដ្ឋក្នុងប្រទេសប៉ុណ្ណោះទេ គឺប៉ះពាល់ដល់ប្រទេសជិតខាងទៀងផង ។ ប្រទេសដើមហេតុបញ្ចេញឧស្ម័នពុល និងជាមូលហេតុនៃការស្លាប់របស់ពលរដ្ឋច្រើនបំផុតគឺប្រទេសប៉ូឡូញមាន៤.៦៩០នាក់ អាល្លឺម៉ង់ ២៤៩០នាក់ រ៉ូម៉ានីមានចំនួន១.៦៦០នាក់ ប៊ុលហ្គារី១.៣៩០នាក់ និងអង់គ្លេសចំនួន១.៣៥០នាក់ ខណៈពេល៥ប្រទេសដែលទទួលផលប៉ះពាល់ជាតិពុលរបស់ខ្លួន និងពីប្រទេសជិតខាងច្រើនបំផុតរួមមានអាល្លឺម៉ង់ ចំនួន៣.៦៣០នាក់ អ៊ីតាលី១.៦១០នាក់ បារាំង១.៣៨០នាក់ ក្រិក១.០៥០នាក់ និងហុងគ្រី៧០០នាក់ ។
តាមទិន្នន័យពីអង្គការសុខភាពពិភពលោក (WHO) ឱ្យដឹងថា ស្ថានភាពអាកាសធាតុជាមូលហេតុប៉ះពាល់ដល់ពលរដ្ឋជាច្រើននាក់នៅទូទាំងពិភពលោក ព្រោះតែសីតុណ្ហភាពពិភពលោកឡើងខ្ពស់តម្រូវឱ្យស្ថានការណ៍កាន់តែអាក្រក់ ។ ចំណែកតាមបណ្តាប្រទេសផ្សេងទៀតបង្ហាញថា ស្ថានភាពអាកាសធាតុពីធ្យូងថ្មជាមូលហេតុនៃការស្លាប់មុនអាយុ ដូចជាសហរដ្ឋអាមេរិកមានជាង១៣.០០០នាក់ ខណៈពេលឥណ្ឌាមានអ្នកស្លាប់មុនអាយុដល់ទៅ១១៥.០០០នាក់ និងជំងឺហឺតមានប្រហែល២០លាននាក់ក្នុងមួយឆ្នាំ៕
ចែករំលែកព័តមាននេះ