តុលាការបិទការស៊ើបសួរសំណុំរឿង កឹម សុខា បន្ទាប់ពីសាលាឧទ្ធរណ៍បដិសេធបណ្តឹងក្រុមមេធាវី
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ បានចេញសេចក្តីជូនដំណឹងតាមរយៈលិខិតមួយច្បាប់ជូនលោក
កឹម សុខា ថា
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ បានចេញសេចក្តីជូនដំណឹងតាមរយៈលិខិតមួយច្បាប់ជូនលោក កឹម សុខា ថា សំណុំរឿងព្រហ្មទណ្ឌចុះថ្ងៃទី២៦ ខែឧសភា ឆ្នាំ២០១៦ ដែលបានចោទប្រកាន់តាមដីកាសន្និដ្ឋានបញ្ជូនរឿងឲ្យស៊ើបសួររបស់អយ្យការអមសាលាដំបូងរាជធានី ពីបទបដិសេធក្នុងការចូលខ្លួន ពេលនេះចៅក្រមស៊ើបសួរ បានសម្រេចបិទការស៊ើបសួរហើយ ។
គេមិនអាចទាក់ទងក្រុមមេធាវីការពារក្តីរបស់លោក កឹម សុខា បានទេដោយសារតែទូរស័ព្ទមិនអាចទាក់ទងបាន តែតាមអ្នកច្បាប់បានលើកឡើងថា បន្ទាប់ពីបិទការស៊ើបសួរ សំណុំរឿងនេះនឹងត្រូវបញ្ជូនទៅចៅក្រមជំនុំជម្រះ ។ កាលពីថ្ងៃទី៤ ខែកក្កដា ឆ្នាំ២០១៦ សភាស៊ើបសួរសាលាឧទ្ធរណ៍ បានបដិសេធចំពោះការប្តឹងមោឃភាពរបស់ក្រុមមេធាវីលើការសម្រេចចោទប្រកាន់នេះ និងបង្វិលសំណុំរឿងទៅសាលាដំបូងរាជធានីភ្នំពេញបន្តនីតិវិធី ។
លោកមេធាវី ហែម សុជាតិ បានប្រាប់អ្នកកាសែតបន្ទាប់ពីសាលាឧទ្ធរណ៍ច្រានចោលបណ្តឹងសុំមោឃភាពរបស់ក្រុមមេធាវីការពារក្តីលោក កឹម សុខា ថា ក្រុមមេធាវីនឹងពិភាក្សាគ្នាលើបណ្តឹងសាទុក្ខ ហើយប្តឹងទៅតុលាការកំពូលដើម្បីប្រឆាំងការសម្រេចរបស់សាលាឧទ្ធរណ៍នេះ ។
គួរបញ្ជាក់ផងដែរថា កាលពីថ្ងៃទី២៦ ខែឧសភា ឆ្នាំ២០១៦ តុលាការបានកោះហៅលោក កឹម សុខា ក្នុងនាមជាសាក្សីក្នុងសំណុំរឿងសញ្ចារកម្ម ពាក់ព័ន្ធនឹងបណ្តឹងរបស់កញ្ញា ខុម ចាន់តារ៉ាទី ហៅស្រីមុំ អាយុ២៦ឆ្នាំ តែពេលនោះមេធាវីចំនួន៥រូប បានដាក់លិខិតចូលទៅតុលាការពីការអវត្តមានរបស់លោក កឹម សុខា ។ បន្ទាប់មកតុលាការបានចោទប្រកាន់លោក កឹម សុខា ពីបទបដិសេធមិនចូលខ្លួនជាបទល្មើសជាក់ស្តែង ។
លោក កឹម សុខា នៅថ្ងៃទី៥ ខែកក្កដា បានសរសេរនៅក្នុងបណ្តាញហ្វេសប៊ុកថា ប្រជាពលរដ្ឋមកពីបណ្ដាខេត្ត បានជួបសំណេះសំណាលជាមួយខ្ញុំនៅការិយាល័យ ក្នុងទីស្នាក់ការកណ្ដាលគណបក្សសង្គ្រោះជាតិ វេលាម៉ោង១១ព្រឹកថ្ងៃទី៥ ខែកក្កដា ឆ្នាំ២០១៦ ។ លោក កឹម សុខា បានលើកឡើងថា បងប្អូនប្រជាពលរដ្ឋខ្មែរ និងសកម្មជនគណបក្សសង្គ្រោះជាតិ នៅតាមបណ្ដាខេត្តនានា បានបន្ដចូលជួបសំណេះសំណាលជាមួយខ្ញុំជាហូរហែ និងបានសម្ដែងពីការព្រួយបារម្ភអំពីសុវត្ថិភាពរបស់ខ្ញុំ តាមរយៈតំណក់ទឹកភ្នែករបស់បងប្អូនប្រជាពលរដ្ឋ ដែលបានហូរស្រក់បញ្ជាក់ពីការឈឺចាប់ឥតល្ហែ ។
លោក កឹម សុខា បានលើកឡើងទៀតថា យើងដឹងច្បាស់រួចមកហើយថា គេបានធ្វើទុក្ខបុកម្នេញមកលើអ្នកស្នេហាជាតិ និងអ្នកស្រលាញ់លទ្ធិប្រជាធិបតេយ្យជាច្រើនលើក ច្រើនសាមកហើយ ។ ខ្ញុំសូមថ្លែងអំណរគុណយ៉ាងជ្រាលជ្រៅ តបចំពោះទឹកចិត្តរបស់បងប្អូន ដែលបានព្រួយបារម្ភមកលើរូបខ្ញុំ ។
លោក កឹម សុខា បានលើកឡើងថា ប៉ុន្ដែខ្ញុំសូមឲ្យការឈឺចាប់របស់បងប្អូនប្រជាពលរដ្ឋខ្មែរ និងសកម្មជនគណបក្សសង្គ្រោះជាតិពេលនេះប្រែក្លាយមកជាកម្លាំងចិត្តក្នុងការសម្រេចបុព្វហេតុជាតិ ប្រជាពលរដ្ឋខ្មែរ និងគណបក្សសង្គ្រោះជាតិឲ្យបាន ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានឲ្យដឹងថា សំណុំរឿងរបស់លោក កឹម សុខា ប្រធានស្តីទីគណបក្សសង្គ្រោះជាតិ តុលាការមិនបិទបញ្ចប់នោះទេ ។
ការលើកឡើងរបស់អ្នកនាំពាក្យគណបក្សប្រជាជនកម្ពុជានេះ គឺបន្ទាប់ពីលោកចៅក្រម ថាន់ ឡេង ចៅក្រមស៊ើបសួរសាលាដំបូងរាជធានីភ្នំពេញ បានចេញលិខិតអំពីនីតិវិធីបិទការស៊ើបសួរ ។
លោក សុខ ឥសាន បានបញ្ជាក់នៅរសៀលថ្ងៃទី៥ ខែកក្កដាថា «តុលាការគ្រាន់តែបញ្ចប់ការស៊ើបសួរនោះទេ ។ គេហៅគាត់២ដងហើយមិនចូលនោះ តុលាការគេបន្តនីតិវិធីទៅមុខទៀត។ មិនមែនគ្រាន់តែសួរហើយបិទបញ្ចប់នោះទេ សំណុំរឿងរបស់លោក កឹម សុខា ទើបតែបានពាក់កណ្តាលផ្លូវទេ» ។
សូមរំឭកថា លោក កឹម សុខា ត្រូវបានសមត្ថកិច្ចរកចាប់ខ្លួន កាលពីថ្ងៃទី២៦ ខែឧសភា ម្តងហើយ ខណៈពេលលោកមិនបានចួលតាមការកោះអញ្ជើញរបស់តុលាការ ។ ប៉ុន្តែរហូតមកដល់ពេលនេះ មិនទាន់មានការឃាត់ខ្លួនលោកនៅឡើយទេ ។
ចាប់តាំងពីមានព្រឹត្តិការណ៍នោះមក លោក កឹម សុខា បានស្នាក់នៅក្នុងស្នាក់ការកណ្តាលគណបក្សសង្គ្រោះជាតិ ស្ថិតនៅក្នុងសង្កាត់ចាក់អង្រែលើ ខណ្ឌមានជ័យ បើគិតមកដល់ដើមខែកក្កដានេះ គឺជាងមួយខែហើយលោកមិនបានចេញទៅណាទេ ៕
ចែករំលែកព័តមាននេះ