រាជធានីភ្នំពេញ ៖ កាលពីពេលថ្មីៗនេះ សហព័ន្ធកីឡាបាល់ទាត់កម្ពុជាបានប្រកាសឱ្យដឹងថា កម្ពុជាត្រៀមធ្វើជាម្ចាស់ផ្ទះព្រឹត្តិការណ៍បាល់ទាត់AFF U16 Championship 2016 ដែលនឹងចាប់ផ្ដើមធ្វើពីថ្ងៃទី១០ ដល់ថ្ងៃទី២៣ កក្កដា ។
រាជធានីភ្នំពេញ ៖ កាលពីពេលថ្មីៗនេះ សហព័ន្ធកីឡាបាល់ទាត់កម្ពុជាបានប្រកាសឱ្យដឹងថា កម្ពុជាត្រៀមធ្វើជាម្ចាស់ផ្ទះព្រឹត្តិការណ៍បាល់ទាត់AFF U16 Championship 2016 ដែលនឹងចាប់ផ្ដើមធ្វើពីថ្ងៃទី១០ ដល់ថ្ងៃទី២៣ កក្កដា ។
ព្រឹត្តិការណ៍នេះមានបណ្ដាប្រទេសជាសមាជិកអាស៊ានចំនួន១០ចូលរួមក្នុងនោះមានប្រទេសអូស្ដ្រាលីផងដែរ ។ ការប្រកួតនេះត្រូវបានបែងចែកជា២ពូលគឺពូលA មាន៦ក្រុម និងពូលBមាន៥ក្រុមប្រកួតតាមរូបមន្តជម្រុះតាមពូលដើម្បីរកក្រុមចំនួន២ក្នុង១ពូលដែលមានពិន្ទុច្រើនជាងគេឡើងទៅប្រកួតនៅវគ្គបន្ត ។
សម្រាប់ពូលAមានមីយ៉ាន់ម៉ា, អូស្ដ្រាលី,ហ្វីលីពីន,ម៉ាឡេស៊ី, វៀតណាម និងសិង្ហបុរី រីឯពូលBមានកម្ពុជា, ថៃ, ឡាវ, ទីម័រខាងកើត និងព្រុយណេ ។
ការប្រកួតធ្វើឡើងនៅទីលាន២ គឺទីលានពហុកីឡដ្ឋានជាតិអូឡាំពិក និងទីលានបាល់ទាត់កងយោធពលខេមរភូមិន្ទ(ស្តាតចាស់) ។ នៅថ្ងៃបើកឆាកដំបូងជាការប្រកួតជម្រុះនៅក្នុងពូលAមាន៣ប្រកួត គឺក្រុមមីយ៉ាន់ម៉ា ប្រកួតជាមួយក្រុមអូស្ដ្រាលីនៅទីលានស្ដាតចាស់វេលាម៉ោង៣និង៣០នាទីរសៀល និង២ប្រកួតទៀតធ្វើនៅទីលានពហុកីឡដ្ឋានជាតិរវាងក្រុមហ្វីលីពីន ប្រកួតជាមួយក្រុមសិង្ហបុរី នៅវេលាម៉ោង៣និង៣០នាទីរសៀល ខណៈក្រុមម៉ាឡេស៊ី ជួបក្រុមវៀតណាមនៅវេលាម៉ោង៦និង៣០នាទីល្ងាច ។
នៅថ្ងៃទី១១ កក្កដា ជាការប្រកួតជម្រុះនៅក្នុងពូលBនៅលើទីលានពហុកីឡដ្ឋានជាតិអូឡាំពិករវាងក្រុមព្រុយណេ ជួបប្រកួតជាមួយក្រុមទីម័រខាងកើត នៅវេលាម៉ោង៣និង៣០នាទីរសៀល ខណៈក្រុមកម្ពុជាជួបប្រកួតជាមួយក្រុមឡាវនៅវេលាម៉ោង៦និង៣០នាទីល្ងាច ។
តាមការឱ្យដឹងពីមន្ត្រីសហព័ន្ធកីឡាបាល់ទាត់កម្ពុជាថា ក្រុមកីឡាបាល់ទាត់ជម្រើសជាតិអាយុក្រោម១៦ឆ្នាំកម្ពុជា នឹងត្រូវជួបប្រកួតជាលក្ខណៈមិត្តភាពជាមួយក្រុមបាល់ទាត់អាយុក្រោម១៦ឆ្នាំមីយ៉ាន់ម៉ានៅវេលាម៉ោង៧យប់ថ្ងៃពុធនេះ នៅលើទីលានពហុកីឡដ្ឋានជាតិអូឡាំពិក ។
ការប្រកួតនេះធ្វើឡើងដើម្បីដកស្រង់បទពិសោធន៍ពីគ្នាទៅវិញទៅមកក៏ដូចជាត្រៀមប្រកួតពានរង្វាន់AFF U-16 Championship2016 នៅថ្ងៃទី១០ កក្កដា ខាងមុខនេះ ។ សម្រាប់កម្ពុជា ក្នុងនាមជាម្ចាស់ផ្ទះ គឺជារឿងល្អបំផុតព្រោះអាចឱ្យយើងទទួលបាននូវបទពិសោធន៍ជាច្រើនបន្ថែមទៀត ទាំងការប្រកួតជាលក្ខណៈមិត្តភាព ក៏ដូចជាការប្រកួតដណ្ដើមពានរង្វាន់ AFF U-16 Championship ។ សូមបញ្ជាក់ថា ក្រុមបាល់ទាត់យុវជនអាយុក្រោម១៦ឆ្នាំកម្ពុជា គឺជាក្រុមសម្រាប់ត្រៀមប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះលើកដំបូងទៀតផង ។
ដូច្នេះសូមចូលរួមទស្សនាទាំងអស់គ្នាដើម្បីលើកទឹកចិត្តដល់ក្រុមបាល់ទាត់ជម្រើសជាតិយើង ។ រហូតមកទល់នឹងពេលនេះ គេមិនទាន់ដឹងថា សំបុត្រលក់អស់ប៉ុន្មានហើយនោះទេ ខណៈសំបុត្រកន្លែងអង្គុយមានដំបូលតម្លៃ១០.០០០រៀល និងកន្លែងគ្មានដំបូលតម្លៃតែ៥០០០រៀលប៉ុណ្ណោះ ។
ចែករំលែកព័តមាននេះ