រាជធានីភ្នំពេញ ៖ ខុសពីកីឡាការិនីភាគច្រើន ដែលទន្ទឹងរង់ចាំតែមានព្រឹត្តិការណ៍ប្រកួតទើបមានការងារ កីឡាការិនីល្បីឈ្មោះក្នុងពិភពល្បុក្កតោ នាង សម ថារ័ត្ន ត្រូវគេកត់សម្គាល់ថា ទទួលបានទីផ្សារថតភាពយន្តបណ្ដាក់គ្នា
រាជធានីភ្នំពេញ ៖ ខុសពីកីឡាការិនីភាគច្រើន ដែលទន្ទឹងរង់ចាំតែមានព្រឹត្តិការណ៍ប្រកួតទើបមានការងារ កីឡាការិនីល្បីឈ្មោះក្នុងពិភពល្បុក្កតោ នាង សម ថារ័ត្ន ត្រូវគេកត់សម្គាល់ថា ទទួលបានទីផ្សារថតភាពយន្តបណ្ដាក់គ្នាមិនខុសពីតារាសម្ដែងម្នាក់នោះទេ ។ នាងត្រូវគេមើលឃើញថា លេចធ្លោកាន់តែខ្លាំងនៅក្នុងវិស័យភាពយន្ត ជាពិសេសភាពយន្តបែបវ៉ៃតប់ដែលត្រូវផលិតករងាយមកផលិតច្រើន ។
មិនទាន់ថតចប់រឿង«ឃុនហ្លួងព្រះស្ដេចកន»បានស្រួលបួលផង កីឡាការិនី សម ថារ័ត្ន បានទទួលតំណែងថ្មីមួយទៀតក្នុងរឿង «លត់ដែកថែប»បាត់ទៅហើយ ដោយក្នុងរឿងថ្មីនេះ គេឃើញនាងសម្ដែងជាតួអង្គធំនៅក្នុងសាច់រឿង ក្នុងពេលដែលតារាសម្ដែងអាជីពភាគច្រើនបានតំណែងត្រឹមតែជាតួរាយរង ។ នេះគឺជាការវិវឌ្ឍមួយថ្មីដែល សម ថារ័ត្ន ទទួលបានផ្លែផ្កាកាន់តែប្រសើរ ចាប់តាំងពីនាងមានឱកាសបានសម្ដែងក្នុងរឿងបន្ដបន្ទាប់គ្នានាពេលចុងក្រោយ ។ កាលពីលើកមុន កីឡាការិនីរូបនេះបង្កើតការភ្ញាក់ផ្អើលរួចមកហើយតាមរយៈការសម្ដែងក្នុងរឿងរបស់តារាហូលីវូដ ក្រោមចំណងជើងថា«មុនដំបូងគេសម្លាប់ឪពុកខ្ញុំ»ដែលជារឿងបោះទុនរាប់លានដុល្លាររបស់ក្រុមផលិតករហូលីវូដ ចុះមកថតនៅកម្ពុជា ។
មិនយូរប៉ុន្មាននាងក៏បានលេចធ្លោក្នុងតំណែងជាតួសម្ដែងក្នុងរឿង«ឃុនហ្លួងព្រះស្ដេចកន» ដែលជារឿងបោះទុនរហូតដល់១លានដុល្លាររបស់ក្រុមហ៊ុនលីយ៉ុងផាត់ទៀត ទើបធ្វើឱ្យកីឡាការិនីដែលធ្លាប់តែបង្ហាញក្បាច់គុននៅលើវេទិកាល្បុក្កតោរូបនេះ ទទួលបានការចាប់អារម្មណ៍ខ្លាំង ។ ម្នាក់ៗបានទាំងហៅនាងថា ជាតារាភាពយន្តមួយរូបដោយសារតែបានសម្ដែងក្នុងរឿងបន្តបន្ទាប់ខុសពីកីឡាករ និងកីឡាការិនីរួមអាជីពនោះផង ។ អ៊ីចឹងហើយ ទើបក្នុងពេលខ្លះ គេច្រើនស្គាល់នាងថា ជាតារាភាពយន្តច្រើនជាងកីឡាការិនី ជាពិសេសអ្នកដែលបានប្រទះនឹងព័ត៌មានហូរហែរបស់នាង នាពេលកន្លងមក ។
សម ថារ័ត្ន បានអះអាងថា ក្រោយបញ្ចប់ការងារថតរឿង«មុនដំបូងគេសម្លាប់ឪពុកខ្ញុំ» និងរឿង «ឃុនហ្លួងព្រះស្ដេចកន» រូបនាងពិតជាបានទទួលនូវការចាប់អារម្មណ៍ពីក្រុមផលិតករច្រើនជាងមុនប្រាកដមែន ។ ជាក់ស្ដែងកាលពីដើមសប្ដាហ៍ នាងក៏ទទួលបានកុងត្រាទទួលសម្ដែងក្នុងរឿង «លត់ដែកថែប» ដែលជារឿងវាយតប់ និងរឿង «អ្នកលេងទីក្រុង» ដែលនឹងចេញថតនៅអំឡុងខែកក្កដានេះផងដែរ។ នាងបង្ហាញអារម្មណ៍សប្បាយចិត្តយ៉ាងខ្លាំងបន្ទាប់ពីការងាររត់មករកក្នុងពេលដែលការបង្ហាញសមត្ថភាពរបស់នាងសម្រាប់អាជីពជាអ្នកជំនាញខាងល្បុក្កតោស្ងប់ស្ងាត់ជាងមុន ។ នាងថា ក្នុងរឿង «ឃុនហ្លួងព្រះស្ដេចកន» នាងសម្ដែងជាតួអង្គមេទ័ពម្នាក់ ហើយ២រឿងដែលបានសម្ដែងចុងក្រោយ គឺត្រូវបានផលិតករផ្ដល់ឱកាសឱ្យសម្ដែងជាតួអង្គលេចធ្លោជាងមុន បើធៀបនឹងការសម្ដែងកន្លងមកដែលបានត្រឹមសម្ដែងជាតួរាយរងនោះ ។ នាងយល់ថា ខ្សែរឿងទាំង៤ចុងក្រោយពេលចាក់បញ្ចាំង គឺនឹងធ្វើឱ្យនាងលេចធ្លោ ជាពិសេសគឺរឿងរបស់ហូលីវូដ ដែលដឹកនាំដោយអ្នកនាង អេនជេលីណា ជូលី និងរឿង «ឃុនហ្លួងព្រះស្ដេចកន» ដែលជារឿងប្រវត្តិសាស្ត្រដ៏ធំរបស់កម្ពុជា ។
ក្នុងនោះខ្សែរឿង«លត់ដែកថែប» ដែលសម្ដែងដោយតារាជើងចាស់រួមមាន លោកចៅ ចាន់ណារី ជាដើម ក៏ធ្វើឱ្យនាងរំពឹងខ្ពស់ដែរថា នឹងជួយឱ្យកេរ្តិ៍ឈ្មោះរបស់នាងត្រដែតឡើងសម្រាប់វិស័យភាពយន្ត ។
សម ថារ័ត្ន បញ្ជាក់ថា បើទោះជាការសម្ដែងរឿងបានផ្ដល់ឱ្យនាងនូវមុខមាត់ថ្មី ក៏នាងមិនចោលអាជីពកីឡាដែលបានប្រឹងប្រែងនោះដែរ គឺនៅតែតស៊ូ និងប្រឡូកអាជីពជាអ្នកស្នងល្បុក្កតោមិនចោលនោះទេ ដោយសារតែកីឡាមួយនេះ ទើបធ្វើឱ្យនាងបានបោះជំហានក្លាយជាតារាសម្ដែងមួយរូប ។ ម្យ៉ាង មកពីកីឡាល្បុក្កតោកម្ពុជាក៏បានត្រៀមដាក់បញ្ចូលជាសម្បត្តិបេកតិភ័ណ្ឌរបស់អង្គការយូនីស្កូនោះផង ទើបជារឿងដែលនាងក្នុងនាមជាកីឡាការិនីចំណាស់ម្នាក់ មានតែរួមដៃគ្នាជាមួយនឹងគ្រូជើងចាស់ ដើម្បីអភិរក្សល្បុក្កតោឱ្យកាន់តែមានការគាំទ្រ ។
យោងតាមសហព័ន្ធមួយនេះបានអះអាងថា កីឡាល្បុក្កតោនឹងត្រូវដាក់បញ្ចូលជាមុខវិជ្ជាកីឡាដើម្បីឱ្យសិស្សសាលាមួយចំនួនហ្វឹកហាត់ដូចគ្នានឹងកីឡាយុទ្ធក្រមខម ទើបជារឿងប្រសើរបំផុតដែលកីឡាករកីឡាការិនីល្អរួមមាន សម ថារ័ត្ន ជាដើម នឹងក្លាយជាគ្រូ និងក្លាយជាធនធានសំខាន់មួយដែលត្រូវតែយកចិត្តទុកដាក់។ អ៊ីចឹងហើយទើបកីឡាការិនីរូបនេះ ប្រកាន់ជំហរមិនចោលអាជីពកីឡារបស់ខ្លួននោះទេ បើទោះជានាងត្រូវគេមើលឃើញថា ចាប់ផ្ដើមលេចធ្លោនៅក្នុងអាជីពសម្ដែងខុសប្លែកពីមុន ។ មានការកត់សម្គាល់ថា សម ថារ័ត្ន នឹងទទួលបានការសរសើរក្នុងនាមជាតារាសម្ដែងម្នាក់ នៅពេលខ្សែរឿងបន្តបន្ទាប់ដែលនាងសម្ងំថត ត្រូវបានដាក់បញ្ចាំងជាផ្លូវការក្នុងពេលដ៏ខ្លីខាងមុខនេះ ៕
ចែករំលែកព័តមាននេះ