រាជធានីភ្នំពេញ ៖ បើទោះបីមានការខាតបង់ថវិកាប្រមាណ១០ម៉ឺនដុល្លាជារៀងរាល់ខែសម្រាប់ការចំណាយទៅលើសេវាខ្សែរថយន្តក្រុងសម្រាប់ដឹកអ្នកដំណើរសាធារណៈក្តី តែរដ្ឋបាលរាជធានីភ្នំពេញមិនរាថយឡើយ សំខាន់ផលចំណេញបានទៅលើប្រជាពលរដ្ឋ ហើយជាទិសដៅបន្ត រដ្ឋាករស្វយ័តដឹកជញ្ជូនសាធារណៈរថយន្តក្រុង នៅតែបន្ត និងជុំរុញការពង្រីកខ្សែរត់បន្ថែមឲ្យបានច្រើននៅឆ្នាំ២០១៨នឹងបន្ថែមឲ្យបានស្ទើរតែពាសពេញរាជធានីភ្នំពេញនៅឆ្នាំ២០២០ខាងមុខ ។ នេះបើតាមការអះអាងពីមន្ត្រីរដ្ឋបាលរាជធានីភ្នំពេញ ។
លោក អ៊ាន សុឃីម អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង របស់រដ្ឋបាលរាជធានីភ្នំពេញបានឲ្យដឹងថា បច្ចុប្បន្នរដ្ឋាករស្វយ័តដឹកជញ្ជូនសាធារណៈរថយន្តក្រុង មានរថយន្តក្រុង បម្រើសាធារណៈចំនួន៥៧គ្រឿង សម្រាប់ខ្សែរត់ចំនួន៣ ក្នុងនោះរថយន្ត៣៤គ្រឿងបានដំណើរការរាល់ថ្ងៃ និង១៤ទៀតគ្រឿងសម្រាប់ត្រៀមបម្រុង ។ លោកបន្តថា ក្នុងរយៈពេលកន្លងមកនេះមានប្រជាពលរដ្ឋប្រមាណក្នុងចន្លោះពី៦៥០០នាក់ទៅ៧០០០នាក់ ក្នុងមួយថ្ងៃបានជិះរថយន្តនេះ ហើយអ្នកដែលជិះមិនបង់ថ្លៃ មានដូចជា កូនសិស្ស ចាស់ជរា និងជនពិការប្រមាណ៤០% ជារៀងរាល់ថ្ងៃ បើគិតពីចំណូល និងការចំណាយវិញ រដ្ឋបាលរាជធានីមានការខាតបង់ជារៀងរាល់ខែ គឺការចំណាយទៅលើប្រាក់ខែបុគ្គលិក ការចំណាយហ្គាស និងការងារជួសជុលច្រើនជាងចំណូលតែម្តង ហេតុនេះរដ្ឋត្រូវបំពេញបន្ថែម។
លោក អ៊ាន សុឃីម បានឲ្យដឹងទៀតថា ទោះបីរដ្ឋមានការខាតបង់ជារៀងរាល់ខែក្តី តែរដ្ឋបាលរាជធានីភ្នំពេញ នៅតែខិតខំពង្រីកបន្ថែមខ្សែរត់ឲ្យបានច្រើនទៀត ក្នុងនោះតាមរយៈជំនួយរបស់អង្គការចាយការប្រទេសជប៉ុន ដែលគ្រោងផ្តល់ជំនួយឧបត្ថមរថយន្តក្រុងចំនួន១៨០គ្រឿងបន្ថែមទៀត គឺនៅឆ្នាំ២០១៨ គ្រោងផ្តល់ចំនួន៩០គ្រឿង ឆ្នាំ២០២០ចំនួន៥០គ្រឿង និងសល់៤០គ្រឿងកំពុងពិចារណា។ លោកបញ្ជាក់ថា មូលហេតុដែលចំនួនអ្នកជិះមិនមានការកើនឡើងដោយសារ រដ្ឋាករស្វយ័តដឹកជញ្ជូនសាធារណៈរថយន្តក្រុងមានខ្សែរត់តែ៣ខ្សែមិនបានទៅដល់គោលដៅដែលគាត់ចង់បាន ហេតុនេះហើយរដ្ឋបាលរាជធានីភ្នំពេញ បាន និងកំពុងត្រៀមពង្រីកឲ្យបានច្រើនខ្សែ ឬទូទាំងរាជធានីភ្នំពេញតែម្តង ទើបមានអ្នកជិះច្រើន។
គួររំលឹកថា កាលពីពេលកន្លងមកលោក ប៉ា សុជាតិវង្ស អភិបាលរាជធានីភ្នំពេញបានលើកឡើងថា នៅពេលឆាប់ៗខាងមុខនេះ រដ្ឋបាលរាជធានីភ្នំពេញ មានគម្រោងពង្រីកសេវាកម្មខ្សែរថយន្តដឹកជញ្ជូនសាធារណៈរបស់ក្រុងឲ្យទៅដល់គ្រប់បណ្តាខេត្តក្រុងនៅទូទាំងប្រទេស ទោះបីពេលនេះសេវាខ្សែរថយន្តក្រុងសាធារណៈនៅភ្នំពេញមានការខាតជារៀងរាល់ខែក្តី គឺនៅតែមានជំហរមិនរាថយឡើយ ការពង្រីកសេវាបែបនេះ ដើម្បីយកសេវាពីខេត្តទៅចិញ្ចឹមសេវាដឹកជញ្ជូននៅក្នុងក្រុងផងដែរ ហើយអាជ្ញាធរភ្នំពេញនៅតែអនុគ្រោះមិនតម្រូវឲ្យយកប្រាក់ទៅលើប្រជាពលរដ្ឋចំនួន៤ប្រភេទគឺទី១.សិស្ស ទី២.ព្រះសង្ឃ ទី៣.ចាស់ជរា និងទី៤.ជនពិការ ដដែល ។ សូមបញ្ជាក់ថា ចំពោះខ្សែរថយន្តក្រុងសម្រាប់ដឹកអ្នកដំណើរសាធារណៈ នៅរាជធានីភ្នំពេញទាំង៣ខ្សែនោះមាន ១.ខ្សែរត់ទី១ចាប់ផ្តើមនៅថ្ងៃទី០១ ខែកញ្ញា ឆ្នាំ២០១៤ ពីម៉ោង៥ និង៣០នាទី ដល់ម៉ោង២០ និង៣០នាទី ដោយចេញដំណើរពីចំណត គីឡូម៉ែត្រលេខ៩ឬស្សីកែវ តាមផ្លូវជាតិលេខ៥ រង្វង់មូលស្តាតចាស់ មហាវិថីព្រះមុនីវង្ស ស្ពានព្រះមុនីវង្ស ឆ្ពោះទៅផ្លូវជាតិលេខ១ រហូតដល់ចំណតបឹងឈូក រួចត្រឡប់មកវិញ ហើយខ្សែទី១នេះ មានចំណត៦៧កន្លែង។
២.ខ្សែទី២ ចាប់ផ្តើមនៅថ្ងៃទី០៧ ខែកញ្ញា ឆ្នាំ២០១៤ ពីម៉ោង៥ និង៣០នាទី ដល់ម៉ោង២០ និង៣០នាទី ដោយចេញដំណើរពីចំណតផ្សាររាត្រី វិថីព្រះស៊ីសុវត្ថិ ស្ពានជ្រោយចង្វារ រង្វង់មូលស្តាតចាស់ ផ្លូវលេខ៧០ ផ្លូវ២៧៣ អង់តែនទួលគោក មហាវិថីគីមអ៊ីលស៊ុង មហាវិថីម៉ៅសេទុង ភ្លើងស្តុបបូគោ មហាវិថីព្រះមុនីវង្សឆ្ពោះទៅផ្លូវជាតិលេខ២ រហូតដល់រង្វង់មូលតាខ្មៅ រួចត្រឡប់មកវិញ ខ្សែនេះមានចំណតចំនួន៦៨កន្លែង និង ៣.ខ្សែទី៣ ចាប់ផ្តើមនៅថ្ងៃទី១៥ ខែកញ្ញា ឆ្នាំ២០១៤ ពីម៉ោង៥ និង៣០នាទី ដល់ម៉ោង២០ និង៣០នាទី ដោយចេញដំណើរពីចំណតផ្សាររាត្រី ផ្លូវលេខ១០៦ តិរិថីព្រះនរោត្តម ផ្លូវលេខ១៣០ ផ្សារធំថ្មី វិថីកម្ពុជាក្រោម ក្រោមស្ពានអាកាស៧មករា មហាវិថីសហពន្ធ័រុស្ស៊ី ព្រលានយន្តហោះអន្តរជាតិភ្នំពេញ រហូតដល់ចោមចៅ រួចត្រឡប់មកវិញ ដែលខ្សែទី៣នេះ មានចំណតចំនួន៤៩កន្លែងផងដែរ៕
ចែករំលែកព័តមាននេះ