រាជធានីភ្នំពេញ ៖ រដ្ឋមន្ត្រីការបរទេសវៀតណាម បានអរគុណដល់កម្ពុជាក្នុងការបើកដំណើរការជើងហោះហើរឡើងវិញ និងជំរុញការទទួលស្គាល់ប៉ាស្ព័រវ៉ាក់សាំង ។ យោងតាមបណ្តាញសង្គមហ្វេសប៊ុក សម្តេចតេជោ បានលើកឡើងថា ក្នុងជំនួបពិភាក្សាការងារជាមួយសម្ដេចអគ្គមហាសេនាបតីតេជោ…
រាជធានីភ្នំពេញ ៖ រដ្ឋមន្ត្រីការបរទេសវៀតណាម បានអរគុណដល់កម្ពុជាក្នុងការបើកដំណើរការជើងហោះហើរឡើងវិញ និងជំរុញការទទួលស្គាល់ប៉ាស្ព័រវ៉ាក់សាំង ។
យោងតាមបណ្តាញសង្គមហ្វេសប៊ុក សម្តេចតេជោ បានលើកឡើងថា ក្នុងជំនួបពិភាក្សាការងារជាមួយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី២០ មករានេះនៅវិមានសន្តិភាព លោក ប៊ូយ ថាញ់សឺន (Bùi Thanh Sơn) រដ្ឋមន្ត្រីការបរទេសនៃសាធារណរដ្ឋសង្គមនិយមវៀតណាម បានថ្លែងអំណរគុណសម្តេចតេជោ ក្នុងការជំរុញឲ្យបើកឡើងវិញនៃជើងយន្តហោះដោយផ្ទាល់រវាងកម្ពុជា និងវៀតណាមដែលបានដំណើរការទៅថ្មីៗនេះ ធ្វើឲ្យដំណើរការកាន់តែងាយស្រួលជាងមុន ជាពិសេសទៀតនោះ ការជំរុញឲ្យមានការទទួលស្គាល់នៃលិខិតឆ្លង ដែលហៅថា ប៉ាស្ព័រវ៉ាក់សាំងនោះ ។
លោកថា បច្ចុប្បន្ន កំណើនពាណិជ្ជកម្មប្រទេសទាំងពីរមានកើនឡើងយ៉ាងខ្ពស់រហូតដល់ដប់ជិត១០ពាន់លាន បើប្រៀបធៀបទៅឆ្នាំមុន ។ ដូច្នេះ លោកសង្ឃឹមថា វៀតណាម-កម្ពុជានឹងបន្តពង្រឹងនៃការតភ្ជាប់សេដ្ឋកិច្ច និងបន្តធ្វើការជាមួយគ្នាធ្វើយ៉ាងណាឱ្យឆ្នាំនេះកំណើនសេដ្ឋកិច្ចមានការឡើងជាបន្តទៀត ជាពិសេសការជំរុញកិច្ចសហការលើគ្រប់វិស័យដូចជា វិស័យកសិកម្ម វិស័យឧស្សាហកម្ម និងវិស័យផ្សេងផ្សេងទៀត ។
លោកបានកោតសរសើរ និងស្ញប់ស្ញែងចំពោះការប្រែប្រួលក៏ដូចជាការអភិវឌ្ឍក្នុងរយៈពេលខ្លី និងការរីកចម្រើននៅប្រទេសកម្ពុជាក្រោមការដឹកនាំដ៏ឈ្លាសវៃរបស់សម្តេចតេជោ នាយករដ្ឋមន្ត្រីដែលមានការរីកចម្រើន ស្ទើរលើគ្រប់វិស័យ ។
លោកថា បច្ចុប្បន្នកម្ពុជានៅតែបន្តរីកលូតលាស់ទៅមុខ ជាពិសេសការពង្រឹងតួនាទីរបស់ខ្លួន និងកិត្តិនាមរបស់កម្ពុជា នៅក្នុងតំបន់ក៏ដូចជា អន្តរជាតិផងដែរ ។ ឯកឧត្តមបានមានប្រសាសន៍ថា ឯកឧត្តមបានមើលឃើញពីការរីកចម្រើនរបស់កម្ពុជា ។
ជាមួយគ្នានោះដែរ លោកក៏បានជូនពរចំពោះការបោះឆ្នោតនៅកម្ពុជានៅពេលខាងមុខជាពិសេសការបោះឆ្នោតក្រុមប្រឹក្សាឃុំសង្កាត់នៅខែមិថុនា ឆ្នាំ២០២២ ខាងមុខ ។ លោកថា វៀតណាមគាំទ្រចំពោះកម្ពុជាដែលធ្វើប្រធានអាស៊ាន នៅឆ្នាំ២០២២នេះ ។
លោកក៏បានលើកឡើងថា ទំនាក់ទំនងទ្វេភាគីរវាងប្រទេសទាំងពីរនៅមានទំនាក់ទងល្អប្រសើរ ជាពិសេសតាមរយៈការទស្សនកិច្ចនៃការដឹកនាំកំពូលនៃប្រទេសទាំងពីរនាពេលកន្លងមកដែលបានធ្វើឲ្យចំណងមិត្តភាពរវាងកម្ពុជា និងវៀតណាមកាន់តែមានភាពល្អប្រសើរឡើង ។ លោកបានបន្ថែមទៀតថាឆ្នាំនេះជាខួបលើកទី៥៥នៃទំនាក់ទំនងការទូតរវាងប្រទេសទាំងពីរ ៕
ចែករំលែកព័តមាននេះ