រាជធានីភ្នំពេញ ៖ ធនាគារពិភពលោក World Bank បានអនុម័តហិរញ្ញប្បទានចំនួន ៦៩,២៥ លានដុល្លារ ដើម្បីជួយវិស័យអប់រំនៅកម្ពុជាធ្វើឱ្យកាន់តែប្រសើរ ប្រកបដោយសមធម៌ឆ្លើយតបឱ្យបានរហ័សទៅនឹង វិបត្តិនានា ដូចជាករណីកូវីដ ១៩ នេះជាដើម ។ កញ្ចប់ថវិកាជាកម្ចី និងជំនួយជិត ៧០ លានដុល្លារនេះ នឹងអនុវត្តលើសកម្មភាពធំៗចំនួន ៣ ។ ក្នុងការនោះ មានការអនុវត្តកម្មវិធីគ្រប់គ្រងនៅតាមសាលារៀន, ការផ្តល់ការអភិវឌ្ឍសមត្ថភាពរបស់គ្រូបង្រៀន ថ្នាក់ដឹកនាំសាលា គ្រូបណ្តុះបណ្តាល និងបុគ្គលិកសិក្សា, និងការកែលម្អបរិយាកាសរៀនឱ្យប្រសើរឡើងថែមទៀត ។
តាមរយៈគម្រោងនេះ មានការសាងសង់ និងស្តារជួសជុលឡើងវិញនូវអគារសិក្សា, មន្ទីរពិសោធន៍វិទ្យាសាស្ត្រ, ស្ថាប័នបណ្តុះបណ្តាលគ្រូ និងសាលាអប់រំពិសេស ហើយនឹងទិញគ្រឿងបរិក្ខារបច្ចេកវិទ្យាសម្រាប់ការអប់រំ និងការជួយដល់សិស្សមានពិការភាព ផងដែរ ។ ក្រៅពីនេះ គម្រោងនៅមានការសាកល្បងកម្មវិធីអប់រំបច្ចេកវិទ្យាមួយ (EdTech) សម្រាប់មុខវិជ្ជាគណិតសាស្ត្រ ។
សេចក្តីប្រកាសព័ត៌មានរបស់ធនាគារពិភពលោកបានបញ្ជាក់ថា កញ្ចប់មូលនិធិចំនួន ៦៩,២៥ លានដុល្លារអាម៉េរិក នៅក្នុងចំណោមថវិកាទាំងនេះ មាន ៦០ លានដុល្លារ ដែលធនាគារពិភពលោក ផ្តល់ជាឥណទាន (កម្ចី) តាមរយៈសមាគមអភិវឌ្ឍន៍អន្តរជាតិ (International Development Association/ IDA) និង ៩,២៥ លានដុល្លារទៀត ជាជំនួយឥតសំណងពីអង្គការភាពជាដៃគូសាកលដើម្បីការអប់រំ ។
ហិរញ្ញប្បទានទាំងនេះនឹងជួយទ្រទ្រង់ដល់គម្រោងកែលម្អការអប់រំទូទៅ (General Education Improvement Project/GEIP) ក្នុងរយៈពេលប្រាំឆ្នាំ ដើម្បីជួយកម្ពុជាឱ្យសម្រេចនូវចក្ខុវិស័យនៃផែនការយុទ្ធសាស្ត្រនៃការអប់រំឆ្នាំ ២០១៩-២០២៣ (Education Strategic Plan/ESP 2019-2023) ។ នេះបើតាមសេចក្តីប្រកាសព័ត៌មានកាលពីថ្ងៃទី ១៨ ខែមករា ឆ្នាំ ២០២២ ។
លោកស្រី ម៉ារីយ៉ាម សាលីម (Maryam Salim) ប្រធានគ្រប់គ្រងនៃធនាគារពិភពលោកប្រចាំកម្ពុជា បានគូសបញ្ជាក់ថា មានបញ្ហាមួយចំនួនកើតឡើងដែលពាក់ព័ន្ធទៅនឹងលទ្ធភាពទទួលបានការអប់រំប្រកបដោយសមធម៌ ជាពិសេសសម្រាប់កុមារច្រើនក្រុម ដូចជា កុមាររស់នៅតាមតំបន់ដាច់ស្រយាល កុមារក្នុងគ្រួសារក្រីក្រ ឬក្នុងបណ្តាសហគមន៍ជនជាតិដើមភាគតិច និងកុមារមានពិការភាព ជាដើម ។
ទោះយ៉ាងណាលោកស្រីថា កម្ពុជាពិតជាបានសម្រេចសមិទ្ធផលធំៗជាច្រើន ក្នុងការពង្រីកលទ្ធភាពទទួលបានការអប់រំ ។ យើងសង្ឃឹមយ៉ាងមុតមាំថា គម្រោងនេះនឹងរកដំណោះស្រាយដល់បញ្ហាប្រឈមទាំងនេះ និងស្តារការអប់រំឱ្យកាន់តែមានភាពប្រសើរឡើងវិញថែមទៀត ៕
ចែករំលែកព័តមាននេះ