កាលពីពេល ថ្មីៗកន្លងមកក្រុមអ្នកស្រាវជ្រាវជនជាតិចិនបានដាក់បង្ហាញស្នាដៃរបស់ខ្លួន គឺមនុស្សយន្តស្រីមានឈ្មោះថា Jia Jia ក្នុងព្រឹត្តិការណ៍ Summer Davos Forum ២០១៦ នៅ Tianjin ដែលជាក្រុងកំពង់ផែដ៏ធំមួយ ។ មនុស្សយន្តស្រីនេះអាចរុករក ផ្លាស់ប្តូរទីតាំង និងស្គាល់មនុស្សតាមរយៈបច្ចេកវិទ្យាអីុនធើរណេត ។
«សួស្តីអ្នកគ្រប់គ្នា ! ខ្ញុំឈ្មោះ Jia Jia » គឺជាសម្តីរបស់មនុស្សយន្ត Jia Jia ហើយនាងត្រូវគេដាក់នៅឈរនៅក្បែរច្រកចូលសាលតាំងពិព័រណ៍ក្នុងព្រឹត្តិការណ៍ Summer Davos Forum ២០១៦ ហើយបានស្វាគមន៍ភ្ញៀវចូលរួមទាំងអស់ពីគ្រប់ទីតំបន់ ។ ដោយឡែកមនុស្សម្នាមានការភ្ញាក់ផ្អើលចំពោះរូបរាងដូចមនុស្សស្រីពិត ប៉ុន្តែសមត្ថភាពពិសេសរបស់មនុស្សយន្តហោះហួសពីការគិតទៅទៀត ។ Jia Jia ត្រូវអ្នកគាំទ្រលើ Online ហៅថា «មនុស្សយន្តទេពអប្សរ» ព្រោះសម្រស់របស់នាងមិនចាញ់នារីក្រមុំទេ ។ មនុស្សយន្ត Jia Jia ត្រូវគេតុបតែងយ៉ាងសមរម្យ ពោលគឺស្លៀកពាក់ឈុតប្រពៃណីចិនបែបស្រគត់ស្រគំហើយបានទាក់ទាញទស្សនិកជនរាប់រយនាក់ផងដែរ ។
ចំណាយពេលដល់ទៅ៣ឆ្នាំក្នុងការបង្កើតមនុស្សយន្តស្រី Jia Jia នេះឡើង ។ មនុស្សយន្តនេះមានចលនាភ្នែកធម្មជាតិ ការនិយាយ កាយវិការ និងរូបរាងទាំងមូលជាការបង្កើតឡើងយ៉ាងសម្រិតសម្រាំង ។
Jia Jia គឺជាការបង្កើតរបស់វិស្វករ Chen Xiaoping និងសហការីរបស់លោកនៅសាកលវិទ្យាល័យវិទ្យាសាស្ត្រ និងបច្ចេកវិទ្យារបស់ប្រទេសចិន ។ ខួរក្បាលរបស់មនុស្សយន្តស្រីនេះ គឺជាកន្លែងផ្ទុកទិន្នន័យសម្បើមដែលអាចភ្ជាប់ជាមួយកម្មវិធីកុំព្យូទ័របាន ។ នាងអាចសន្ទនាជាមួយដៃគូបាន ហើយឆ្លើយតបមិនដល់១វិនាទីទេ ។ ក្រៅពីនេះនាងអាចកត់ចំណាំទឹកមុខមនុស្សបានទៀតផង ។ ក្រុមបង្កើតមនុស្សយន្ត Jia Jia ឱ្យដឹងថា «យើងមិនទាន់ពិចារណាលើការផលិតជាទ្រង់ទ្រាយធំនៅឡើយទេ » ។
យោងតាមរបាយកាណ៍ឱ្យដឹងថា ជនជាតិចិនកំពុងចាប់អារម្មណ៍ខ្លាំងលើបច្ចេកវិទ្យាមនុស្សយន្ត ខណៈប្រទេសចិនមានចំនួនច្រើនជាង២៥% ឧស្សាកម្មមនុស្សយន្តរបស់ពិភពលោកក្នុងឆ្នាំ ២០១៥ ។ ពោលគឺមនុស្សយន្តប្រមាណជា៦២.០០០ ក្នុងចំណោមមនុស្សយន្ត ២៤៨.០០០ គ្រឿងត្រូវបានលក់ទៅកាន់ពិភពលោកកាលពីឆ្នាំមុនផងដែរ៕
ចែករំលែកព័តមាននេះ