រាជធានភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈបានជំរុញដល់ភាគីពាក់ព័ន្ធត្រូវតែយកចិត្តទុកដាក់ទៅលើវិស័យសន្តិសុខសង្គម និងបន្តជំរុញការអភិវឌ្ឍរបបសន្តិសុខសង្គម ដល់កម្មករនិយោជិត និងមន្ត្រីសាធារណៈ។ អតីតមន្ត្រីរាជការ និងអតីតយុទ្ធជន ដោយបន្តការពង្រឹង…
រាជធានភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈបានជំរុញដល់ភាគីពាក់ព័ន្ធត្រូវតែយកចិត្តទុកដាក់ទៅលើវិស័យសន្តិសុខសង្គម និងបន្តជំរុញការអភិវឌ្ឍរបបសន្តិសុខសង្គម ដល់កម្មករនិយោជិត និងមន្ត្រីសាធារណៈ។
អតីតមន្ត្រីរាជការ និងអតីតយុទ្ធជន ដោយបន្តការពង្រឹង និងពង្រីកការអនុវត្តរបបសន្តិសុខសង្គមផ្នែកហានិភ័យការងារ ការបន្តពង្រឹង និងពង្រីកការអនុវត្តរបបសន្តិសុខសង្គមផ្នែកថែទាំសុខភាព ការជំរុញការរៀបចំ និងដាក់ឲ្យដំណើរការរបបប្រាក់សោធន និងការពង្រឹងការអនុវត្តរបបសន្តិសុខសង្គមលើវិស័យសេដ្ឋកិច្ចក្រៅប្រព័ន្ធ ។
នេះបើតាមការលើកឡើងរបស់ លោក វេជ្ជបណ្ឌិត ស៊ុំ សោភ័ណ រដ្ឋលេខាធិការ ដែលជាអធិបតីក្នុងពិធីបើកសាលាពិគ្រោះយោបល់ស្តីពី«បញ្ហាប្រឈមនៃគ្រោះថ្នាក់ការងារ និងវិសាលភាពបេឡាជាតិសន្តិសុខសង្គម សម្រាប់កម្មករនិយោជិតក្នុងវិស័យសំណង់» ដែលរៀបចំឡើង នាព្រឹកថ្ងៃទី១៩ ខែមករា ឆ្នាំ២០២២ នៅសណ្ឋាគារ សាន់វ៉េ រាជធានីភ្នំពេញ ។
លើកឡើងក្នុងពិធីនេះ មានការចូលរួមភាគីពាក់ព័ន្ធមួយចំនួនក្នុងនោះមានអង្គការអន្តរជាតិខាងការងារ (ILO) , សមាគមអ្នកសាងសង់កម្ពុជា (CCA), សហព័ន្ធវិស័យសំណង់អន្តរជាតិ (BWI) និងសហព័ន្ធសហជីពកម្មករសំណង់ និងព្រៃឈើកម្ពុជា (BWTUC) លោករដ្ឋលេខាលើកឡើងថា សិក្ខាសាលាមានគោលបំណង ១.សំខាន់ គឺជំរុញឲ្យភាគីពាក់ព័ន្ធពង្រឹងការអនុវត្តស្តង់ដារសុខភាព និងសុវត្ថិភាពនៅកន្លែងការងារឲ្យមានប្រសិទ្ធភាព ដើម្បីកាត់បន្ថយអត្រាគ្រោះថ្នាក់នៅកន្លែងការងារ, ២.ពង្រីកវិសាលភាពបេទ្បាជាតិសន្តិសុខសង្គម (ប.ស.ស) គ្របដណ្តប់ឲ្យបានពេញលេញសម្រាប់វិស័យសំណង់នៅថ្ងៃអនាគតដ៏ខ្លីខាងមុខ, ៣.ស្វែងរក និងកំណត់នូវបញ្ហាប្រឈមជាអទិភាព និងសុំកិច្ចសហការ ដើម្បីជំរុញឲ្យការអនុវត្តមានប្រសិទ្ធភាពក្នុងការលើកកម្ពស់សុវត្ថិភាពការងារសម្រាប់កម្មករនិយោជិតក្នុងវិស័យសំណង់, ៤. ផ្សព្វផ្សាយពីផលប៉ះពាល់នៃសារធាតុអាសបេស្តូសឲ្យបានទូលំទូលាយ និងបញ្ឈប់ការប្រើប្រាស់សារធាតុអាសបេស្តូសនៅពេលអនាគត និង ៥. បង្កើនទំនាក់ទំនងវិជ្ជាជីវៈ និងកិច្ចសហប្រត្តិបត្តិការក្នុងគោលបំណងជំរុញក្របខ័ណ្ឌគោលនយោបាយជាតិ សម្រាប់ការលើកកម្ពស់លក្ខខណ្ឌការងារ សម្រាប់កម្មករនិយោជិតនៅក្នុងវិស័យសំណង់ឲ្យមានភាពល្អប្រសើរទ្បើង។
លោក រដ្ឋលេខាធិការ ក្រសួងការងារបានថ្លែងថា ផ្អែកតាមផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈឆ្នាំ ២០១៩-២០២៣ ក្រសួងកំពុងបន្តជំរុញការផ្តោតការយកចិត្តទុកដាក់បន្តទៀត ទៅលើវិស័យសន្តិសុខសង្គម និងបន្តជំរុញការអភិវឌ្ឍរបបសន្តិសុខសង្គមដល់កម្មករនិយោជិត និងមន្ត្រីសាធារណៈ អតីតមន្ត្រីរាជការ និងអតីតយុទ្ធជន ដោយបន្តការពង្រឹង និងពង្រីកការអនុវត្តរបបសន្តិសុខសង្គមផ្នែកហានិភ័យការងារ ការបន្តពង្រឹង និងពង្រីកការអនុវត្តរបបសន្តិសុខសង្គមផ្នែកថែទាំសុខភាព ការជំរុញការរៀបចំ និងដាក់ឲ្យដំណើរការរបបប្រាក់សោធន និងការពង្រឹងការអនុវត្តរបបសន្តិសុខសង្គមលើវិស័យសេដ្ឋកិច្ចក្រៅប្រព័ន្ធ ព្រមទាំងការអភិវឌ្ឍសមត្ថភាព ដើម្បីបង្កើនប្រសិទ្ធភាពការផ្តល់សេវា សំដៅលើកកម្ពស់ សុខមាលភាព និងសាមគ្គីភាពសង្គម ព្រមទាំងចូលរួមចំណែកកាត់បន្ថយភាព ក្រីក្រជាអតិបរមា។
លោក ស៊ុំសោភ័ណ មានជំនឿថា ចំពោះភាគីពាក់ព័ន្ធ នឹងយកចិត្តទុកដាក់ក្នុងការស្តាប់រាល់បទបង្ហាញ និងផ្តល់ធាតុចូលសំខាន់ៗ ដើម្បីឲ្យសិក្ខាសាលាពិគ្រោះយោបល់ដែលមានសារសំខាន់នេះ ទទួលបានចំណេះដឹង លទ្ធផលផ្លែផ្កា ដូចការរំពឹងទុក ។
លោកក៏បានចូលរួមផ្តល់ជាអនុសាសន៍មួយចំនួនក្នុងនោះ៖ ១. ការពិភាក្សាត្រូវផ្តោតឲ្យមានកិច្ចសហការជាមួយក្រសួងការងារ និងបណ្តុះបណ្តាលវិជា្ជជីវៈ ដែលមាន បេឡាជាតិសន្តិសុខសង្គម ដែលអនុវត្តលើរបបសន្តិសុខសង្គមទាំងអស់ និងនាយកដ្ឋានពេទ្យការងារ ដែលអនុវត្តលើអនាម័យ ការងារ និងសុវត្ថិភាពការងារ, ២. ការពិភាក្សាត្រូវផ្តោតឲ្យមានកិច្ចសហការជាមួយក្រសួងរៀបចំដែនដី នគរូបនីយកម្ម និងសំណង់ អំពីយន្តការកិច្ចសហការពាក់ព័ន្ធការអនុញ្ញតសិទ្ធិសាងសង់ ចាំបាច់ត្រូវមានបញ្ជាក់អំពីការទិញធានារ៉ាប់រង ពិសេសគ្រោះថ្នាក់ការងារស្របតាមច្បាប់ស្តីពីសំណង់ និង ៣. ផ្តោតលើអនុសាសន៍ផ្សេងៗទៀតពីវាគ្មិន ប.ស.ស. និងវាគ្មិននៃនាយកដ្ឋានពេទ្យការងារ និងសមាជិកសមាជិការនៃអង្គសិក្ខាសាលាទាំងមូល៕
ចែករំលែកព័តមាននេះ