ភ្នំពេញ៖ នៅថ្ងៃទី១៧ ខែមករានេះ ការិយាល័យអ្នកនាំពាក្យគណៈកម្មាធិការនាយកគណបក្សហ្វ៊ុនស៊ិនប៉ិច បានចេញសេចក្តីប្រកាសព័ត៌មាន រម្លឹកពីការសម្រេចរបស់អង្គប្រជុំគណៈកម្មាធិការនាយកគណបក្សហ្វ៊ុនស៊ិនប៉ិច កាលពីថ្ងៃទី២៣ ខែធ្នូ ឆ្នាំ២០២១ ដែលបានសម្រេចជាឯកច្ឆន្ទ យាងសម្តេចព្រះរាជបុត្រី ព្រះអនុជ នរោត្តម អរុណរស្មី អនុប្រធានទី១ គណបក្សហ្វ៊ុនស៊ិនប៉ិច ឡើងជាព្រះប្រធានគណបក្ស ជំនួសសម្តេចក្រុមព្រះ នរោត្តម រណឫទ្ធិ។
សេចក្តីប្រកាសបញ្ជាក់ថា ការយាងសម្តេចព្រះរាជបុត្រី ព្រះអនុជ នរោត្តម អរុណរស្មី បំពេញព្រះតួនាទី ជាថ្នាក់ដឹកនាំជាន់ខ្ពស់ ក្នុងរចនាសម្ព័ន្ធគណបក្ស ដើម្បីលើកស្ទួយព្រះកិត្តិនាម សម្តេចក្រុមព្រះ អតីតព្រះប្រធានគណបក្សហ្វ៊ុនស៊ិនប៉ិច និងចូលរួមថែរក្សាស្នាព្រះហស្ថដ៏ថ្លៃថ្លានៃអតីតព្រះមហាវីរក្សត្រ ព្រះករុណាព្រះបាទសម្តេច នរោត្តម រណឫទ្ធិ ព្រះបរមរតនកោដ្ឋ ព្រះបិតាស្ថាបនិកគណបក្សហ្វ៊ុនស៊ិនប៉ិច។
ក្នុងសេចក្តីប្រកាស ការិយាល័យអ្នកនាំពាក្យគណបក្សហ្វ៊ុនស៊ិនប៉ិច បានបញ្ជាក់សាជាថ្មីថា «ការជ្រើសតាំងប្រធានគណបក្ស ជាសមត្ថកិច្ចរបស់គណៈកម្មាធិការនាយក ហើយបេក្ខភាព អាចក្លាយជាប្រធានគណបក្សហ្វ៊ុនស៊ិនប៉ិច គឺឥស្សរជន ដែលបានបំពេញគ្រប់លក្ខខណ្ឌ ដូចមានចែងក្នុងលក្ខន្តិកៈគណបក្សហ្វ៊ុនស៊ិនប៉ិច»។
សូមរម្លឹកថា សម្តេចក្រុមព្រះ នរោត្តម រណឫទ្ធិ ព្រះប្រធានគណបក្សហ្វ៊ុនស៊ិនប៉ិច បានយាងចូលព្រះទិវង្គត នៅថ្ងៃអាទិត្យ ទី២៨ ខែវិច្ឆិកា ឆ្នាំ២០២១ វេលាម៉ោង ៩៖៤០ព្រឹក នៅប្រទេសបារាំង ត្រូវនឹងម៉ោង ៣៖៤០នាទីរសៀល ម៉ោងនៅកម្ពុជា ក្នុងព្រះជន្ម ៧៧ព្រះវស្សា។ ព្រះសពព្រះអង្គ ត្រូវបានដង្ហែមកមាតុភូមិនិវត្តន៍ កាលពីថ្ងៃទី០៥ ខែធ្នូ ឆ្នាំ២០២១ ហើយនៅថ្ងៃទី៨ ខែធ្នូ ព្រះសពព្រះអង្គ ត្រូវបានថ្វាយព្រះភ្លើង បូជានៅមុខវត្តបទុមវតី ក្នុងរាជធានីភ្នំពេញ។
មុនសម្តេចក្រុមព្រះ យាងចូលព្រះទិវង្គត ក៏មានជម្លោះដណ្តើមត្រារវាងព្រះបុត្រាព្រះអង្គ នរោត្តម ចក្រាវុឌ្ឍ ប្រធានស្តីទីគណបក្សហ្វ៊ុនស៊ិនប៉ិច និងក្រុមមន្ត្រីចាស់ៗនៅហ្វ៊ុនស៊ិនប៉ិច ដឹកនាំដោយលោក ចាប ញ៉ាលីវុធ ដែលជាព្រះអនុជឪពុកទីទៃជាមួយសម្តេចក្រុមព្រះ នរោត្តម រណឫទ្ធិ ផងដែរ៕
ចែករំលែកព័តមាននេះ