រាជធានីភ្នំពេញ ៖ នៅវេលាព្រឹកថ្ងៃទី៣០ មិថុនា ក្រុមគ្រូពេទ្យស្ម័គ្រចិត្តរបស់សាលារាជធានីជាង៥០នាក់ រួមជាមួយក្រុមយុវជនកាកបាទក្រហមសង្កាត់-ខណ្ឌជាច្រើនរូបទៀត ដឹកនាំដោយលោក ឌី រ័ត្នខេមរុណ អភិបាលរងខណ្ឌមានជ័យ
រាជធានីភ្នំពេញ ៖ នៅវេលាព្រឹកថ្ងៃទី៣០ មិថុនា ក្រុមគ្រូពេទ្យស្ម័គ្រចិត្តរបស់សាលារាជធានីជាង៥០នាក់ រួមជាមួយក្រុមយុវជនកាកបាទក្រហមសង្កាត់-ខណ្ឌជាច្រើនរូបទៀត ដឹកនាំដោយលោក ឌី រ័ត្នខេមរុណ អភិបាលរងខណ្ឌមានជ័យ និងជាប្រធានអនុសាខាកាកបាទក្រហមកម្ពុជាប្រចាំខណ្ឌបានចុះមកពិនិត្យ និងព្យាបាលជំងឺដោយឥតគិតថ្លៃជូនបងប្អូនប្រជាពលរដ្ឋចំនួន៦៥គ្រួសារ ស្មើនឹង២៥០នាក់ ដែលរងគ្រោះក្នុងមហន្តរាយអគ្គិភ័យលេបត្របាក់លំនៅឋាន កាលពីរសៀលថ្ងៃទី២៨ មិថុនា កន្លងទៅ នៅខាងក្រោយនឹងស្ថានីយប៊ូមទឹកស្អុយ ស្ថិតក្នុងភូមិត្នោតជ្រុំទី៣ សង្កាត់បឹងទំពុន ខណ្ឌមានជ័យ រាជធានីភ្នំពេញ ។
លោក ឌី រ័ត្នខេមរុណ អភិបាលរងខណ្ឌមានជ័យបានមានប្រសាសន៍ឱ្យដឹងថា ការចុះមកពិនិត្យសុខភាព ដោយឥតគិតថ្លៃនៅពេលនេះ គឺមិនមានពាក់ព័ន្ធនឹងនិន្នាការនយោបាយអ្វីទាំងអស់ គឺសុទ្ធតែកើតឡើងដោយសារតែការមើលឃើញនូវទុក្ខលំបាករបស់បងប្អូនពីសំណាក់ក្រុមអាជ្ញាធរ ដែលតែងតែគិតគូរពីសុខទុក្ខរបស់បងប្អូនជាធំជានិច្ច ។ ក្នុងឱកាសខាងលើនេះ លោកអភិបាលរងបានសម្តែងនូវអារម្មណ៍សោកស្តាយយ៉ាងពន់ពេកផងដែរ ចំពោះការបាត់បង់នូវទីជម្រកស្នាក់ប្រាស្រ័យប្រចាំថ្ងៃរបស់បងប្អូន ដោយសារតែមហន្តរាយអគ្គិភ័យកំណាចចូលមកលេបត្របាក់អស់ហ្មត់គ្មានសល់ ប៉ុន្តែយ៉ាងណាសុំបងប្អូនកុំមានការអស់សង្ឈឹម និងមានវិប្បដិសារីក្នុងជីវិតឱ្យសោះ ព្រោះអស់អ្វីក៏អស់ចុះ តែសុំឱ្យតែជីវិតនៅរស់រានយើងប្រាកដជាអាចកសាងវាឡើងវិញនៅពេលក្រោយ ។
បន្ថែមពីនោះ អាជ្ញាធរនឹងបន្តខិតខំប្រឹងប្រែងខ្នះខ្នែងក្នុងការរកជំនួយពីទីជិត និងទីឆ្ងាយ ជាពិសេសការសហការជាមួយអង្គការជាដៃគូរក្នុងការយកអំណោយ និងជំនួយសប្បុរសនានា ជួយដល់បងប្អូនជាបន្តបន្ទាប់ នៅពេលក្រោយជាក់ជាមិនខានឡើយ ។
ជាចុងក្រោយ បងប្អូនប្រជាពលរដ្ឋទាំងជាង២០០នាក់ បានថ្លែងនូវអំណរអរគុណយ៉ាងក្រៃលែងរកពាក្យថ្លែងពុំបានចំពោះអាជ្ញាធរគ្រប់លំដាប់ថ្នាក់ទាំងថ្នាក់ខណ្ឌ និងរាជធានី ជាពិសេសលោក ឌី រ័ត្នខេមរុណ អភិបាលរងខណ្ឌមានជ័យ ដែលតែងតែខ្វល់ខ្វាយយកចិត្តទុកដាក់គិតគូរពីសុខទុក្ខពលរដ្ឋគ្រប់ដង្ហើមចេញចូលជានិច្ច ៕
ចែករំលែកព័តមាននេះ