រាជធានីភ្នំពេញ ៖ ការប្រកួតប្រដាល់ដណ្ដើមខ្សែក្រវាត់ជើងឯកគោជល់វគ្គ៥ក្នុងប្រភេទទម្ងន់៦៧គីឡូក្រាមនៅលើសង្វៀនទូរទស្សន៍ស៊ីអិនស៊ីនាថ្ងៃសៅរ៍ ទី២ កក្កដា ខានស្អែកនេះបានឈានចូលដល់សប្ដាហ៍ទី២ហើយ ។
វី សេរីចាន់ឌីន មកពីក្លិបខ្លារខិនមានរិទ្ធនឹងជួបប្រកួតជាមួយកីឡាករថៃឈ្មោះDarki Sor Viravan រីឯ អ៊ុំ ចំរើន មកពីក្លិបតាឡីដំរីមានរិទ្ធ ជួបប្រកួតជាមួយកីឡាករឡាវឈ្មោះ Chanchai ។ គេនៅចាំបានថា កាលពីសប្ដាហ៍ទី១កីឡាករកម្ពុជា២រូបគឺកន ចន្ថា មកពីសមាគមកីឡាប្រដាល់ក្រសួងការពារជាតិ និងមាជ សុខរ៉ា មកពីក្លិបតាព្រហ្មមានជ័យ ជាអ្នករកបាន៣ពិន្ទុមុនគេ ។ នៅសប្ដាហ៍នេះគេមិនទាន់ដឹងថា កីឡាករកម្ពុជាទាំង២រូបនេះ មានឱកាសរកបាន៣ពិន្ទុដូចអ្នកមុន ឬអត់នោះទេ ។
រវាង វី សេរីចាន់ឌីន និងកីឡាករថៃមានប្រវត្តិប្រកួតមិនលើសគ្នាប៉ុន្មានទេ ។ កីឡាករកម្ពុជារូបនេះ ធ្លាប់ប្រកួតបាន៦០ដង ឈ្នះ៤៨ដង ចាញ់៩ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន១៥ដង ។ ចំណែកកីឡាករថៃវិញ ធ្លាប់ប្រកួតបាន៨៣ដង ឈ្នះ៦២ដង ចាញ់១៦ដង ស្មើ៥ដង ។ មួយរយៈមកនេះ វី សេរីចាន់ឌីន មិនដែលឃើញឡើងសង្វៀនប្រកួតទេ ខណៈកីឡាករថៃក៏មិនធ្លាប់មកប្រកួតនៅស្រុកខ្មែរដែរ ។ ដូច្នេះ គូនេះមិនអាចទាយទុកមុនថា អ្នកណាខ្លាំងជាងអ្នកណាទេ ប៉ុន្តែគេមានជំនឿចិត្តលើ វី សេរីចាន់ឌីន ថាអាចស្វែងរកបាន៣ពិន្ទុជាលើកដំបូង ។
ចំណែកការជួបគ្នារវាង អ៊ុំ ចំរើន និងកីឡាករឡាវវិញនោះ ក៏គ្មានអ្នកណាហ៊ានទាយទុកមុនពីលទ្ធផលចុងក្រោយដែរ ។ ប៉ុន្តែបើពិនិត្យទៅលើប្រវត្តិប្រកួត គូនេះអាចស៊ីសងគ្នាបាន ។ អ៊ុំ ចំរើន ធ្លាប់ប្រកួតបាន៨៤ដង ឈ្នះ៧៣ដង ចាញ់៩ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បានរហូតដល់ទៅ១៩ដង ។ រីឯកីឡាករឡាវធ្លាប់ប្រកួតបាន៨៦ដង ឈ្នះ៧០ដង ចាញ់១៥ដង និងស្មើ៥ដង ។ ចាំមើលអ៊ុំ ចំរើន អាចយកឈ្នះគូប្រកួតបានដោយរបៀបណា?
ចំណែកគូប្រកួតមិត្តភាពធម្មតាវិញតម្រូវទៅលើកីឡាករ ផន ភឿត មកពីក្លិបឃ្លាំងមឿងកីឡា ប្រកួតជាមួយកីឡាករ ពុទ្ធ សុជាតិ មកពីក្លិបពុទ្ធសេរីវង្សព្រែកតាទែន និងកីឡាករ ផាន់ សារុន ក្លិបគជសារកីឡា ប្រកួតជាមួយកីឡាករ ទេស ឧត្ដម មកពីក្លិបកងពលតូចលេខ៧០ ។
ដោយឡែក នៅលើសង្វៀនទូរទស្សន៍ស៊ីធីអិន នាថ្ងៃសៅរ៍នោះដែរ ក៏មានការប្រកួតអន្តរជាតិរវាងកីឡាករកម្ពុជា និងកីឡាករថៃចំនួន២គូ ដែលតម្រូវទៅលើកីឡាករថុល មករា មកពីក្លិបឃ្លាំងមឿងកីឡា ប្រកួតជាមួយកីឡាករថៃឈ្មោះ Mohin Thayalak ក្នុងប្រភេទទម្ងន់៦៣,៥គីឡូក្រាម និងកីឡាករ សេក គឹមរួន មកពីក្លិបអង្គរមានជ័យ ខេត្តសៀមរាប ប្រកួតជាមួយកីឡាករថៃឈ្មោះ Chinnapho thanyalark ក្នុងប្រភេទទម្ងន់៦១គីឡូក្រាម ។
ក្រៅពីគូអន្តរជាតិក៏មានការប្រកួតរវាងកីឡាករក្នុងស្រុកជាច្រើនគូទៀតដូចជា កីឡាករ លី ជិនហឺ មកពីក្លិបកងពលតូចលេខ៨ភ្នំទ្រព្យ ប្រកួតជាមួយកីឡាករ ភួង ពិសិដ្ឋ មកពីក្លិបតាឡីដំរីមានរិទ្ធ ។ កីឡាករ កុយ ចាន់តូ មកពីក្លិបគីសែមានរិទ្ធ ប្រកួតជាមួយកីឡាករ ភួងពិសិដ្ឋ មកពីក្លិបតាព្រហ្មមានជ័យ និងកីឡាករ ឡុង ជិន មកពីក្លិបខ្លារខិនមានរិទ្ធ ប្រកួតជាមួយកីឡាករ បឺត សង្ឃឹម មកពីក្លិបរ៉ាហាប់ស្វាយប៉ាក ។
សម្រាប់កម្មវិធីប្រកួតប្រដាល់ថ្ងៃអាទិត្យ ទី២៣ មិថុនា នៅលើសង្វៀនទូរទស្សន៍ស៊ីអិនស៊ីវិញ ក៏ប្រជុំដោយកីឡាករខ្លាំងៗជាច្រើនគូផងដែរ ។ គូអន្តរជាតិមានចំនួន២គូគឺកីឡាករ រិន សារដ្ឋ មកពីក្លិបខេត្តព្រៃវែង ប្រកួតជាមួយកីឡាករថៃឈ្មោះYod Mongkun Hanravi ក្នុងប្រភេទទម្ងន់៦៥គីឡូក្រាម និងកីឡាករសុខ ទូ មកពីក្លិបឃ្លាំងមឿងកីឡា ប្រកួតជាមួយកីឡាករថៃឈ្មោះ Khomsne Sor Viravan ក្នុងប្រភេទទម្ងន់៥៤គីឡូក្រាម ។
ក្រៅពីនេះក៏មានការប្រកួតរវាងកីឡាករក្នុងស្រុកជាច្រើនគូទៀតដូចជាកីឡាករ ចៅ ចេក មកពីក្លិបហនុមាន ប្រកួតជាមួយកីឡាករអេ ហនុមាន មកពីក្លិបអេភូថងកីឡា ។
កីឡាករខុន លីហ៊ុយ មកពីក្លិបកងពលតូចលេខ៨ភ្នំទ្រព្យ ប្រកួតជាមួយកីឡាករ សល់ វិត្ថា មកពីក្លិបកុសលកីឡា ។ កីឡាករថាន រ៉ាឌី មកពីក្លិបតាព្រហ្មមានជ័យ ប្រកួតជាមួយកីឡាករសេក មេសា មកពីក្លិបអង្គរមានជ័យ ខេត្តសៀមរាប និងគូចុងក្រោយកីឡាករ ឡុង សាវី មកពីក្លិបសាលវ័ន្តកីឡា ប្រកួតជាមួយកីឡាករ សិទ្ធ សុធន់ មកពីក្លិបសាមគ្គីកូនខ្មែរ ៕
ចែករំលែកព័តមាននេះ