រាជធានីភ្នំពេញ ៖ នៅរសៀលថ្ងៃសៅរ៍ទី២ កក្កដា ខានស្អែកនេះ ព្រឹត្តិការណ៍ប្រដាល់អន្តរជាតិដែលរៀបចំឡើងដោយស្ថានីយទូរទស្សន៍អាស៊ីអាគ្នេយ៍ នឹងត្រូវចាប់ផ្ដើមទៀតហើយ ដោយកីឡាករកម្ពុជា២រូប និងថៃ២រូប នឹងឡើងប្រកួតគ្នាតាមការគ្រោងទុករៀងរាល់២សប្ដាហ៍ម្ដង ។ ព្រឹត្តិការណ៍ប្រដាល់មួយនេះ ត្រូវគេរំពឹងថា នឹងមានអ្នកស្នេហាវិស័យប្រដាល់ចាប់អារម្មណ៍ច្រើន ដោយសារតែសមាសភាពកីឡាករកម្ពុជា និងថៃ សុទ្ធតែជាជើងខ្លាំង និងល្បីឈ្មោះដូចគ្នា ។
ការប្រកួតដែលនឹងធ្វើឡើងចាប់ពីម៉ោង២រសៀល កីឡាករ ង៉ែត្រ រដ្ឋា មកពីក្លិបតាព្រហ្មមានជ័យ នឹងឡើងប្រកួតជាមួយកីឡាករថៃឈ្មោះ ណុំ សាតឹក ដែលល្បីឈ្មោះ និងធ្លាប់បង្ហាញខ្លួននៅលើសង្វៀនទូរទស្សន៍អាស៊ីអាគ្នេយ៍ច្រើនលើកមកហើយ ។ កីឡាករទាំងពីរនេះ ត្រូវគេកត់សម្គាល់ក្រៅពីមានសមត្ថភាពខ្លាំងរៀងខ្លួន ក៏មានអ្នកគាំទ្រស្រឡាញ់ពេញចិត្តមិនអន់ដូចគ្នាដែរ ។ ជាក់ស្ដែងកីឡាករថៃ ថ្វីដ្បិតឡើងប្រកួតនៅលើសង្វៀនកម្ពុជាប៉ុន្តែក៏មានអ្នកស្នេហាវិស័យប្រដាល់ជាជនជាតិខ្មែរស្រឡាញ់ចូលចិត្តចំពោះសមត្ថភាពប្រកួតរបស់គេដែរ។ ផ្អែកតាមការប្រកួតដែលមានចំនួន៨១លើក ឈ្នះ៦៣លើក ចាញ់១៧លើក និងស្មើ១លើក គេនៅតែមើលឃើញថាកីឡាករថៃរូបនេះគឺជាឧបសគ្គមួយដ៏ធំ ដែលពិបាកឱ្យកីឡាករកម្ពុជាទៅរួចដោយស្រួលក្នុងពេលដែលកីឡាករទាំងពីរមិនមានចំណុចខ្លាំងលើសខ្វះគ្នា ។ កីឡាករថៃមានមាឌធំជាង ហើយកម្លាំងរបស់គេក៏ខ្លាំងមិនខុសពីដំរីសារនោះដែរ ថ្វីបើអាយុអាចជ្រេជាងកីឡាករកម្ពុជា ។ កីឡាករ ណុំ សាតឹក គឺជាជើងខ្លាំងម្នាក់ដែលមានអ្នកស្នេហាការប្រដាល់ច្រើនយកចិត្តទុកដាក់ថាមានប្រៀប ប៉ុន្តែអ្នកគាំទ្រកីឡាករ ង៉ែត្រ រដ្ឋា ក៏យល់ឃើញថា កីឡាករកម្ពុជារូបនេះមានប្រៀបមិនអន់នោះដែរ ។ ថ្វីដ្បិតធ្លាប់ប្រកួតបាន៦៥លើក ឈ្នះ៥៥លើក ចាញ់៨លើក និងស្មើ២លើក តិចជាងកីឡាករថៃ ប៉ុន្តែកីឡាករកម្ពុជាក៏មើលទៅអាចតតាំងគ្នាបានដែរ ។
លោក ញាណ សុធី អ្នកគ្រប់គ្រងកម្មវិធីប្រដាល់ប្រចាំស្ថានីយទូរទស្សន៍អាស៊ីអាគ្នេយ៍យល់ថា កីឡាករទាំងពីរអាចនឹងពិបាកស៊ីសងគ្នា និងពិបាកប៉ាន់ស្មាននៅមុនការប្រកួត។ លោកនៅតែយល់ថា កីឡាករម្នាក់ៗឡើងប្រកួតអស់ពីសមត្ថភាពនៅលើសង្វៀន ដោយសារតែកីឡាករង៉ែត្រ រដ្ឋា ក៏មិនធ្លាប់លាក់គំនួចសម្រាប់ការប្រកួត ហើយកីឡាករថៃ ណុំ សាតឹក ក៏ជាកីឡាករល្អម្នាក់មិនមែនធម្មតា ។ លោកថា រវាងពួកគេទាំងពីរសុទ្ធតែមានថ្វីដៃរៀងខ្លួន ហើយបើផ្អែកលើបច្ចេកទេស និងភាពរហ័សដែលពួកគេធ្លាប់បង្ហាញក៏មិនអន់នោះដែរ ។ អីុចឹងហើយទើបនៅពេលប៉ះគ្នាលោកមានជំនឿថានឹងល្អមើលពេញរយៈពេល៥ទឹក ដោយលោកបញ្ជាក់ថា ភាពប្រយ័ត្នប្រយែងរបស់កីឡាករទាំងពីរគឺមិនអាចកីឡាករណាម្នាក់សន្លប់នៅមុនទឹកដែលបានកំណត់នោះឡើយ ។
សម្រាប់គូទី២នៅលើសង្វៀននេះវិញ គឺកីឡាកររឿង សោភ័ណ្ឌ មកពីក្លិបមកុដរាជសីហ៍ នឹងឡើងប្រកួតជាមួយកីឡាករថៃឈ្មោះស៊ុបពើរឆ័យ ដែលជាជើងខ្លាំងម្នាក់ ។ ការប្រកួតរបស់ពួកគេក៏មានអ្នកទស្សនាចាប់អារម្មណ៍ និងចង់តាមដានមិនអន់ដែរ ដោយសារតែពួកគេប៉ះគ្នាក្នុងតំណែងគូឯក ហើយកីឡាករម្ខាងៗសុទ្ធតែមានក្រេឌីតមិនធម្មតា ។ កីឡាកររឿង សោភ័ណ្ឌ ធ្លាប់ប្រកួតបាន១៣៨លើក ឈ្នះ១២៦លើក ចាញ់១១លើក និងស្មើ១លើក ក្នុងពេលដែលកីឡាករថៃឯណោះវិញ ក៏ធ្លាប់ប្រកួតបាន១២០លើក ឈ្នះ១០៤លើក ចាញ់១៥លើក និងស្មើ១លើក ដែលមិនមែនជាជើងថ្មីដូចគ្នា ។ កីឡាករទាំងពីរបានត្រឹមតែមានគេប៉ាន់ស្មានថា នឹងវាយគ្នាល្អមើល ប៉ុន្តែមិនមានអ្នកណាហ៊ានអះអាងថាភាគីខាងណានឹងឈ្នះដោយពិតប្រាកដនៅឡើយទេ ដែលមានតែការប្រកួតជាក់ស្ដែងដល់ទីបញ្ចប់ប៉ុណ្ណោះ ទើបអាចដឹងបាន ។
ចែករំលែកព័តមាននេះ