រាជធានីភ្នំពេញ ៖ កម្មករ-កម្មការីប្រមាណជាង២០នាក់នៃសិប្បកម្មកាត់ដេរសម្លៀកបំពាក់ យីហោ «លីដា» ដែលមានទីតាំងស្ថិតតាមបណ្តោយផ្លូវប៉េតុង ស្ថិតក្នុងភូមិទ្រា១ សង្កាត់ស្ទឹងមានជ័យ ខណ្ឌមានជ័យ បានដួលសន្លប់ជាបន្តបន្ទាប់ ដោយមិនដឹងពីមូលហេតុពិតប្រាកដ កាលពីវេលាម៉ោង៩ និង១៥នាទីព្រឹក ថ្ងៃទី៣០ ខែមិថុនា ឆ្នាំ២០១៦ ។
មន្ត្រីមូលដ្ឋានបានឲ្យដឹងថា ក្រោយទទួលបានដំណឹងពីការដួលសន្លប់នេះភ្លាម កម្លាំងអាជ្ញាធរបានចុះអន្តរាគមន៍ដល់ទីតាំងកើតហេតុ និងជួយលើកជនរងគ្រោះដែលដួលសន្លប់ដឹកតាមរ៉ឺម៉កកង់បីយកទៅកាន់មន្ទីរពេទ្យដើម្បីសង្គ្រោះ ។
លោក សេង សាញ់ ចៅសង្កាត់ស្ទឹងមានជ័យ បានឲ្យដឹងថា អាជ្ញាធរនៅមិនទាន់អាចបញ្ជាក់ពីមូលហេតុបាននៅឡើយទេ ថាផ្តើមចេញពីកត្តាអ្វីដែលនាំអោយកម្មការីក្នុងរោងចក្រត្រូវដួលសន្លប់ជាបន្តបន្ទាប់បែបនេះ ខណៈពេលនេះក្រុមសមត្ថកិច្ចជំនាញកំពុងចុះដល់ទីតាំងកើតហេតុខាងលើដើម្បីស្រាវជ្រាវរុករកមូលហេតុ ។
យ៉ាងណាមិញ គិតមកត្រឹមម៉ោង ១២ថ្ងៃត្រង់ថ្ងៃដដែលនេះ អាជ្ញាធរបានស្នើឲ្យម្ចាស់ទីតាំងផ្អាកអាជីវកម្មជាបណ្តោះអាសន្នសិន ដោយឲ្យកម្មករ-កម្មការីដែលនៅសេសសល់ឈប់សម្រាកមួយថ្ងៃសិន ដោយត្រូវត្រឡប់ទៅកាន់ផ្ទះរៀងៗខ្លួនវិញ ៕
ចែករំលែកព័តមាននេះ