រាជធានីភ្នំពេញ ៖ យោងតាមសុន្ទរកថារបស់លោកសោម អូន ប្រធានអង្គការសង្គមស៊ីវិលកម្ពុជាអាស៊ាន (CACSO) និង ជាប្រធានសហព័ន្ធសហជីពជាតិកម្ពុជាថ្លែងក្នុងឱកាសអបអរសាទរខួបទី៩៩ ទិវាអន្ដរជាតិនារី៨មីនា ឆ្នាំ២០១០ ក្រោមប្រធានបទ “រួមគ្នាបង្កើតសក្ដានុពលរបស់ស្ដ្រី និងយុវវ័យ ដើម្បីអភិវឌ្ឍន៍សង្គមជាតិ” ដែលប្រារឰធ្វើនៅភោជនីយដ្ឋានទន្លេបាសាក់ នាព្រឹកថ្ងៃទី៧ មីនា បានឱ្យដឹងថា ក្នុងឆ្នាំ២០០៩-២០១០ ស្ដ្រីបានចូលរួមការងារនៅក្នុងស្ថាប័នកំពូលៗទាំង៣របស់ជាតិមានចំនួន១៤.២៧១រូប ។
ក្នុងសុន្ទរកថារបស់លោកសោម អូន បានបង្ហាញថា ស្ដ្រីកំពុងបំរើការងារនៅក្នុងស្ថាប័នព្រឹទ្ធសភា៩រូប ស្ថាប័នរដ្ឋសភា២៧រូប ស្ថាប័បរាជរដ្ឋាភិបាលថ្នាក់ឧបនាយករដ្ឋមន្ដ្រី១រូប រដ្ឋមន្ដ្រី២រូប រដ្ឋលេខាធិការ១៦រូប អនុរដ្ឋលេខាធិការ៣១រូប អភិបាលរងខេត្ដ និងរាជធានី២៤រូប អភិបាលរងស្រុក-ខណ្ឌ១៩៧រូប សមាជិកាក្រុមប្រឹក្សាខេត្ដ-រាជធានី ៣៧រូប សមាជិកាក្រុមប្រឹក្សាឃុំ-សង្កាត់ ១.៧១៧រូប មេភូមិ១២.២១០រូប ។ យោងតួលេខនេះបានបង្ហាញថា គំលាតក្នុងសង្គម ការងាររវាងបុរសនិងស្ដ្រីនៅក្នុងស្ថាប័នជាតិឃើញថា ខុសគ្នាឆ្ងាយណាស់ ។ លោកសោម អូន បានបញ្ជាក់ថា យើងគាំទ្រចំពោះស្ដ្រីដូចជា ១-លើកកំពស់លក្ខខណ្ឌការងារសំរាប់ស្ដ្រី ២-លើកកំពស់ការអប់រំបណ្ដុះបណ្ដាលដល់ស្ដ្រី និងកុមារ ៣-លើកទឹកចិត្ដឱ្យស្ដ្រីក្លាហាន និងក្លាយជាអ្នកដឹកនាំ ៤-ជំរុញស្ដ្រីឱ្យចូលរួម ក្នុងការងារដឹកនាំលើវិស័យនយោបាយ សេដ្ឋ កិច្ច សង្គមកិច្ចចាប់ពីថ្នាក់មូលដ្ឋាន រហូតដល់ថ្នាក់ជាតិ និង៥-ចូលរួមលុបបំបាត់ការរើសអើង និងអំពើហិង្សាគ្រប់រូបភាពមកលើស្ដ្រី និងកុមារនៅកន្លែងការងារ និងនៅតាមផ្ទះ។
នៅចុងបញ្ចប់នៃកម្មវិធី លោកសោម អូន បាននាំយកសារុង និងថវិកាជាអំណោយ របស់លោកឧបនាយករដ្ឋមន្ដ្រីសុខ អាន ចែក ជូនសមាជិក សមាជិកាចូលរួមចំនួន១៦០ នាក់ ក្នុងម្នាក់ៗសារុង១ ថវិកា២ម៉ឺនរៀល និងទទួលបានអាហារសាមគ្គីមួយពេលនៅ ក្នុងភោជនីយដ្ឋានទន្លេបាសាក់ ៕
ចែករំលែកព័តមាននេះ