រាជធានីភ្នំពេញ ៖ ព្រឹត្តិការណ៍ប្រដាល់ដណ្ដើមខ្សែក្រវាត់រវាងអ្នកស្នងមរតកគុនខ្មែរ និងមិត្តរួមអាជីពឆ្លងដែនមកពីប្រទេសថៃ ក្នុងប្រភេទទម្ងន់៦៩គីឡូក្រាម នឹងត្រូវចាប់ផ្ដើមប្រកួតនៅលើសង្វៀនទូរទស្សន៍PNN ថ្ងៃអាទិត្យ ទី៣ កក្កដា ខាងមុខនេះហើយ ។
តាមការឱ្យដឹងពីលោក សំណព្វ អ្នករៀបចំកម្មវិធីប្រកួតប្រដាល់ប្រចាំស្ថានីយទូរទស្សន៍PNNថា ក្នុងចំណោមអ្នកប្រដាល់កម្ពុជា-ថៃទាំង៨រូបដែលត្រូវជួបប្រកួតគ្នានៅក្នុងព្រឹត្តិការណ៍សមរភូមិអ្នកប្រយុទ្ធជើងឯកគោជល់ក្នុងប្រភេទទម្ងន់៦៩គីឡូក្រាម កីឡាករកម្ពុជាមាន ឡុង សុវណ្ណឌឿន មកពីក្លិបសាលវ័ន្តកីឡា, ពេជ្រ សីហា មកពីសមាគមកីឡាប្រដាល់ក្រសួងការពារជាតិ, សរ រាជសីហ៍ មកពីក្លិបមោងឬស្សីមរតកគុនខ្មែរ និងឡេះ តើក មកពីក្លិបពុទ្ធសេរីវង្សព្រែកតាទែន ។ ចំណែកកីឡាករថៃមាន Chokdee Sor Thanapetch, Sumaee Sor Weerawan,Thilek Eminen AirនិងInseedang Bangfarm Gym ។
តាមការឱ្យដឹងបន្ថែម ការប្រកួតនេះធ្វើឡើងចំនួន១២សប្ដាហ៍តាមរូបមន្តសន្សំពិន្ទុដើម្បីរកជើងខ្លាំងដែលមានពិន្ទុច្រើនជាងគេតែ២រូប ឡើងទៅប្រកួតនៅវគ្គផ្ដាច់ព្រ័ត្រដណ្ដើមយកចំណាត់ថ្នាក់លេខ១និងលេខ២ ។ ចំណាត់ថ្នាក់លេខ១ ទទួលបានពាន១ និងប្រាក់រង្វាន់២០លានរៀល និងលេខ២ទទួលបាន១០លានរៀល ។
លោកឧត្តមសេនីយ៍ តែម ម៉ឺន ប្រធានសហព័ន្ធកីឡាប្រដាល់កម្ពុជា ដែលបានអញ្ជើញជាអធិបតីក្នុងសន្និសីទសារព័ត៌មាននៅសណ្ឋាគារភ្នំពេញ កាលពីថ្ងៃទី២៩ មិថុនា បានមានប្រសាសន៍ផ្ដាំផ្ញើដល់គ្រូបង្វឹកនិងកីឡាករទាំងអស់ត្រូវគោរពវិន័យឱ្យបានល្អ មានសីលធម៌ និងចូលរួមថែរក្សាវិស័យកីឡាប្រដាល់ដែលជាកេរដំណែលរបស់ដូនតាយើងឱ្យបានគង់វង្ស។ ជាងនេះទៅទៀត កីឡាករទាំងអស់ត្រូវចេះគោរពគ្នាទៅវិញទៅមក ព្រោះចាញ់ឈ្នះជារឿងធម្មតា សំខាន់ធ្វើយ៉ាងណាកុំឱ្យខូចកម្មវិធីរបស់គេ ។ ចំណែកអ្នកដែលមានចេតនាមិនល្អ មានបំណងធ្វើផ្ដេសផ្ដាស បើរកឃើញនឹងត្រូវដាក់ពិន័យតាមច្បាប់ប្រកួតរបស់សហព័ន្ធជាក់ជាពុំខានឡើយ ៕
ចែករំលែកព័តមាននេះ