បុរសជាជនសង្ស័យ១ក្រុមមានបក្សពួកចំនួន៤នាក់ បានជិះម៉ូតូ១គ្រឿង ម៉ាក AIR BLADT ពណ៌ក្រហមលាយស ពាក់ស្លាកលេខកំពង់ស្ពឺ ១F-៧៧២០ និងរថយន្ត១គ្រឿងទៀតមិនស្គាល់ម៉ាក បានធ្វើសកម្មភាព
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសជាជនសង្ស័យ១ក្រុមមានបក្សពួកចំនួន៤នាក់ បានជិះម៉ូតូ១គ្រឿង ម៉ាក AIR BLADT ពណ៌ក្រហមលាយស ពាក់ស្លាកលេខកំពង់ស្ពឺ ១F-៧៧២០ និងរថយន្ត១គ្រឿងទៀតមិនស្គាល់ម៉ាក បានធ្វើសកម្មភាពប្រដាប់ដោយអាវុធប្លន់យកកាបូបរបស់ជនជាតិចិនម្នាក់ តែមិនបានសំរេច ហើយជនសង្ស័យទាំងនោះក៏បានទុកម៉ូតូចោល រួចនាំគ្នារត់ឡើងរថយន្តបើកគេចបាត់ស្រមោលតែម្តង បង្កឱ្យមានការភ្ញាក់ផ្អើលកាលវេលាម៉ោង៩និង៣០នាទីយប់ ថ្ងៃទី១៥ ខែមករា ឆ្នាំ២០២២ នៅចំណុចខុនដូរមួយកន្លែង តាមផ្លូវបេតុងកែងផ្លូវព្រះនរត្ដម ស្ថិតនៅក្នុងភូមិ១០ សង្កាត់ទន្លេបាសាក់ ខណ្ឌចំការមន ។
បើតាមប្រភពព័ត៍មានពីសាក្សីឃើញហេតុការណ៍ដែលជាបុរសសន្តិសុខឯកជនយាមខុនដូនៅកន្លែងកើតហេតុ បានប្រាប់ឱ្យដឹងថា មុនកើតហេតុ គេបានបុរសជនជាតិចិនម្នាក់បានបើករថយន្ត PORSCHE ពណ៌ស ពាក់ស្លាកលេខភ្នំពេញ ២AF-៨៨៦៨ ដោយមានដឹកស្ត្រីនៅលើរថយន្តចំនួន២នាក់ទៀត ។
បុរសជាសន្តិសុខរូបនេះបន្តថា លុះពេលបើករថយន្តមកដល់ខុនដូក៏ចតនៅមុខ រួចឈប់រថយន្តបើកទ្វារចុះមកខាងក្រៅ ស្រាប់តែមានជនសង្ស័យម្នាក់លេចមុខមកដណ្ដើមយកកាបូបពីបុរសជនជាតិចិន តែបុរសជនជាតិចិនរងគ្រោះបានទាញកាបូបយកមកវិញ ហើយពេលនោះក៏មានជនសង្ស័យចំនួន២នាក់ទៀតក៏លេចមុខមក និងម្នាក់ដកកាំភ្លើងបាញ់ឡើងលើមេឃចំនួន២គ្រាប់ តែផ្ទុះតែ១គ្រាប់ និងមួយគ្រាប់ទៀតអត់ផ្ទុះនោះទេ ។ ក្រោយពេលកើតហេតុ មានប្រជាពលរដ្ឋបានស្រែកឆោឡោផ្អើល ធ្វើឱ្យក្រុមជនសង្ស័យបានជិះម៉ូតូទុកចោលនៅផ្លូវព្រះនរោត្ដម និងបាននាំគ្នារត់ទៅជិះរថយន្ត១គ្រឿងផ្សេងទៀតរត់គេចខ្លួនបាត់ស្រមោលតែម្តង ។
បើតាមសមត្ថកិច្ចក៏បានបញ្ជាក់ដែរថា ករណីខាងលើនេះ នៅមិនទាន់ដឹងថា តើជនរងគ្រោះជាជនជាតិចិនរូបនោះ បានបាត់សម្ភារ:ដែរឬទេ? តែបើយោងតាមកាមេរ៉ាសុវត្ថិភាព គឺកាបូបរបស់ជនរងគ្រោះមិនបានបាត់នោះទេ ដោយសារតែជនរងគ្រោះបានដណ្ដើមយកពីជនសង្ស័យមកវិញបានហើយ លុះពេលកម្លាំងសមត្ថកិច្ចយើងមកដល់ ជនរងគ្រោះបានហៅកង់បីជិះទៅពេទ្យលាងរបួសរលាត់ដៃជើងស្រាលទៅហើយ ។
សមត្ថកិច្ចបន្តថា ចំណែកសម្ភារៈដែលដកហូតបានរួមមាន ម៉ូតូ១គ្រឿង និងកាំភ្លើងខ្លីចំនួន១ដើមដែលត្រូវបានបញ្ជាក់ថា ជារបស់ជនសង្ស័យ ក៏ត្រូវបានកម្លាំងកងរាជអាវុធមូលដ្ឋានខណ្ឌចំការមន យកទៅរក្សាទុកដើម្បីស្រាវជ្រាវស្វែងរកក្រុមជនសង្ស័យដែលប្រព្រឹត្តករណីប្លន់ប្រដាប់ដោយអាវុធខ្លីនេះ ចាប់ខ្លួនយកមកដាក់ទោសតាមផ្លូវច្បាប់ ។
ចែករំលែកព័តមាននេះ