ខេត្តឧត្តរមានជ័យ ៖ ស្ត្រីវ័យចំណាស់អាយុ៨៤ឆ្នាំកំពុងតែដេកដួលនៅនឹងកន្ទេលគ្មានទីពឹង បានដង្ហោយរកសប្បុរសជនពីទីជិតទីឆ្ងាយជួយឧបត្ថម្ភនូវម្ហូបអាហារដើម្បីកំដរជីវិតចុងក្រោយមុនពេលលាចាកលោកទៅ ។
ស្ត្រីចាស់ជរាឈ្មោះ ផន សយ អាយុ៨៤ឆ្នាំ ជាស្ត្រីមេម៉ាយ គ្មានប្តី គ្មានកូនទីពឹង រស់នៅក្នុងភូមិអូរចិញ្ចៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ បានលើកដៃសំពះបញ្ចេញសម្លេងខ្សាវៗថា សូមសប្បុរសជនទីជិតទីឆ្ងាយអាណិតអាសូរដល់រូបគាត់ផង ជួយឧបត្ថម្ភជាម្ហូបអាហារណាដែលមានរសជាតិឆ្ងាញ់ៗបានទទួលទានមុនពេលលាចាកលោកនេះផង ។
ស្ត្រីម្នាក់ឈ្មោះ កែវ សុផា អាយុ៥៣ឆ្នាំ ប្តីឈ្មោះ ជុំ អឿន អាយុ៦០ឆ្នាំ រស់នៅភូមិ-ឃុំខាងលើបានប្រាប់ឲ្យដឹងនៅថ្ងៃទី២៨ ខែមិថុនា ឆ្នាំ២០១៦នេះថា ស្ត្រីចាស់ជរារូបនេះកាលពីមិនទាន់ដេកដួល រូបគាត់បានដើររើសអេតចាយលក់ចិញ្ចឹមជីវិត ហើយបានមកសុំសំយ៉ាបផ្ទះគាត់ស្នាក់នៅបណ្តោះអាសន្ន ។ បន្ទាប់ពីរូបគាត់មានជម្ងឺក៏ដេកនៅលើកន្ទេល ក៏មានអ្នកភូមិដែលរស់នៅជិតខាង រួមទាំងរូបគាត់ជាម្ចាស់ផ្ទះបានយកបាយម្ហូបអាហារជូនគាត់ពិសារដែរ តែជួនពេលខ្លះ អ្នករស់នៅជិតខាងមានការខ្វះខាតដែរ ហើយជាប់រវល់ចេញទៅរកស៊ីបាត់អស់ពីផ្ទះ ដូច្នេះរូបគាត់នឹងដេកដាច់អាហារក៏មានដែរ ៕
ចែករំលែកព័តមាននេះ