ត្រឹម១១ខែ! លោកតាវ័យជាង៨០ឆ្នាំ ចាក់វ៉ាក់សាំងបង្ការកូវីដ ដល់១២ដូស ប្រឈមជាប់គុ.ក
ឥណ្ឌា ៖ ជារឿងដ៏ភ្ញាក់ផ្អើលបំផុត បន្ទាប់ពីសារព័ត៌មាន Dailymail បានចេញផ្សាយកាលពីថ្ងៃទី១១ ខែមករា ឆ្នាំ២០២២ អំពី
ឥណ្ឌា ៖ ជារឿងដ៏ភ្ញាក់ផ្អើលបំផុត បន្ទាប់ពីសារព័ត៌មាន Dailymail បានចេញផ្សាយកាលពីថ្ងៃទី១១ ខែមករា ឆ្នាំ២០២២ អំពីលោកតាជនជាតិឥណ្ឌាម្នាក់ ដែលបានចាក់វ៉ាក់សាំងបង្ការកូវីដ-១៩ រហូតដល់១២ដូស ត្រឹមរយៈពេល១១ខែប៉ុណ្ណោះ។
លោកតា Brahamdev Mandal អាយុ៨៤ឆ្នាំ រស់នៅក្នុងភូមិ Orai ស្រុក Madhepura រដ្ឋ Bihar បានចាក់វ៉ាក់សាំងបង្ការកូវីដ១២ដូសរួចមកហើយ ក្នុងរយៈពេលត្រឹម១១ខែប៉ុណ្ណោះ ពោលគឺនៅចន្លោះថ្ងៃទី១៣ ខែកុម្ភះ ឆ្នាំ២០២១ ដល់ថ្ងៃទី៤ ខែមករា ឆ្នាំ២០២២ ហើយក្នុងចំណោម១២ដូសនោះ មាន២ដូសចាក់រំលងគ្នាត្រឹម៣០នាទីប៉ុណ្ណោះក្នុងថ្ងៃតែមួយ នៅមណ្ឌលសុខភាព Purraini កាលពីថ្ងៃទី១៣ ខែមេសា ឆ្នាំ២០២១។
លោក Mandal អតីតបុគ្គលិកប្រៃសណីយ៍អះអាងថា គាត់អាចចុះឈ្មោះចាក់វ៉ាក់សាំងជាបន្តបន្ទាប់បានដោយប្រើអត្តសញ្ញាណប័ណ្ណផ្សេងៗគ្នា ដើម្បីកុហកមន្ត្រីសុខាភិបាល។ គាត់បន្តថា គាត់ចង់មានអារម្មណ៍កាន់តែខ្លាំង អំឡុងពេលការរាតត្បាតនៃជំងឺកូវីដនេះ ហើយវាថែមទាំងបានជួយបំបាត់ការឈឺចាប់បញ្ហាសន្លាក់រ៉ាំរ៉ៃរយៈពេល៨ឆ្នាំរបស់គាត់ផងដែរ។
ប្រភពពី Dailymail បន្តថាលោក Mandal ត្រូវអាជ្ញាធរឥណ្ឌាចាប់បាន ក្រោយពេលចាក់ដូសទី១២ ហើយឥឡូវនេះ គាត់កំពុងប្រឈមមុខនឹងផ្លូវច្បាប់ ក្រោយរងការចោទប្រកាន់ពីបទក្លែងបន្លំពីសំណាក់ប៉ូលិសក្នុងភូមិដែលគាត់រស់នៅ និងកំពុងស្ថិតក្រោមការស៊ើបអង្កេត ដើម្បីបញ្ជាក់ការពិតអំពីរបៀបដែលគាត់អាចបំពា.នប្រព័ន្ធចាក់វ៉ាក់សាំងសុខាភិបាលជាតិ។
មន្ត្រីប៉ូលិសលោក Deepak Chandra Das បាននិយាយថា លោកតា Mandal ត្រូវបានឃុំខ្លួនក្រោមមាត្រា ១៨៨, ២១៩ និង ៤២០ នៃក្រមព្រហ្មទណ្ឌរបស់ឥណ្ឌា ប៉ុន្តែទោះជាយ៉ាងណា ជនជាប់ចោទអាចនឹងទទួលបានការបន្ធូរបន្ថយទោស ដោយសារវ័យរបស់គាត់៕
ចែករំលែកព័តមាននេះ