រាជធានីភ្នំពេញ ៖ បន្ទាប់ពីបើកប្រទេសឡើងវិញកាលពីដើមខែវិច្ឆិកា ២០២១ កន្លងទៅ សកម្មភាពជូញដូរវិស័យអចលទ្រព្យហាក់មិនទាន់មានអ្វីប្រែប្រួលខ្លាំងនោះទេ ។ ពិសេសតម្លៃនៅតាមតំបន់នានាឃើញថា នៅទ្រឹងនៅឡើយ ។
លោក សំ សុខនឿន ប្រធានសមាគមអចលនទ្រព្យសកលបានឲ្យដឹងថា រយៈពេល ២ ខែកន្លងមកនេះ សកម្មភាពវិនិយោគ និងតម្លៃអចលនទ្រព្យមិនទាន់មានការប្រែប្រួលខ្លាំងនោះទេ ។ ការទិញលក់អចលនទ្រព្យនៅក្រោយការបើកប្រទេសឃើញថា មានកំណើនបន្តិចបន្តួច ប៉ុន្តែសម្រាប់តម្លៃអចលនទ្រព្យមិនទាន់មានឃើញកំណើនគួរឱ្យកត់នោះទេ គឺនៅទ្រឹងនៅឡើយ ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានឱ្យដឹងថា តម្រូវការអចលនទ្រព្យនៅក្នុងប្រទេសកម្ពុជាក្រោយរដ្ឋាភិបាលបានបើកប្រទេសឡើងវិញ ភាគច្រើន គឺជាអ្នកក្នុងស្រុក ដោយវិនិយោគិនបរទេសមិនទាន់មានច្រើននៅឡើយទេ ។ លោកបន្តថា តម្រូវការជួលទីតាំងសម្រប់បើកអាជីវកម្មពីសំណាក់វិនិយោគិនក្នុងស្រុកឃើញថា មានសកម្មភាព តែមិនទាន់ខ្លាំង ពីព្រោះតែលំហូរអ្នកវិនិយោគចូលមកកម្ពុជានៅតែមានកម្រិតនៅឡើយ ។
លោក ប៉ូ អ៊ាវគង់ ថា ឆ្នាំ ២០២២ នេះ ការអភិវឌ្ឍវិស័យអចលនទ្រព្យនៅកម្ពុជានៅតែពឹងផ្អែកលើអ្នកវិនិយោគក្នុងស្រុកដដែល ។ ដូច្នេះ អ្នកវិនិយោគក្នុងស្រុកមានតួនាទីសំខាន់ក្នុងការអភិវឌ្ឍអចលនទ្រព្យក្នុងវិបត្តិកូវីដ ១៩ ។ លោកបន្ថែមថា ពាក់ព័ន្ធនឹងស្ថានភាពកូវីដ ១៩ ប្រភេទថ្មី អូមីក្រុងនេះ វានឹងមិនបង្កផលប៉ះពាល់ធ្ងន់ធ្ងរដល់សេដ្ឋកិច្ច និងអចលនទ្រព្យដូចឆ្នាំ ២០២១ កន្លងទៅនោះទេ ពីព្រោះអាជ្ញាធរ មានបទពិសោធន៍ក្នុងការទប់ស្កាត់ និងប្រឆាំងពីការរីករាលដាលនៃកូវីដ ១៩ រួចទៅហើយ ៕
ចែករំលែកព័តមាននេះ