រន្ធត់ ! រថយន្តបុកស្លា.ប់ប្រពន្ធ ប្តីនិងកូនរបួសធ្ងន់-ស្រាល
ខេត្តត្បូងឃ្មុំ ៖ គ្រោះថ្នាក់ចរាចរណ៍ដ៏រន្ធុតមួយបានកើតឡើងកាលពីវេលាម៉ោង១០ និង៤៥នាទីព្រឹក ថ្ងៃទី២៥ ខែមិថុនា ឆ្នាំ២០១៦ នៅលើផ្លូវជាតិលេខ៧ ត្រង់ចំណុចចន្លោះបង្គោល
ខេត្តត្បូងឃ្មុំ ៖ គ្រោះថ្នាក់ចរាចរណ៍ដ៏រន្ធុតមួយបានកើតឡើងកាលពីវេលាម៉ោង១០ និង៤៥នាទីព្រឹក ថ្ងៃទី២៥ ខែមិថុនា ឆ្នាំ២០១៦ នៅលើផ្លូវជាតិលេខ៧ ត្រង់ចំណុចចន្លោះបង្គោលគីឡូម៉ែត្រលេខ១៣៦-១៣៧ ស្ថិតនៅភូមិស្លាបក្តោង ឃុំជប់ ស្រុកត្បូងឃ្មុំ ខេត្តត្បូងឃ្មុំ រវាងម៉ូតូ និងរថយន្ត បណ្តាលឱ្យស្លាប់ស្ត្រីជាប្រពន្ធ ចំណែកបុរសជាប្តី និងកូនប្រុសតូចបានរងរបួសធ្ងន់-ស្រាល ។
លោកវរសេនីយ៍ត្រី សូ សារ៉ាត់ នាយការិយាល័យចរាចរណ៍ខេត្ត បានឱ្យដឹងថា ជនរងគ្រោះជាប្តីឈ្មោះ រុំ សារ៉ា អាយុ៤០ឆ្នាំ (រងរបួសស្រាល) ប្រពន្ធឈ្មោះពៅ ណារ៉េត អាយុ៣០ឆ្នាំ (ស្លាប់នៅកន្លែងកើតហេតុ) និងកូនប្រុសឈ្មោះ រ៉ា សារ៉ាត់ អាយុ៦ឆ្នាំ (រងរបួសធ្ងន់) ទាំង៣នាក់រស់នៅភូមិអណ្តូងជា ឃុំជីរោទិ៍ទី២ ស្រុកត្បូងឃ្មុំ ខេត្តត្បូងឃ្មុំ ។ ចំណែកអ្នកបើកបររថយន្តឈ្មោះ ឃួន ឃីម ភេទប្រុស អាយុ៣២ឆ្នាំ នៅភូមិពន្លៃ ឃុំកក់ ស្រុកពញាក្រែក ខេត្តត្បូងឃ្មុំ ត្រូវសមត្ថកិច្ចចាប់ខ្លួនបញ្ជូនទៅអធិការដ្ឋាននគរបាលស្រុកត្បូងឃ្មុំ ។
លោកវរសេនីយ៍ត្រី សូ សារ៉ាត់ បានឲ្យដឹងទៀតថា មុនពេលកើតហេតុ៣នាក់ប្តីប្រពន្ធនិងកូនប្រុសជិះម៉ូតូ១គ្រឿងម៉ាក ហុងដា ឌ្រីម ពណ៌ខ្មៅ ពាក់ស្លាកលេខ ភ្នំពេញ 1CF-1646 ចេញពីស្រុកោះសូទិនដើម្បីត្រឡប់មកផ្ទះ ក្នុងទិសដៅពីត្បូងមកជើង ខណៈពេលជិះឆ្លងផ្លូវមិនទាន់ផុតផងស្រាប់តែរថយន្តម៉ាកហ៊ីណូ ពណ៌បៃតង ពាក់ស្លាកលេខ ភ្នំពេញ 3A-5772 ដែលបើកក្នុងទិសដៅពីលិចទៅកើតបានបុកម៉ូតូតែម្តងជាហេតុបណ្តាលឱ្យស្ត្រីជា ប្រពន្ធស្លាប់ភ្លាមៗមួយរំពេច ។ ចំណែកប្តីនិងកូនប្រុសផ្លោងចេញពីម៉ូតូរងរបួសធ្ងន់-ស្រាល បង្កឱ្យមានការភ្ញាក់ផ្អើល ដល់ពលរដ្ឋ និង កម្លាំងសមត្ថកិច្ចដែលបានយាមប្រចាំការត្រង់ផ្លូវបំបែកជាបួនបានចេញមកអន្តរាគមន៍ភ្លាមៗផងដែរ ។
ក្រោយពេលកើតហេតុ អ្នកបើកបររថយន្តត្រូវបានចាប់ខ្លួនបញ្ជូនទៅកាន់អធិការដ្ឋាននគរបាលស្រុកត្បូងឃ្មុំ រួមទាំងវត្ថុតាងទាំងរថយន្ត និងម៉ូតូផងដែរ ។ ចំណែកសពជនរងគ្រោះប្រគល់ឲ្យសាច់ញាតិយកទៅធ្វើបុណ្យតាមប្រពៃណី ៕
ចែករំលែកព័តមាននេះ