រាជធានីភ្នំពេញ ៖ ទទួលភ្ញៀវទេសចរមិនបានប៉ុន្មានថ្ងៃផង ពេលនេះមានភ្ញៀវទេសចរបរទេសខ្លះបានផ្តើមលុបដំណើរកម្សាន្តមកកម្ពុជាវិញ ដោយសារវត្តមានអូមីក្រុង ។ លោក ធូន ស៊ីណាន ប្រធានសមាគមទីភ្នាក់ងារទេសចរណ៍អាស៊ីប៉ាហ្វិកកម្ពុជា…
រាជធានីភ្នំពេញ ៖ ទទួលភ្ញៀវទេសចរមិនបានប៉ុន្មានថ្ងៃផង ពេលនេះមានភ្ញៀវទេសចរបរទេសខ្លះបានផ្តើមលុបដំណើរកម្សាន្តមកកម្ពុជាវិញ ដោយសារវត្តមានអូមីក្រុង ។ លោក ធូន ស៊ីណាន ប្រធានសមាគមទីភ្នាក់ងារទេសចរណ៍អាស៊ីប៉ាហ្វិកកម្ពុជា បានឱ្យដឹងថា ការផ្ទុះវីរុសបំប្លែងអូមីក្រុងនៅលើសកលលោក ពិសេសនៅកម្ពុជាផងនោះ បានបង្កការព្រួយបារម្ភជាថ្មីដល់ដំណើរកម្សាន្ត ក្នុងវិស័យទេសចរណ៍ ។
លោកថា មេរោគកូវីដ ១៩ ប្រភេទអូមីក្រុង បានធ្វើឱ្យភ្ញៀវទេសចរអន្តរជាតិពីតំបន់មួយចំនួនលុបចោលការធ្វើដំណើរមកកម្ពុជា ។ «ឥឡូវនេះមេរោគអូមីក្រុង បានកំពុងតែលុកលុយនៅតំបន់អឺរ៉ុប និងតំបន់អាមេរិក និងបានធ្វើឱ្យភ្ញៀវមកពីតំបន់នោះ មានការរាំងស្ទះក្នុងការចេញធ្វើដំណើរកម្សាន្ត» ។
រាល់ការកក់ការធ្វើដំណើររបស់ភ្ញៀវទេសចរពីអឺរ៉ុប និងអាមេរិក នៅក្នុងអំឡុងខែមីនា ឆ្នាំ ២០២២ ខាងមុខនេះបានលុបចោលបណ្ដើរៗ ថ្វីត្បិតតែកម្ពុជាបើកទូលាយក៏ពិតមែន ។ អ្នកដំណើរដែលចូលមកកម្ពុជា ទាល់តែមានភាពចាំបាច់ទើបគាត់មក ដូច្នេះអ្នកដែលមិនចាំបាច់គេមិនមកដើរកម្សាន្តនោះទេក្នុងកាលៈទេសៈនេះ ។ លោក ធូន ស៊ីណាន បានបន្ថែមថា យើងមិនរំពឹងខ្ពស់ពីភ្ញៀវទេសចរមកពីប៉ែកអឺរ៉ុប និងអាមេរិកនោះទេ តែយើងរំពឹងភ្ញៀវទេសចរមកពីចិន ឥណ្ឌា និងប្រទេសអាស៊ាន មួយចំនួនទៀតជាដើម ។
យ៉ាងណាក្ដីបើតាមលោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការអាកាសចរស៊ីវិល បានឱ្យដឹងថា កំណើនអ្នកដំណើរចូលមកដល់អាកាសយានដ្ឋានអន្តរជាតិទាំងបីរបស់កម្ពុជា មានការកើនឡើងក្រោយថ្ងៃទី ១៥ ខែវិច្ឆិកា ឆ្នាំ ២០២១ បន្ទាប់ពីកម្ពុជាបន្ធូរបន្ថយវិធានចត្តាឡីស័ក ។ ប៉ុន្តែលោកថា អូមីក្រុង នឹងបង្កផលប៉ះពាល់វិស័យអាកាសចរណ៍ជាថ្មីបន្ទាប់រកឃើញនៅប្រទេសថៃ រួមទាំងកម្ពុជាផងដែរ ។
មន្ត្រីអាកាសចរណ៍បញ្ជាក់ថា បើសិនជាស្ថានភាពរាលដាលនៃមេរោគនេះនៅតែបន្តកើនឡើងច្រើន វានឹងប៉ះពាល់ធំប៉ុន្តែ បើសិនជាយើងអាចទប់ជាប់ វាប៉ះពាល់តិចតួច ឬក៏អាចមិនប៉ះពាល់តែម្ដង ។ លោក ស៊ីន ចាន់សិរីវុត្ថា ថា មកដល់ពេលនេះអ្នកដំណើរចំនួន និងជើងហោះហើរមិនទាន់មានថយចុះ ឬប៉ះពាល់ទេ ។
មកដល់ថ្ងៃទី ១១ ខែមករានេះ អ្នកឆ្លងថ្មីនៅកម្ពុជាមានចំនួន ៣៤ នាក់ ជាករណីនាំចូល ២៤ នាក់ និងឆ្លងសហគមន៍ ១០ នាក់ ជាប្រភេទអូមីក្រុង ។ ប្រមុខរដ្ឋាភិបាលបានអំពាវនាវឱ្យពលរដ្ឋប្រុងប្រយ័ត្ន និងនាំគ្នាទៅចាក់វ៉ាក់សាំងដូសជំរុញនៅក្នុងការទប់ស្កាត់ប្រភេទវីរុសបំប្លែងថ្មីអូមីក្រុងនេះ ៕
ចែករំលែកព័តមាននេះ