រាជធានីភ្នំពេញ ៖ ពិតជាគួរឱ្យស្ងើចសរសើរ និងមានមោទកភាពជាខ្លាំងចំពោះកូនខ្មែរមួយក្រុមបានអភិវឌ្ឍន៍កម្មវិធី App ថ្មីមួយតាមបចេ្ចកវិទ្យាទំនើប ដោយបានបំប្លែងសារសម្លេងនិយាយជាភាសាខ្មែរទៅជាអត្ថបទសរសេរ បានយ៉ាងអស្ចារ្យ ។
នោះ គឺកម្មវិធី App ថ្មីដែល មានឈ្មោះថា Khmer Automatic Speech Recognition ឬហៅថា (Khmer ASR) ។ Khmer ASR គឺជាប្រព័ន្ធដែលប្រើប្រាស់បច្ចេកវិទ្យាបញ្ញាសិប្បនិម្មិត (Artificial Intelligence) ក្នុងការបំប្លែងសំឡេងនិយាយ និងឯកសារសម្លេងជាភាសាខ្មែរ ទៅជាអត្ថបទសម្លេងដោយស្វ័យប្រវត្តិ ។ កម្មវិធីបំប្លែងសំឡេងទៅជាអត្ថបទឈ្មោះ Khmer ASR នេះ ត្រូវបានក្រសួងប្រៃសណីយ៍ និងទូរគមនាគមន៍ ដាក់ឱ្យដំណើរការជាផ្លូវការហើយនាពេលនេះ ក្រោយដាក់ដំណើរការសាកល្បងកាលពីខែមិថុនា ឆ្នាំ២០២១ កន្លងទៅ ។
ប្រព័ន្ធកម្មវិធីថ្មី Khmer ASR ត្រូវបានបង្កើតឡើងទាំងស្រុងដោយក្រុមអ្នកស្រាវជ្រាវវ័យក្មេងរបស់បណ្ឌិតសភាបច្ចេកវិទ្យា ឌីជីថល កម្ពុជា នៃក្រសួងប្រៃសណីយ៍ និងទូរគមនាគមន៍ ដោយការប្រើប្រាស់វិធីសាស្ត្ររួមបញ្ចូលគ្នា រវាង Statistical Learning និង Deep Learning ដែលជាវិធីសាស្ត្រថ្មីសម្រាប់បង្កើតប្រព័ន្ធស្វ័យប្រវត្តិកម្ម បំប្លែងសម្លេងនិយាយជាភាសាខ្មែរ ទៅជាអត្ថបទសរសេរភាសាខ្មែរបានយ៉ាងអស្ចារ្យ ។ ពិសេសវាជាកម្មវិធី ដែលបំប្លែងសម្លេងនិយាយ ទៅជាអត្ថបទសរសេរ ដែលមានលក្ខណៈស្មុគស្មាញ និងមានទិន្នន័យតិចក្នុងទម្រង់ឌីជីថល ។
សូមបញ្ជាក់ថា ប្រព័ន្ធកម្មវិធីថ្មី Khmer ASR នេះ អាចប្រើប្រាស់ក្នុងទូរស័ព្ទដៃតាមប្រព័ន្ធប្រតិបត្តិការ Android និង iOS និយាយដោយផ្ទាល់ជាភាសាខ្មែរ ឬពីឯកសារសំឡេងក្នុងទម្រង់ជា WAV, Mp3, M4a និង OGG បំប្លែងទៅជាអត្ថបទភាសាខ្មែរដោយស្វ័យប្រវត្តិ ពិតជាងាយស្រួល ពិតជាអស្ចារ្យ និងជួយសម្រួលកិច្ចការលោកអ្នកបានដោយងាយស្រួល ។
ហើយលោកអ្នកក៏អាចទាញយកកម្មវិធីសម្រាប់ ៖ Andriod https://bit.ly/KhmerASRAndroid និងសម្រាប់ iOS https://bit.ly/KhmerASR ៕
ចែករំលែកព័តមាននេះ