រាជធានីភ្នំពេញ ៖ ក្រៅពីការប្រកួតអន្តរជាតិនៅរសៀលថ្ងៃសៅរ៍នេះ នៅលើសង្វៀនទូរទស្សន៍អាស៊ីអាគ្នេយ៍ ក៏មានការប្រកួតចំនួន៤គូរវាងកីឡាករកម្ពុជា និងកីឡាករបរទេសផងដែរនៅថ្ងៃអាទិត្យទី២៦ មិថុនា ខានស្អែកនេះ ។
រាជធានីភ្នំពេញ ៖ ក្រៅពីការប្រកួតអន្តរជាតិនៅរសៀលថ្ងៃសៅរ៍នេះ នៅលើសង្វៀនទូរទស្សន៍អាស៊ីអាគ្នេយ៍ ក៏មានការប្រកួតចំនួន៤គូរវាងកីឡាករកម្ពុជា និងកីឡាករបរទេសផងដែរនៅថ្ងៃអាទិត្យទី២៦ មិថុនា ខានស្អែកនេះ ។ កីឡាករទាំង៨រូបនឹងបង្ហាញខ្លួន៤រូបនៅក្នុងការប្រកួតពេលព្រឹក និង៤រូបនៅក្នុងការប្រកួតពេលរសៀលដោយក្នុងមួយព្រឹត្តិការណ៍ៗគឺមានកីឡាករខ្មែរ២រូបនិងបរទេស២រូប ។
សម្រាប់ព្រឹតិ្តការណ៍«Ganzburg Top Fighter» ដែលចាប់ផ្ដើមពីម៉ោង៨ព្រឹក កីឡាករ ម៉ន វិរៈ មកពីក្លិបការិយាល័យទី៥កងទ័ពជើងគោក ប៉ះគ្នាជាមួយកីឡាករថៃឈ្មោះ យ៉ត ភីតអេក និងកីឡាករសូត្រ ប៊ុនធី មកពីក្លិបបក្សីស្លាបដែក ប៉ះគ្នាជាមួយកីឡាករថៃឈ្មោះ រ៉ាក់ ណងឡេក ។ សំអាងលើប្រវត្តិប្រកួតបាន១៤០លើក ឈ្នះ១២៥លើក ចាញ់១៤លើក និងស្មើ១លើក កីឡាករកម្ពុជាម៉ន វិរៈ ត្រូវគេជឿជាក់ថានឹងឈ្នះច្រើនជាង បើទោះជាលោកត្រូវគេមើលឃើញថា មិនមានសង្ឃឹមច្រើន ព្រោះកីឡាករថៃក៏មិនណយថ្វីដ្បិតទើបប្រកួតបាន៧៤លើក ឈ្នះ៥៩ ចាញ់១៣លើក និងស្មើ២លើកចាញ់ប្រៀបគេក្ដី។ មន្ត្រីជាអ្នកដឹកនាំកីឡាករថៃនៅតែជឿជាក់ថា កីឡាកររបស់គេនឹងធ្វើបានដោយអះអាងថា គេប្រកួតបានតិចជាងមែន ប៉ុន្តែសមត្ថភាពគេខ្លាំងហើយមានកម្រិតវាយលុកក៏ល្អ ។ មិនខុសគ្នាដែរ ភាគីខាងកីឡាករកម្ពុជាក៏ជឿជាក់លើកូនសិស្សរបស់ខ្លួនដែរ ។
ងាកទៅកាន់គូទី២វិញ កីឡាករសូត្រ ប៊ុនធី ដែលធ្លាប់ប្រកួតបាន៧៤លើក ឈ្នះ៦៤លើក ចាញ់៩លើក និងស្មើ១លើក ក៏មានជំនឿចិត្តថានឹងទទួលជ័យជម្នះមិនអន់ផងដែរ បន្ទាប់ពីដឹងថាកីឡាករថៃជាគូប្រកួតរបស់គេធ្លាប់ប្រកួតបានតែ៦១លើក ឈ្នះ៥២លើក និងចាញ់៩លើក។ នោះគឺដោយសារតែយល់ឃើញថា កីឡាករថៃមានភាគរយប្រកួតតិចជាងគេទើបធ្វើឱ្យកីឡាករកម្ពុជាជឿជាក់ ។ គូនេះអ្នកឃ្លាំមើលពិបាកបង្ហាញអារម្មណ៍ទុកចិត្ត ដោយសារតែកីឡាករថៃថ្វីដ្បិតថាមានភាគរយទាបជាង ប៉ុន្តែកីឡាករថៃត្រូវគេដឹងជាទូទៅហើយថា កាន់តែល្បីកាន់តែឡើង ដែលខុសពីសូត្រ ប៊ុនធី ពេលខ្លះក៏ធ្លាក់ដៃ ពិបាកទុកចិត្ត ។ ទោះបីយ៉ាងណា ចំពោះលទ្ធផលជាក់ស្ដែងគឺមានតែការប្រកួតត្រូវបានបញ្ចប់ប៉ុណ្ណោះទើបកាត់ក្ដីបាន ។
សម្រាប់សមាសភាព៤រូបផ្សេងទៀតនៅថ្ងៃអាទិត្យនោះដែរ គឺកីឡាករធី តុងហ៊ី មកពីក្លិបសាលវ័ន្តកីឡា ត្រូវប្រកួតជាមួយកីឡាករថៃ ឈ្មោះថា ហ៊ានអ៊េក និងកីឡាករមឿន សុខហ៊ុច មកពីក្លិបពុទ្ធសេរីវង្សកីឡា ត្រូវប្រកួតជាមួយកីឡាករថៃឈ្មោះ ផា យ៉ាក់ណយ ។ ការប្រកួតរបស់កីឡាករទាំង៤រូបនេះ មិនគ្រាន់តែជាការប្រកួតចាញ់ឈ្នះដើម្បីស្ទាបស្ទង់សមត្ថភាពនោះទេ ប៉ុន្តែក៏ជាការប្រកួតដណ្ដើមពិន្ទុសម្រាប់បោះជំហានទៅរកការដណ្ដើមចំណាត់ថ្នាក់ជើងឯកផងដែរ ។ អ្នកទាំង៤រូបនឹងប៉ះគ្នានៅក្នុងព្រឹត្តិការណ៍ប្រដាល់ជើងឯកអន្តរជាតិស្រាបៀរកម្ពុជា ចាប់ពីម៉ោង២រសៀលទៅ បន្ទាប់ពីព្រឹត្តិការណ៍នេះត្រូវបានដំណើរការប្រកួតកន្លងមករួចមកហើយ សម្រាប់កីឡាករកម្ពុជានិងបរទេសទាំង៤រូប ។ ឆ្លងកាត់ការប្រកួតបាន៩៩លើក ឈ្នះ៧៨លើក ចាញ់១៨លើក និងស្មើ៣លើក ធី តុងហ៊ី មិនមានសង្ឃឹមច្រើនណាស់ណាទេ ក្នុងការយកបាន៣ពិន្ទុ ដោយសារតែកីឡាករថៃបានឆ្លងកាត់ការប្រកួតដល់១២៨លើក ឈ្នះ១០៦លើក ចាញ់២០លើក និងស្មើ២លើក ។ សម្រាប់ការប្រកួតដណ្ដើមពិន្ទុមួយគូទៀត មឿន សុខហ៊ុច ធ្លាប់ប្រកួតបាន១១៤លើក ឈ្នះ៨៩លើក ចាញ់២១លើក និងស្មើ៤លើក ក្នុងពេលដែលកីឡាករថៃជាគូប្រកួត ឡើងរេញបាន៨១លើក ឈ្នះ៦៩លើក ចាញ់១១លើក ដែលត្រូវគេមើលឃើញថាពិតជាមិនងាយស៊ីយក៣ពិន្ទុដោយស្រួល បើទោះជាមានប្រវត្តិប្រកួតច្រើនជាងថៃក្ដី ៕
ចែករំលែកព័តមាននេះ