រាជធានីភ្នំពេញ ៖ ក្រសួងធនធានទឹក និងឧតុនិយមបានបញ្ជាក់ថាចាប់ពីថ្ងៃទី១២ ដល់១៨ មករា ខាងមុខនេះ តំបន់មួយចំនួនរបស់កម្ពុជានឹងចុះត្រជាក់រហូតដល់១៥អង្សាសេ ។
យោងតាមសេចក្តីជូនដំណឹងស្តីពីស្ថានភាពធាតុអាកាស ចាប់ពីថ្ងៃទី១២-១៨ ខែមករា ឆ្នាំ២០២២ របស់ក្រសួងធនធានទឹក នៅថ្ងៃទី១១មករា បានលើកឡើងថា ទ្រនុងសម្ពាធខ្ពស់ពីប្រទេសចិននឹងរំកិលចុះមកក្រោមគ្របដណ្តប់លើកម្ពុជាជាមួយ និងខ្យល់មូសុងឦសានបក់ក្នុងល្បឿនបង្ហួរ ។
ក្រសួងថា ស្ថានភាពបែបនេះនឹងធ្វើឲ្យបណ្តាខេត្តនៅតំបន់វាលទំនាបកណ្ដាលមានសីតុណ្ហភាពអប្បបរមា មានពី១៨-២១ អង្សាសេនឹងសីតុណ្ហភាពអតិបរមាមានពី៣០-៣២អង្សាសេ ។ ចំណែកបណ្តាខេត្តជាប់ជួរភ្នំដងរែក និងខ្ពង់រាបឦសានមានសីតុណ្ហភាពអប្បបរមា មានពី១៥-១៨ អង្សាសេ សីតុណ្ហភាពអតិបរមាមានពី២៨-៣០អង្សាសេ ។ បណ្តាខេត្តស្ថិតនៅក្នុងភូមិសាស្ត្រជួរភ្នំដងរែក និងខ្ពង់រាបឦសាន សីតុណ្ហភាពអប្បបរមានឹងអាចធ្លាក់ចុះមកនៅក្នុងរង្វង់ ១៥°C ។
ចំណែកតំបន់មាត់សមុទ្រមានសីតុណ្ហភាពអប្បបរមា មានពី ១៩-២២អង្សាសេនឹងសីតុណ្ហភាពអតិបរមាមានពី៣០-៣២អង្សាសេ ៕
ចែករំលែកព័តមាននេះ