រាជធានីភ្នំពេញ ៖ កាលពីថ្ងៃទី២២ មិថុនា កន្លងមកនេះ នៅទីស្នាក់ការគណៈកម្មាធិការជាតិអូឡាំពិកកម្ពុជា មានធ្វើពិធីចុះហត្ថលេខាលើអនុស្សរណៈយោគយល់ស្ដីពីកិច្ចសហការ រៀបចំចងក្រង និងបណ្ដុះបណ្ដាលក្បាច់គុនដល់កងយោធពលខេមរភូមិន្ទ ។
ពិធីចុះហត្ថលេខានេះ មានក្បាច់គុនចំនួន៣ដែលនឹងត្រូវរៀបចំដាក់ឱ្យកងយោធពលខេមរភូមិន្ទធ្វើការហ្វឹកហាត់នោះ មានក្បាច់គុនល្បុក្កតោ យុទ្ធគុនខម និងក្បាច់ប្រដាល់បុរាណខ្មែរ ។ តំណាងឱ្យសហព័ន្ធកីឡាក្បាច់គុនទាំង៣ ដែលត្រូវចុះអនុស្សរណៈនាពេលនោះ មានលោកឧត្តមសេនីយ៍ តែម ម៉ឺន ប្រធានសហព័ន្ធកីឡាប្រដាល់កម្ពុជា លោក វ៉ាត់ ចំរើន ប្រធានសហព័ន្ធកីឡាល្បុក្កតោ លោក យូ ស៊ីណែត ប្រធានសមាគមយុទ្ធគុនខម និងលោកឧត្តមសេនីយ៍ ហ៊ុន ម៉ាណែត អនុប្រធានគណៈកម្មការរៀបចំក្បាច់គុននៃកងយោធពលខេមរភូមិន្ទ ។ ពិធីនោះ ក៏មានការចូលរួមធ្វើជាសាក្សីពីសំណាក់លោកនាយឧត្តមសេនីយ៍ ឥត សារ៉ាត់ អគ្គមេបញ្ជាការរងនៃកងយោធពលខេមរភូមិន្ទ លោកបណ្ឌិត ថោង ខុន ប្រធានគណៈកម្មាធិការជាតិអូឡាំពិកកម្ពុជា ។
លោកបណ្ឌិត ថោង ខុន បានមានប្រសាសន៍ថា ការដាក់បញ្ចូលក្បាច់គុនទៅក្នុងកម្មវិធីហ្វឹកហាត់របស់កងយោធពលខេមរភូមិន្ទនាពេលនេះ លោកសូមគាំទ្រយ៉ាងពេញទំហឹង ហើយលោកក៏បានគិតថា គឺជាទស្សនៈវែងឆ្ងាយដើម្បីធ្វើឱ្យក្បាច់គុនបុរាណខ្មែរមានការរីកចម្រើនទាំងថ្នាក់ជាតិ-អន្តរជាតិ ។ ម្យ៉ាងវិញទៀត ក្បាច់គុនបុរាណខ្មែរ មិនត្រឹមតែបានដាក់បញ្ចូលទៅក្នុងការប្រកួតកីឡាស៊ីហ្គេមឆ្នាំ២០២៣ប៉ុណ្ណោះទេ ថែមទាំងត្រូវបានយកមកបង្ហាញនៅក្នុងពិធីបើកការប្រកួតផងដែរ ដែលត្រូវការមនុស្សចំនួន៥ពាន់នាក់ ។
លោក វ៉ាត់ ចំរើន បានមានប្រសាសន៍ថា នេះគឺជាថ្ងៃប្រវត្តិសាស្ត្រសម្រាប់កម្ពុជា ដែលបានយកក្បាច់គុនបុរាណខ្មែរទាំង៣មកច្របាច់ចូលគ្នាសម្រាប់ដាក់ឱ្យកងយោធពលខេមរភូមិន្ទធ្វើការហ្វឹកហាត់ ។ ក្បាច់គុនល្បុក្កតោ ដែលជាកេរមរតករបស់ខ្មែរនឹងត្រូវរៀបចំធ្វើការចងក្រងឱ្យរួចរាល់នៅចុងឆ្នាំ២០១៦នេះ ដើម្បីបញ្ជូនឯកសារទៅអង្គការUNESCO ដាក់បញ្ចូលទៅក្នុងសម្បត្តិវប្បធម៌អរូបីរបស់មនុស្សជាតិនៅក្នុងឆ្នាំ២០១៧ខាងមុខ ។
លោកនាយឧត្ដមសេនីយ៍ ឥត សារ៉ាត់ បានមានប្រសាសន៍ថា ពេលនេះ ជាយុគសម័យថ្មីនៃការរីកចម្រើនខានសព្វាវុធ ប៉ុន្តែយើងក៏មិនអាចបំភ្លេចនូវក្បាច់គុនដែរ ជាពិសេសកងរាជអាវុធហត្ថដែលត្រូវការជាចាំបាច់ក្នុងការបង្ក្រាបបទល្មើសផ្សេងៗ ។ ម្យ៉ាងវិញទៀត ក៏ជាការរួមចំណែកក្នុងការការពារនិងថែរក្សាកេរដំណែលដូនតារបស់យើងឱ្យបានគង់វង្សផងដែរ ៕
ចែករំលែកព័តមាននេះ