រាជធានីភ្នំពេញ ៖ នៅយប់ថ្ងៃអាទិត្យទី២៦ មិថុនា កម្មវិធីប្រកួតប្រដាល់«កំពូលជើងឯកស្រាបៀរប្លេកខេត» នឹងដល់កំណត់ត្រូវប្រកួតអន្តរជាតិទៀតហើយ ដោយបានប្រកាសបើករេញឲ្យកីឡាករកម្ពុជា២រូបគឺកីឡាករ ឡុង សុភី និង ហ៊ឹម សេរី ឡើងប្រកួតជាមួយកីឡាករថៃ ។ ព្រឹត្តិការណ៍នោះ គេនៅមិនទាន់ដឹងថា អ្នកណានឹងឈ្នះអ្នកណានៅឡើយទេ ដោយសារតែថៃក៏អួតរឿងខ្លាំង ហើយកីឡាករកម្ពុជាក៏អួតថាខ្លួនមិនណយ។
ការប្រកួតដែលនឹងធ្វើឡើងនៅលើសង្វៀនទូរទស្សន៍អាស៊ីអាគ្នេយ៍នោះ នឹងចាប់ផ្ដើមឡើងពីម៉ោង៨យប់តទៅដោយមានការរំពឹងជាច្រើនថា នឹងមានអ្នកទស្សនាមិនខុសគ្នាពីការប្រកួតអន្តរជាតិរៀងរាល់២សប្ដាហ៍ម្ដងនោះទេ ដោយសារតែសមាសភាពដែលតម្រូវឱ្យប៉ះគ្នា គឺមានក្រេឌីតល្អ ។ កីឡាករកម្ពុជា២រូប គឺឡុង សុភី និងហ៊ឹម សេរី ក្លាយជាគូប្រកួតស៊ីសាច់ហុតឈាមជាមួយកីឡាករថៃនៅយប់ថ្ងៃអាទិត្យ ដែលនឹងមកដល់នៅចុងសប្ដាហ៍នេះ។ អ្នករៀបចំការប្រកួតបានអះអាងថា កីឡាករទាំង៤មានបំណងប៉ះគ្នាយូរហើយ មុនពេលមានការសម្រេចរៀបចំព្រឹត្តិការណ៍អន្តរជាតិរបស់ស្រាបៀរប្លេកខេតឱ្យពួកគេប្រកួតគ្នានេះ ។
លោកញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា កីឡាករឡុង សុភី មកពីក្លិបសាលវ័ន្ដកីឡា នឹងប្រកួតជាមួយកីឡាករថៃឈ្មោះ ណារ៉ាក់ ដែលកីឡាករទាំងពីរសុទ្ធតែពេញកម្លាំងដូចគ្នា ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោក ឡុង សាលវ័ន្ដ ជាបងប្រុស និងជាគ្រូបង្វឹកបានស្នើឱ្យកូនសិស្សរបស់ខ្លួនប៉ះប្រកួតជាមួយកីឡាករថៃរូបនេះផង បន្ទាប់ពីបានដឹងថា ណារ៉ាក់ ត្រូវគេស្គាល់ថា ជាជើងខ្លាំងរបស់ថៃ ។ លោកថា គ្រូបង្វឹកប្រចាំក្លិបសាលវ័ន្ដកីឡាបានទទូចឱ្យកូនសិស្សរបស់ខ្លួនឡើងប្រកួតដើម្បីដកស្រង់បទពិសោធន៍ និងបង្ហាញសមត្ថភាពជាមួយកីឡាករថៃ ។ លោកជឿជាក់ទៅលើសមត្ថភាពពូកែគេច និងពូកែវាយសន្ធាប់របស់កីឡាករ ឡុង សុភី ដោយសារតែក្រៅពីមានបច្ចេកទេសល្អ ក៏មានកម្លាំងពេញព្រោះតែនៅពេញកម្លាំង ។ លោកនិយាយថា៖ «សម្រាប់គូនេះ កីឡាករថៃខ្លាំង ប៉ុន្តែមកពីខ្ញុំទុកចិត្តលើ ឡុង សុភី ជាង ទើបហ៊ានឱ្យប្រកួតជាមួយកីឡាករថៃម្នាក់ហ្នឹង!» ។ លោកថា កីឡាករថៃ ណារ៉ាក់ ធ្លាប់ប្រកួតបាន៧៦លើក ឈ្នះ៦៣លើក ចាញ់១២លើក និងស្មើ១លើក ក្នុងពេលដែលកីឡាករកម្ពុជាគូនេះ ក៏ធ្លាប់ប្រកួតបានច្រើនរហូតដល់១៣៥លើក ឈ្នះ១០៥លើក ចាញ់២៣លើក និងស្មើ៧លើក។
សម្រាប់ ហ៊ឹម សេរី ដែលអ្នកណាក៏ស្គាល់ថា ជាកីឡាករល្អម្នាក់មកពីក្លិបតាព្រហ្មមានជ័យ លោក ញាណ សុធី ក៏បានបញ្ជាក់ថា ថ្វីដ្បិតតែគេខានប្រកួតយូរ និងមើលទៅចុះខ្សោយជាងមុន តែលោកថា គេក៏មានសមត្ថភាព និងមានបច្ចេកទេសពិបាកមើលស្រាលផងដែរ ។ លោកសម្រេចឱ្យ ហ៊ឹម សេរី ជួបប្រកួតជាមួយកីឡាករថៃឈ្មោះ ចាក់ រឺនថង ដោយសារតែយល់ឃើញថាអ្នកទាំងពីរសុទ្ធតែមើលទៅនៅមានសមត្ថភាពល្អដូចគ្នា ។ លោកថា ព្រឹត្តិការណ៍ប្រដាល់អន្តរជាតិរបស់ស្រាបៀរ Black Cat នឹងទទួលបានការចាប់អារម្មណ៍ដោយសារតែកីឡាករកម្ពុជា និងថៃទាំង២គូសុទ្ធតែមានសមត្ថភាព ។ លោកថា ការប្រកួតរបស់គូនេះ នៅមិនទាន់ដឹងថា អ្នកណាល្អជាងអ្នកណានោះទេ ប៉ុន្តែការប្រកួតទាំងមូលទំនងជានឹងស្វិតស្វាញ ដោយសារតែកីឡាករកម្ពុជាក៏ត្រូវការឈ្នះ ហើយកីឡាករខាងថៃក៏ជាជើងខ្លាំងដែលនឹងមិនបណ្ដោយឱ្យភ្លាត់នៅលើសង្វៀន ។ លោកថា កីឡាករថៃធ្លាប់ប្រកួតបាន៥៥លើក ឈ្នះ៤៥លើក និងចាញ់១០លើក រីឯកីឡាករកម្ពុជាធ្លាប់ប្រកួតបាន៦៩លើក ឈ្នះ៦០លើក និងចាញ់៩លើក ។
ក្រុមអ្នកគាំទ្របានផ្ដោតការចាប់អារម្មណ៍ជាមួយការប្រកួតរបស់កីឡាករទាំង៤រូបខាងលើយ៉ាងខ្លាំង ដោយសារតែសមាសភាពទាំងកម្ពុជា និងថៃ សុទ្ធតែជាកីឡាករល្អ និងជាកីឡាករដែលមានកេរ្តិ៍ឈ្មោះនៅលើសង្វៀន ។ ភាគីកីឡាករឡុង សុភី និង ហ៊ឹម សេរី សុទ្ធតែអះអាងថាត្រៀមខ្លួនគ្រប់គ្រាន់ ដោយសារតែការប្រកួតរបស់គេគឺត្រូវការឈ្នះទៅលើកីឡាករថៃ ។ ទោះបីយ៉ាងណា លោកថៃ អ៊ូ អ្នកដឹកនាំកីឡាករថៃឱ្យមកប្រកួតនៅលើសង្វៀនទូរទស្សន៍អាស៊ីអាគ្នេយ៍ក៏បានបង្ហាញការទុកចិត្តចំពោះកីឡាកររបស់ខ្លួនដូចគ្នា សម្រាប់ការប៉ះប្រកួតជាមួយកីឡាករកម្ពុជានៅលើសង្វៀនBlack Cat ផងដែរ ៕
ចែករំលែកព័តមាននេះ