រាជធានីភ្នំពេញ ៖ ប្រតិភូកីឡាវាយកូនបាល់កម្ពុជាចំនួន១០រូប ត្រៀមទៅចូលរួមប្រកួតក្នុងក្របខ័ណ្ឌDavis Cup លើកទី៥នៅប្រទេសអីុរ៉ង់ នាដើមខែកក្កដា ខាងមុខនេះ។
លោក ជា ពៅ គ្រូបង្វឹកក្រុមជម្រើសជាតិកីឡាវាយកូនបាល់បានឱ្យដឹងថា កម្ពុជាត្រៀមបញ្ជូនប្រតិភូកីឡាវាយកូនបាល់ចំនួន១០រូបទៅប្រកួតក្នុងក្របខ័ណ្ឌ Davis Cup លើកទី៥នៅប្រទេសអីុរ៉ង់ ក្នុងនោះមានកីឡាករ៥រូបដែលដឹកនាំដោយលោក ទេព រិទ្ធីវិទ្ធ អគ្គលេខាធិការសហព័ន្ធកីឡាវាយកូនបាល់កម្ពុជា។ ចំណែកកីឡាករទាំង៥រូបនោះមានប៊ុន កេន្នី, តាន់ នីសាន់, ឡុង សំនៀង, ម៉ម ផល្គុន និងម៉ម វិទូ ។ ការប្រកួតធ្វើឡើងចាប់ពីថ្ងៃទី១១ កក្កដា ដល់ថ្ងៃទី១៦កក្កដា នៅទីក្រុងTesheran ប្រទេសអីុរ៉ង់ ប៉ុន្តែប្រតិភូកីឡាកម្ពុជា ចេញដំណើរនៅថ្ងៃទី៧ កក្កដា ។ ចំណែកវិញ្ញាសាដែលត្រូវប្រកួត គឺវាយគូនិងវាយ១ទល់១ ។
គួររំលឹកផងដែរថា ការប្រកួតកីឡាវាយសីក្របខ័ណ្ឌ Davis Cup នេះ គឺជាការប្រកួតក្នុងបណ្ដាប្រទេសទ្វីបអាស៊ីដែលមានតែ៨ប្រទេសប៉ុណ្ណោះចូលរួម ក្នុងនោះមានកម្ពុជា ចិនហុងកុង អីុរ៉ង់ ការតា សិង្ហបុរី ស៊ីរី និងតួកមេនីស្ថាន ។ កាលពីឆ្នាំ២០១១ កម្ពុជាស្ថិតនៅក្នុងកម្រិតទី៤ ប៉ុន្តែក្រោយពីកម្ពុជាប្រកួតឈ្នះមេដាយមាសនៅទីក្រុងដូហា ក្នុងឆ្នាំ២០១២ កម្ពុជាមានឱកាសឡើងមកប្រកួតនៅក្នុងកម្រិតទី៣ ។ កម្ពុជានៅតែមានមហិច្ឆតាចង់ឡើងទៅប្រកួតនៅក្នុងកម្រិតទី២ជាបន្តទៀត ។ ដោយឡែកសម្រាប់កម្រិតទី១នោះ កម្ពុជា មិនទាន់ហ៊ានប្រាថ្នាឡើយ ព្រោះវាជាកម្រិតខ្ពស់ដែលមិនងាយនឹងបានទៅដល់ ៕
ចែករំលែកព័តមាននេះ