កីឡាអេឡិចត្រូនិក បើកការប្រកួត ក្នុងទិសដៅស៊ីហ្គេម ឆ្នាំ២០២៣
- ភ្នំពេញ
ភ្នំពេញ៖ ការប្រកួតកីឡាអេឡិកត្រូនិកថ្មីមួយ លើវិញ្ញាសា Mobile Legend ពានរង្វាន់ T.Y Media E-Champion រដូវកាលទី១…
ភ្នំពេញ៖ ការប្រកួតកីឡាអេឡិកត្រូនិកថ្មីមួយ លើវិញ្ញាសា Mobile Legend ពានរង្វាន់ T.Y Media E-Champion រដូវកាលទី១…
ភ្នំពេញ៖ ការប្រកួតកីឡាអេឡិកត្រូនិកថ្មីមួយ លើវិញ្ញាសា Mobile Legend ពានរង្វាន់ T.Y Media E-Champion រដូវកាលទី១ បានប្រកាសដំណើរការហើយ ចាប់ពីថ្ងៃទី១០ ខែកុម្ភៈ ដល់ថ្ងៃទី៣ ខែមេសា ឆ្នាំ២០២២ នៅរាជធានីភ្នំពេញ។ ព្រឹត្តិការណ៍ដ៏ធំមួយនេះ គឺជាចំណែកដ៏សំខាន់ ក្នុងការរួមចំណែកអភិវឌ្ឍនធានធាន ប្រកបដោយគុណភាព ឆ្ពោះទៅទទួលធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់ព្រះរាជាណាចក្រកម្ពុជា។
នៅក្នុងសន្និសីទសារព័ត៌មាន នៅល្ងាចថ្ងៃទី៩ ខែមករា ឆ្នាំ២០២២ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) លោក លន់ សាមឌី អគ្គលេខាធិការ សហព័ន្ធកីឡារអេឡិចត្រូនិកកម្ពុជា បានចាត់ទុកថា ពានរង្វាន់ T.Y Media E-Champion រដូវកាលទី១នេះ គឺជាព្រឹត្តិការណ៍ដ៏ធំមួយ ក្នុងការជួយជំរុញការអភិវឌ្ឍគុណភាពសមត្ថភាពកីឡាករ កាន់តែរីកចម្រើនបន្ថែមទៀត ពីព្រោះថាវិស័យកីឡាអេឡិចត្រូនិកមានបេសកម្មធំៗ ចំនួនពីរ គឺត្រៀមចូលរួមប្រកួតកីឡា ស៊ីហ្គេម លើកទី៣២ នៅប្រទេសវៀតណាម នាខែឧសភា ឆ្នាំ២០២២ និងត្រៀមឆ្ពោះទៅទទួលរៀបចំធ្វើជាម្ចាស់ផ្ទះ កីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា។
លោកបន្ថែមថា ការប្រកួតលើវិញ្ញាសា Mobile Legendពានរង្វាន់ T.Y Media E-Champion គឺវិញ្ញាសាមួយដ៏សំខាន់ដូចវិញ្ញាសាផ្សេងៗទៀតដែរ ក្នុងការបង្កើតឱកាសថ្មីមួយ ក្នុងការបង្កើនសមត្ថភាពកីឡាករ ត្រៀមចូលរួមប្រកួតធំៗនាពេលខាងមុខ។
តាមរយៈការប្រកួតនេះ លោកសង្ឃឹមថា នឹងរកបាននូវលទ្ធផលល្អប្រសើរ និងទទួលបានបទពិសោធន៍ថ្មីៗបន្ថែមទៀត។
លោក ធី វ៉ាយ អគ្គនាយកក្រុមហ៊ុន ធី វ៉ាយ មេឌា & អ៊ែតវើថាយស៊ីង (ឯ.ក) បានបង្ហាញនូវក្តីរីករាយ ចំពោះកិច្ចសហប្រតិបត្តិការយ៉ាងល្អរវាងសហព័ន្ធកីឡាអេឡិចត្រូនិកកម្ពុជា ក្នុងការផ្តល់ទំនុកចិត្តដល់ក្រុមហ៊ុនរបស់លោក ដើម្បីរួមចំណែកក្នុងការអភិវឌ្ឍវិស័យកីឡាអេឡិចត្រូនិកនៅកម្ពុជា។
ការរៀបចំការប្រកួតនេះ ពិតជាមានសារៈសំខាន់ ក្នុងការបង្កើនធនធានកីឡាករ កីឡាការិនី និងមន្ត្រីបច្ចេកទេស ក្នុងការរៀបចំការប្រកួត ឆ្ពោះទៅឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះការរៀបចំកីឡាអាស៊ីអាគ្នេយ៍ លើកទី៣២។ ជាពិសេស ការប្រកួតនេះ មានប្រាក់រង្វាន់សរុប ១០០លានរៀល ក្នុងនោះចំណាត់ថ្នាក់លេខ១ ទឹកប្រាក់ ៥០ ០០០ ០០០រៀល, លេខ២ ទឹកប្រាក់ ២៥ ០០០ ០០០រៀល, លេខ៣ ទឹកប្រាក់ ១៥ ០០០ ០០០រៀល, លេខ៤ ទឹកប្រាក់ ៤ ០០០ ០០០រៀល។ លើសពីនេះទៅទៀត ក៏មានប្រាក់រង្វាន់លើកទឹកចិត្ត សម្រាប់ ៤ក្រុម ដែលមិនបានទៅវគ្គបន្ត ដោយក្នុង ១ក្រុម ទទួលបានប្រាក់រង្វាន់ ១ ៥០០ ០០០រៀល។
លោកអគ្គនាយកក្រុមហ៊ុនរូបនេះ បានបង្ហាញនូវការប្តេជ្ញាចិត្តខ្ពស់ថា ក្រុមហ៊ុននឹងបន្តការរៀបចំនៅរដូវកាលក្រោយៗទៀត ដើម្បីបន្តគាំទ្រយ៉ាងសកម្ម ក្នុងការជួយដល់ការអភិវឌ្ឍវិស័យកីឡាអេឡិចត្រូនិកកម្ពុជា ឲ្យកាន់តែរីកចម្រើនបន្ថែមទៀត៕
ចែករំលែកព័តមាននេះ