រាជធានីភ្នំពេញ ៖ បុរសអ្នករត់តាក់ស៊ីវ័យជាង៤០ឆ្នាំម្នាក់ចុកពោះខ្លាំងពេក ចូលទៅព្យាបាលនៅគ្លីនិកឯកជនមួយកន្លែង តែគ្រូពេទ្យមិនទាន់បានពិនិត្យផង ក៏សុំចូលបន្ទប់ទឹកស្រាប់តែ
រាជធានីភ្នំពេញ ៖ បុរសអ្នករត់តាក់ស៊ីវ័យជាង៤០ឆ្នាំម្នាក់ចុកពោះខ្លាំងពេក ចូលទៅព្យាបាលនៅគ្លីនិកឯកជនមួយកន្លែង តែគ្រូពេទ្យមិនទាន់បានពិនិត្យផង ក៏សុំចូលបន្ទប់ទឹកស្រាប់តែខ្យល់គដួលស្លាប់នៅក្នុងបន្ទប់ទឹកតែម្តង ។ ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៥ និង៥៥នាទីល្ងាច ថ្ងៃទី២២ ខែមិថុនា ឆ្នាំ២០១៦ នៅគ្លីនិកឯកជនយីហោ «បន្ទប់ពិគ្រោះព្យាបាលជម្ងឺ គង់ ធី ព្រែកឯង» ដែលមានអាសយដ្ឋានផ្ទះលេខ២ ផ្លូវជាតិលេខ១ ស្ថិតក្នុងភូមិទួលតាបាន់ សង្កាត់ព្រែកឯង ខណ្ឌច្បារអំពៅ ។
ជនរងគ្រោះមានឈ្មោះ ពុន រស្មី ភេទប្រុស អាយុ៤៧ឆ្នាំ មុខរបររត់តាក់ស៊ី ស្នាក់នៅភូមិអំពិលទឹក ឃុំកំពង់ភ្នំ ស្រុកលើដែក ខេត្តកណ្ដាល ។
តាមសំដីសមត្ថកិច្ចបានឲ្យដឹងថា សាក្សីម្នាក់បាននិយាយថា គាត់កំពុងតែមកពិនិត្យជំងឺនៅគ្លីនិកខាងលើ ស្រាប់តែឃើញជនរងគ្រោះខាងលើបានចុះពីលើរថយន្តតាក់ស៊ីរួចដើរចូលទៅក្នុងគ្លីនិក ដោយប្រាប់គ្រូពេទ្យថា ចុកពោះខ្លាំងណាស់ ពេលនោះដែរគ្រូពេទ្យកំពុងតែរវល់ពិនិត្យអ្នកជំងឺផ្សេងទៀតមិនទាន់បានពិនិត្យជនរងគ្រោះទេ ហើយជនរងគ្រោះរូបនោះបានដើរទៅអង្គុយលើគ្រែពេទ្យ បន្ទាប់មកបានសុំគ្រូពេទ្យចូលទៅក្នុងបន្ទប់ទឹក ស្រាប់តែចូលទៅបាត់ឈឹងតែម្តង ។
តាមសម្តីគ្រូពេទ្យប្រចាំនៅគ្លីនិកខាងលើបាននិយាយថា រូបគាត់បានឃើញជនរងគ្រោះខាងលើបានដើរចូលមកក្នុងគ្លីនិករបស់គាត់ តែមិនដឹងថា ជនរងគ្រោះនោះជិះអ្វីមកនោះទេ នៅពេលចូលមកជនគ្រោះបានប្រាប់ថា ចុកពោះខ្លាំងណាស់ ពេលរូបគាត់ជាគ្រូពេទ្យកំពុងជាប់ដៃពិនិត្យអ្នកជំងឺដទៃទៀត ក៏បានឲ្យជនរងគ្រោះទៅអង្គុយលើគ្រែសិន ពេលនោះជនរងគ្រោះបានដើរចូលទៅក្នុង រួចបានសុំលោកគ្រូពេទ្យចូលទៅក្នុងបន្ទប់ទឹក ។ ពេលនោះដែលជនរងគ្រោះបានចូលទៅបន្ទប់ទឹកបាត់ឈឹង លឺតែសំឡេងទឹកហូរ ហើយរូបគាត់ក៏មិនទាន់បានចាក់ថ្នាំអ្វីទៅលើជនរងគ្រោះនោះដែរ ។ ខណៈមិនឃើញជនរងគ្រោះចេញពីបន្ទប់ទឹកវិញ ដូច្នេះរូបគាត់នឹងប្រពន្ធគាត់ឆ្ងល់ ប្រពន្ធបានដេញគាត់ជាប្តីឲ្យទៅមើល តែគាត់ជាគ្រូពេទ្យបានប្រកែកថា អ្នកណាទៅមើលគេដែលកំពុងបត់ជើងនោះ ។
ប្រភពដដែលបានបន្តទៀតថា ដោយសារតែឆ្ងល់មិនឃើញជនរងគ្រោះចេញពីបន្ទប់ទឹកវិញ រូបគាត់ជាគ្រូពេទ្យបានដើរចូលទៅក្នុងមើលក្នុងបន្ទប់ទឹក ក៏ស្រាប់តែឃើញជនរងគ្រោះបានដាច់ខ្យល់ស្លាប់នៅក្នុងបន្ទប់ទឹកទៅហើយ ដោយដួលទាំងស្រាតខោវែងចេញអស់នៅសល់តែខោជើងខ្លី ។ នៅពេលនោះដែររូបគាត់ជាគ្រូពេទ្យបានផ្តល់ដំណឹងទៅឲ្យសមត្ថកិច្ចមូលដ្ឋាន និងទំនាក់ទំនងទៅរកសាច់ញាតិឲ្យមកមើលជនរងគ្រោះ លុះសមត្ថកិច្ចមូលដ្ឋានបានចុះទៅដល់កន្លែងកើតហេតុ ឃើញដូច្នេះក៏បានទំនាក់ទំនងទៅខាងចក្ខុឲ្យមកធ្វើកោសល្យវិច័យមើលថា តើសពនេះមានស្នាមចាក់ថ្នាំដែរឬអត់? លុះសមត្ថកិច្ចពិនិត្យ និងធ្វើកោសល្យវិច័យរួច ឃើញថាគ្មានស្នាមចាក់ថ្នាំទៅលើសពជនរងគ្រោះនោះទេ ។
ក្រោយពេលកើតហេតុសមត្ថកិច្ចជំនាញបានសន្និដ្ឋានថា សពនេះស្លាប់ដោយសារខ្យល់គ រួចហើយបានធ្វើកំណត់ហេតុប្រគល់សពទៅក្រុមគ្រួសារយកទៅធ្វើបុណ្យនៅស្រុកកំណើត ៕
ចែករំលែកព័តមាននេះ