រាជធានីភ្នំពេញ ៖ បេក្ខនារីវគ្គផ្តាច់ព្រ័ត្រ នៃកម្មវិធី The Voice Cambodia រដូវកាលទី២នាងសាន ស្រីឡៃ គឺជាប្រិយមិត្តអ្នកគាំទ្រតារាចម្រៀងនាងពេជ្រ សោភា តាំងពី១០ឆ្នាំមុន ហើយពេលប្រលងនាងបានក្លាយជាកូនក្រុមរបស់តារាចម្រៀងរូបនេះ ។
សាន ស្រីឡៃ គឺកូនក្រុមមួយរូបដែលបានជ្រើសរើសតារាចម្រៀងនាងពេជ្រ សោភា ធ្វើគ្រូបង្ហាត់តាំងពីវគ្គដំបូងរហូតដល់វគ្គផ្តាច់ព្រ័ត្រ ។ ទោះបីជាយា៉ងណាក្តី សាន ស្រីឡៃ ខកខានមិនបានលើកពានរង្វាន់ទេ ដ្បិតវាបានធ្លាក់ទៅលើដៃរបស់បេក្ខជនថែល ថៃ ។
បន្ទាប់ពីកម្មវិធីប្រលងបញ្ចប់ សាន ស្រីឡៃ ទម្លាយអាថ៌កំបាំងដ៏គួឲ្យចាប់អារម្មណ៍ គឺរូបថតអនុស្សាវរីយ៍ដែលនាងថតជាមួយពេជ្រ សោភា ខណៈនាងមិនទាន់ពេញវ័យកាលពី១០ឆ្នាំមុន ។
តាមសំណេររបស់សាន ស្រីឡៃ កាលពីពេល ថ្មីៗកន្លងមកឲ្យដឹងថា «កាលពី១០ឆ្នាំមុន មានថ្ងៃមួយបងស្រីពេជ្រ សោភា ទៅប្រគំតន្ត្រីនៅប៉ោយប៉ែត ពេលនោះបងភាល្បីណាស់ គ្រាន់តែគាត់ច្រៀងបទ Doom Doom ចប់ភ្លាម ចុះមកក្រោមឆាកខ្ញុំក៏សុំគាត់ថតរូបជាមួយ ព្រោះស្រលាញ់គាត់ខ្លាំងណាស់ មួយថ្ងៃៗសម្លឹងមើលតែរូបថត ទោះបីមិនបានជួបគាត់ម្តងទៀត តែខ្ញុំតែងតែស្រមៃថាថ្ងៃណាមួយខ្ញុំនឹងបានអោបគាត់ នៅក្បែរគាត់ ច្រៀងលើឆាករួមជាមួយគាត់ ។ ក្តីស្រមៃចង់ក្លាយជាតារាចម្រៀងដូចជាបងស្រីពេជ្រសោភា មិនដែលបោះបង់ឡើយ ទោះបីជាដឹងថា ក្តីសុបិនទាំងនេះឆ្កួតឡប់ក៏ដោយ ក៏ពុំព្រមបញ្ឈប់វាត្រឹមហ្នឹងដែរ ។
អ្នកទាំងអស់គ្នាមានដឹងអត់ រាល់យប់មុនចូលគេងខ្ញុំតែងតែលួចថើបបងភាតាមរយៈរូបថតមួយសន្លឹកនេះ ខំថែររូបថតមួយនេះឡើងស្អាត ខំស្រមៃថា ថ្ងៃណាមួយខ្ញុំនឹងបានជួបបងភាជាមិនខាន ទោះបីក្តីស្រមៃចង់ក្លាយជាតារាចម្រៀងវាពិបាក តែខ្ញុំត្រូវធ្វើឱ្យបាន ទោះបីបងភាមិនដែលស្គាល់ក្មេងស្រីតូចម្នាក់នេះពីមុនទៀតក៏ដោយ ក៏ក្មេងស្រីដែលសុំគាត់ថតរូបមួយនេះ នៅតែគិតថានឹងធ្វើបាន ។
ដោយក្តីស្រមៃ ការតស៊ូមិនប្រួលប្រែទីបំផុតក្មេងស្រីម្នាក់នេះធ្វើបានហើយ បានទាំងអោប បានទាំងថើប បានទាំងច្រៀងជាមួយIdol របស់ខ្លួន ក្បែរក្តីស្រមៃរបស់ខ្លួនប៉ុននេះគឺអស់ចិត្តហើយ មិនសុំក្លាយជាតារាល្បីអីទេ សុំត្រឹមបានសម្រេចក្តីសុបិនរបស់ខ្លួនគឺអស់ចិត្តហើយ ។ ដូច្នេះអ្នកទាំងអស់ចាំទុកថាឱ្យតែព្យាយាម ឱ្យតែតស៊ូ ទោះបីជារឿងអ្វីក៏ដោយក៏យើងអាចធ្វើបានដែរ ។
១០ឆ្នាំវាមិនយូរទេ ត្រឹមតែ៣.៦៥០ថ្ងៃប៉ុណ្ណោះ ខ្ញុំដឹងវាយូរ វាយូរបំផុត តែធ្វើម៉េច វាជាក្តីស្រមៃ គ្មានការជោគជ័យមួយណាដែលមិនមានការប្រឹងប្រែងឡើយ អត្ថបទមួយនេះវាខ្លីណាស់ ខ្ញុំចង់ស្រែកប្រកាសពិភពលោកឱ្យបានដឹងឱ្យអស់ពីរឿងក្នុងចិត្តខ្ញុំថា ខ្ញុំស្រលាញ់បងភា ខ្ញុំស្រលាញ់និមិត្តរូបរបស់ខ្ញុំខ្លាំងបំផុត» ៕
ចែករំលែកព័តមាននេះ