រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានមានប្រសាសន៍ក្នុងពិធីប្រគល់សញ្ញាបត្រ និងវិញ្ញាបនបត្រជូនសិស្សកម្មសិក្សាការីឆ្នាំ២០១៥ សិក្ខាកាមមន្ដ្រីក្រសួងបរិស្ថាន ថ្នាក់ដឹកនាំជាស្ដ្រី និងបើកវគ្គបណ្ដុះបណ្ដាលឆ្នាំ២០១៦ នៃសាលាភូមិន្ទរដ្ឋបាល នាព្រឹកថ្ងៃទី២០ ខែមិថុនា ឆ្នាំ២០១៦ នៅវិទ្យាស្ថានជាតិអប់រំថា មានគណបក្សនយោបាយខ្លះកំណត់អាណត្ដិនាយករដ្ឋមន្ដ្រីទៅ ដើម្បីឱ្យ
យុវជនបានធ្វើនាយករដ្ឋមន្ដ្រី ឱ្យអ្នកក្របានធ្វើសមាជិកសភាផង ។
ឥឡូវនេះតើអាចជឿបានឬទេ? ទៅឃោសនាទាក់ទាញយុវជនធ្វើម៉េចឱ្យយុវជនក្រីក្របានធ្វើការធំដុំ ឬឈរជាតំណាងរាស្ដ្ររហូតដល់
ធ្វើរដ្ឋមន្ដ្រី ។ ប៉ុន្ដែដល់ពេលបោះឆ្នោត គណបក្សនយោបាយនោះតម្រូវឱ្យបង់ប្រាក់ ដើម្បីឈរឈ្មោះទៅតាមលំដាប់លំដោយថ្នាក់ ឈរឈ្មោះលេខមួយបង់ប្រាក់ច្រើន ឈរឈ្មោះបន្ដបន្ទាប់បង់តាមលេខរៀង ។
ទាក់ទិនទៅនឹងករណីនេះសម្ដេចតេជោបានដាក់សំណួរសួរថា កូនអ្នកក្រមានលុយបង់ ឬអត់? ឬសួរម្យ៉ាងទៀត បក្សនយោបាយនានា បក្សណាភ្លាត់ បក្សនោះនឹងមានបញ្ហា ។
សូមឱ្យប្រជាពលរដ្ឋធ្វើការពិចារណា តើវាអាចទៅជាការពិតបានទេ?
កៅអីរដ្ឋសភាកម្ពុជាមានតែ១២៣កៅអី តើយុវជនរាប់លាននាក់ អាចធ្វើតំណាងរាស្ដ្របាន ឬអត់? ហ្នឹងទី១ ។ ទី២-តម្រូវឱ្យបង់ប្រាក់ អ្នកឈរខ្ពស់ដែលមានលទ្ធភាពបង់លុយច្រើន អ្នកឈរទាបគឺបង់តាមទាប ។ តើអ្នកក្រមានលុយបង់ដើម្បីទៅធ្វើបានទេ?
សូមស្វែងរកការពិតមួយ មានការតថ្លៃគ្នា… លេខ១ យកប៉ុន្មាន លេខ២ប៉ុន្មាន… មានការជំទាស់គ្នាក្នុងការរៀបចំបេក្ខភាពម្ដងៗ ។ បើដូច្នេះតើកូនអ្នកក្រអាចមានលទ្ធភាពធ្វើតំណាងរាស្ដ្រឬទេ? គណបក្សនយោបាយដែលអួតអាងថា ធ្វើឱ្យយុវជនកូនអ្នកក្របានធ្វើអ្នកធំនោះ ។
បើគ្រាន់តែឈរឈ្មោះត្រូវបង់ប្រាក់ទៅហើយ ដូច្នេះគឺមានតែអ្នកមានលុយតែប៉ុណ្ណោះដែលអាចមានលុយ មានលទ្ធភាពអាចឈរឈ្មោះ ។ ចំពោះអ្នកដែលអត់លុយហើយ គឺអ្នកនោះលែងបានឈរជាបេក្ខភាពហើយ ។
ទាក់ទិនទៅនឹងបញ្ហាខាងលើ សម្ដេចតេជោនាយករដ្ឋមន្ដ្រីបញ្ជាក់ថា កុំអាលជឿសម្ដេច សូមយុវជនទូទាំងប្រទេសយកទៅពិចារណាមើល តើពិតប្រាកដដែរឬទេ ដែលអ្នកឃោសនាគេមកសន្យាថា ក្មួយឯងប្រឹងធ្វើសកម្មភាពទៅនឹងបានឈរជាតំណាងរាស្ដ្រហើយ ប៉ុន្ដែកុំភ្លេចថា អ្នកដែលបាននិយាយនោះគឺ… សូម្បីតែខ្លួនឯងនោះក៏អត់មានលុយបង់ដែរ… បោកតគ្នារហូត… រហូតដល់ពេលពាក់កណ្ដាលអាណត្ដិ តំណាងដែលត្រូវបង់លុយទាំងអស់គ្នា ប៉ុន្ដែម្នាក់ធ្វើតំណាងរាស្ដ្រតែ២ឆ្នាំកន្លះ ម្នាក់ទៀតធ្វើ២ឆ្នាំកន្លះ លុះដល់ពេលផ្លាស់ប្ដូ ស្រេចតែម្នាក់ដែលចូលមុនមិនខ្ចីដូរមិនខ្ចីលាលែង… ក៏ទាស់គ្នាទៀត… ។
សូមកុំអាលជឿខ្ញុំសូមពិចារណា… ។ សម្ដេចបានលើកថា ឥឡូវទាំងពេញសិទ្ធិទាំងបម្រុងថាមាន៣០០កៅអី តើ៣០០ដៅអីអាចស្រូបយកមនុស្សរាប់លានឬទេ? រាប់ម៉ឺនដុល្លារ ៥ម៉ឺនដុល្លារ ៣ម៉ឺនដុល្លារ តើកូនអ្នកក្រមានលុយបង់ទេ? ឥឡូវចាប់ប្រកាសរកលុយតាំងពីពេលនេះទៅហើយ ។
សម្ដេចមានប្រសាសន៍ទៀតថា សូមបក្សនានាកុំណា ! អ្នកណាស្រែក អ្នកនោះហើយ ។ ព្រោះប្រជាភិថុតិ ការបោកប្រាស់គេនេះ មិនគួរបក្សនយោបាយណាមកធ្វើនៅក្នុងស្រុកខ្មែរទេ ល្មមចប់ហើយ ។
សម្ដេចបានលើកឡើងថា គណបក្សហ្វ៊ុនស៊ិនប៉ិច ធ្លាក់ដោយសារអ្វី? ដោយសារការសន្យាហ្នឹងណា ដោយសារការសន្យាហ្នឹងបានហ្វ៊ុនស៊ិនប៉ិចធ្លាក់ចុះ ព្រោះសន្យាឱ្យគេធ្វើអភិបាលស្រុកនេះ១០នាក់ ។ ដល់មិនបានធ្វើចៅហ្វាយស្រុក ប្រទេចផ្ដាសារតែម្ដង ដូច្នេះហ្វ៊ុនស៊ិនប៉ិច រលាយដោយសារការសន្យានោះឯងនិយាយឱ្យត្រង់ៗ ។
សម្ដេចតេជោ ហ៊ុន សែន បានបញ្ជាក់ថា គណបក្សប្រជាជន មិនបានសន្យាទេ មានលទ្ធភាពដាក់ចូលធ្វើ ។
ចំណុចមួយទៀត គេបានប្រកាសថា បើគេឈ្នះ គេទុកមន្ត្រីទាំងអស់អត់មានការដោះដូរ ថែមទាំងដំឡើងបៀវត្យឱ្យខ្ពស់ ។ ករណីនេះតើជឿបានឬទេ ?
ចំពោះអ្នកដែលខំជួយឃោសនាមានខ្លះខំទិញតំណែងទុកឱ្យហើយ អ្នកនៅក្រៅប្រទេសបញ្ជូនលុយមក ដើម្បីនៅពេលដែលឈ្នះអាចទៅធ្វើចៅហ្វាយខេត្ត ពេលឈ្នះធ្វើរដ្ឋមន្ត្រី រដ្ឋលេខាធិការ ។ ចំណែកអ្នកនៅក្នុងប្រទេស បែងចែក អ្នកខ្លះធ្វើអធិការស្រុក ខ្លះធ្វើស្នងការខេត្ត ។ ចុះបើទុកមន្ត្រីដែលនៅសព្វថ្ងៃ ដែលគេចោទថា មន្ត្រីពុករលួយ មន្ត្រីរំលោភសិទ្ធិមនុស្ស ទុកឱ្យនៅ គឺមិននៅតែដដែល ។ ចំពោះអ្នកដែលប្រឹងប្រែងហើយត្រៀមខ្លួនឡើងកាន់តំណែង ចៅហ្វាយស្រុក មេទ័ព មេនគរបាល តើមានកន្លែងធ្វើឯណា…សូមពិចារណាទៅអស់លោកដែលគាំទ្របក្ស ដើរផ្ដិតមេដៃ ។
ទាក់ទងនឹងការផ្ដិតមេដៃ សម្ដេចតេជោបានសង្កត់ធ្ងន់ថា មិនទាន់រួចខ្លួនទេ រឿងផ្ដិតមេដៃគាំទ្រញត្តិរបស់បក្សសង្គ្រោះជាតិ មិនទាន់រួចខ្លួនទេ ជាការប្រមាថធ្ងន់ធ្ងរដល់ព្រះមហាក្សត្រ និងជាការបោកប្រាស់ប្រជាពលរដ្ឋផងដែរ ។
សម្ដេចតេជោបានផ្ដាំផ្ញើទៅមន្ត្រីទូតនានា ដែលប្រចាំនៅកម្ពុជា សូមកុំចោទសម្ដេចថា ប្រើប្រព័ន្ធតុលាការដើម្បីគំរាមកំហែង តែនេះជាការអនុវត្តច្បាប់ ។ សម្ដេចបានចោទសួរថា បើច្បាប់មានមិនប្រើច្បាប់ ត្រូវប្រើកាំភ្លើង ឬយ៉ាងណា? សម្ដេចពិតជាមានប្រសាសន៍ថា បងប្អូន គាំទ្របក្សនយោបាយនានា កុំអាលជឿខ្ញុំ ពិចារណាទៅ សម្ដេចតេជោបញ្ជាក់ថា ចង់បញ្ចប់អាណត្តិ គឺដើម្បីដេញខ្ញុំតែប៉ុណ្ណឹងទេ ។
លើពិភពលោក តើ់មានប្រទេសណាកំណត់អាណត្តិនាយករដ្ឋមន្ត្រីទេ ប្រធានាធិបតីគឺមានកំណត់អាណត្តិ ប៉ុន្តែនាយករដ្ឋមន្ត្រីអត់ទេ។ មូលហេតុចង់ឱ្យខ្ញុំចេញខ្ញុំជាមនុស្សរឹងណាស់ បើគេមិនដេញចង់ទៅ បើគេដេញខ្ញុំនៅ ។ ឈរនាយករដ្ឋមន្ត្រីទៀត ប្រជាជនស្គាល់ ហ៊ុន សែន ច្បាស់ណាស់ ៕
ចែករំលែកព័តមាននេះ