ខេត្តក្រចេះ ៖ ដោយសារតែការស់នៅតំបន់ដាច់ស្រយាលក្នុងព្រៃជ្រៅលើចម្ងាយផ្លូវរាប់សិបគីឡូម៉ែត្រធ្វើឲ្យស្ត្រីមានផ្ទៃពោះគ្រប់ខែត្រូវសម្រាលកូនម្នាក់ពិបាកនឹងបញ្ជូនមកកាន់មន្ទីរពេទ្យ ដោយត្រូវអ្នកភូមិធ្វើស្នែងអង្រឹងសែងដើរបណ្ដាក់គ្នា កាត់ព្រៃ កាត់អូរ កាត់ស្រែ លើចម្ងាយផ្លូវរាប់សិបគីឡូម៉ែត្រចេញពីព្រៃសំដៅមកមាត់ទន្លេ ដើម្បីជិះទូកឆ្លងទន្លេ មករករថយន្តដឹកសំដៅមកមន្ទីរពេទ្យ ដោយត្រូវចំណាយរយៈពេលជាង១ថ្ងៃ ។ តែនៅពេលនេះស្ត្រីមានផ្ទៃពោះក៏ត្រូវបានសម្រាលកូនបានដោយជោគជ័យហើយក្រោយពីក្រុមគ្រូពេទ្យនៃមន្ទីរពេទ្យបង្អែកខេត្តបានធ្វើការវះកាត់រួចរាល់ ។
នៅក្នុងរូបភាពជាច្រើនសន្លឹកដែលបានបង្ហោះនៅលើបណ្តាញសង្គមអំពីសកម្មភាពរបស់អ្នកភួមិដែលនាំគ្នាសែងស្ត្រីមានផ្ទៃពោះដេកក្នុងអង្រឹងស្នែង កាត់ស្រែ កាត់ព្រៃ កាត់អូរ ឆ្លងទន្លេមកត្រើយម្ខាង ដើម្បីរកគ្រូពេទ្យឲ្យជួយសង្គ្រោះ ដោយសារតែស្ត្រីមានផ្ទៃពោះគ្រប់ខែពិបាកសម្រាលកូនតាមធម្មជាតិ គឺមើលទៅហាក់ដូចជាមានភាពអាណិតអាសូរជាខ្លាំង ។
តាមការស្រាវជ្រាវឲ្យដឹងថា ស្ត្រីមានផ្ទៃពោះគ្រប់ខែត្រូវសម្រាលកូនរូបនេះឈ្មោះ នុត ស្តើង អាយុ១៩ឆ្នាំ និងមានប្តីឈ្មោះ រឿង រណ អាយុ២៣ឆ្នាំ មានទីលំនៅតំបន់ព្រៃដាច់ស្រយាល ចំណុចទន្សោងធ្លាក់ ឃុំកំពង់ចាម ស្រុកសំបូរ នៅត្រើយម្ខាងនៃស្រុកសំបូរ និង ក្បែរព្រំប្រទល់ខេត្តកំពង់ធំ ។ ការឈឺពោះសម្រាលកូនម្តងនេះ ជាកូនប្រុសលើកទី២ បន្ទាប់ពីកូនប្រុសម្នាក់អាយុ១៤ខែ និងបានស្នាក់នៅតំបន់ដាច់ស្រយាលខាងលើ ដោយប្រកបមុខរបរធ្វើស្រែចម្ការ ។
នៅក្នុងមន្ទីរពេទ្យខេត្តក្រចេះ ក្រុមគ្រួសាររបស់ស្ត្រីមានផ្ទៃពោះរូបនេះបានឲ្យដឹងថា ស្ត្រីរូបនេះបានឈឺពោះគ្រប់ខែសម្រាលកូនតាំងពីយប់ថ្ងៃទី១៩ ខែមិថុនា តែស្ត្រីរូបនេះពិបាកសម្រាល ហើយការឈឺពោះកាន់តែខ្លាំងទៅៗ ។ តែតំបន់នោះដាច់ស្រយាល នៅក្នុងព្រៃ មិនសូវមានអ្នកភូមិរស់នៅ ទើបស្ត្រីរូបនេះត្រូវអ្នកភូមិមួយចំនួនដាក់ស្នែងឫស្សីសែងដើរកាត់ព្រៃ កាត់ជ្រលងដងអូរ កាត់ស្រែ បណ្ដាក់គ្នាសែង ដើម្បីបញ្ជូនគាត់មកសង្គ្រោះ ។
យ៉ាងណាក៏ដោយ ក្រោយពីការធ្វើដំណើរសែងថ្មើរជើងលើចម្ងាយផ្លូវជាង៤០គីឡូម៉ែត្រចេញពីព្រៃមកភូមិសំដៅមកមាត់កំពង់ទឹកដើម្បីជិះទូកឆ្លងទន្លេមកកាន់ទីប្រជុំជនស្រុក សំដៅបន្តតាមរថយន្តមកមន្ទីរពេទ្យ និងក៏បានមកដល់មន្ទីរពេទ្យនៅព្រលប់ថ្ងៃទី២០ ខែមិថុនា ដោយក្រុមគ្រូពេទ្យបានជួយសង្គ្រោះភ្លាមៗ រហូតទទួលបានជោគជ័យ ។
បើតាមក្រុមគ្រូពេទ្យផ្នែកសម្ភពបានឲ្យដឹងថា ព្រោះតែទារកក្នុងផ្ទៃរបស់ស្ត្រីរូបនេះមានទំនង់ធ្ងន់ ទើបធ្វើឲ្យរូបគាត់ពិបាកសម្រាលតាមធម្មជាតិ ក្រុមគ្រូពេទ្យក៏បានវះកាត់ឲ្យគាត់បានដោយជោគជ័យ ៕
ចែករំលែកព័តមាននេះ