រាជធានីភ្នំពេញ ៖ មកទល់ពេលនេះ គេនៅតែចាប់អារម្មណ៍រឿងស្នេហាប្រេះឆារវាងកីឡាករ ចាន់ វឌ្ឍនាកា និងកីឡាការិនី ហែមថុន វិទិនី ដែលមិនទាន់មានដំណឹងថាពួកគេបានផ្សះផ្សាឈានទៅរកការត្រូវរ៉ូវគ្នាវិញឬយ៉ាងណានៅឡើយទេ ។ នៅលើគណនីហ្វេសប៊ុកផ្លូវការរបស់ពួកគេមិនឃើញបន្សល់ទុកនូវរូបថតដែលបានបង្ហាញពីភាពផ្អែមល្ហែមដូចមុនទៀតទេ ក្រោយពេលពួកគេប្រកាសកាត់ផ្ដាច់ចំណងស្នេហ៍នឹងគ្នា ។ មកទល់ពេលនេះ ភាគីទាំងពីរហាក់បន្តស្ងប់ស្ងាត់ធ្វើឱ្យអ្នកខ្លះសង្ស័យថា ពួកគេសម្ងំត្រូវរ៉ូវគ្នាវិញ តែមិនហ៊ានបើកចំហ ។
ស្នេហាកីឡាករ និងកីឡាការិនីល្បីឈ្មោះមួយគូនេះ ក្នុងពេលប្រកាសឱ្យដឹងថាបានស្រឡាញ់គ្នា មានការអបអរយ៉ាងខ្លាំងពីក្រុមអ្នកគាំទ្រ ជាពិសេសអ្នកដែលមានចិត្តស្រឡាញ់ពេញចិត្តនឹងអាជីពកីឡារបស់ពួកគេ ។ ម្នាក់ៗបានទាំងប្រដូចថាពួកគេជាគូស្នេហ៍វ័យក្មេង និងល្បីឈ្មោះសមគ្នាណាស់ ដោយសារតែចាន់ វឌ្ឍនាកា ជាកីឡាករល្បីឈ្មោះក្នុងពិភពបាល់ទាត់ ហើយ ហែមថុន វិទិនី ឯណោះវិញ ក៏ល្បីឈ្មោះក្នុងពិភពហែលទឹក ដែលអ្នកទាំងពីរបានបង្កើតចំណងស្នេហ៍ក្រោយពីមានឱកាសថតស្ពតបង្ហាញពីវិស័យកីឡាជាមួយគ្នាកាលពីប៉ុន្មានឆ្នាំមុន និងក្រោយមកក៏មានសកម្មភាពចូលរួមកីឡាថ្នាក់ជាតិរួមគ្នា ។ ចំណងស្នេហ៍របស់ពួកគេមិនត្រឹមតែបើកចំហតាមរយៈមិត្តភក្តិនៅជុំវិញខ្លួនប៉ុណ្ណោះទេ គឺតាមរយៈបណ្ដាញសង្គមហ្វេសប៊ុកក៏ត្រូវបានលាតត្រដាងផងដែរ។ អ្វីដែលគួរឱ្យកោតសរសើរគឺអ្នកទាំងពីរបានប្រកាសដោយបើកចំហតែម្ដងថា ខ្លួនពិតជាស្រឡាញ់ និងពេញចិត្តគ្នាប្រាកដមែន នៅក្នុងកម្មវិធីស៊ីអារម្មណ៍ធ្វើឱ្យមានការកោតសរសើរថា ពិតជាគូស្នេហ៍សមគ្នា ។
យ៉ាងណាមិញ ចំណងស្នេហ៍នេះ ត្រូវបានគេដឹងឮមិនដល់មួយឆ្នាំក្រោយពេលបើកចំហផង ក៏ត្រូវភាគីខាងស្រីគឺកញ្ញា ហែមថុន វិទិនី ប្រកាសឆាចោលនៅលើបណ្ដាញសង្គមហ្វេសប៊ុកដោយនាងនិយាយថា មិនអាចបន្តទំនាក់ទំនងស្នេហាជាមួយ ចាន់ វឌ្ឍនាកា ទៀតបានទេ។
បើទោះជានាងរមែងបដិសេធបញ្ជាក់ពីការបែកបាក់លម្អិតឱ្យបានដឹងច្បាស់ ប៉ុន្តែនាងបានស្ដែងចេញយ៉ាងច្បាស់ថាជីវិតស្នេហាមិនអាចបន្តបានឡើយ តាមរយៈការឈប់បង្ហោះសកម្មភាពជាមួយកីឡាករ ចាន់ វឌ្ឍនាកា ដោយសូម្បីតែរូបថតចាស់ៗដែលបានបង្ហោះក្នុងពេលល្អូកល្អិន ក៏ត្រូវលុបចោលដែរ ។ មកទល់ពេលនេះ នាងមិនទាន់បកស្រាយពីមូលហេតុដែលនាំឱ្យស្នេហារបស់ខ្លួនបែកបាក់ទេ ខណៈដែលភាគីខាងប្រុសក៏ទទួលសា្គល់ថា បែកបាក់ ប៉ុន្តែមិនបង្ហាញរឿងរ៉ាវលម្អិត ។ ប្រភពដែលកោះសន្ដិភាពទទួលបាន គឺស្នេហាមួយគូនេះ ប្រហែលមិនអាចផ្សះផ្សាបានទេ ដោយសារតែក្នុងពេលនេះលោក ចាន់ វឌ្ឍនាកា ដែលមានឪពុកជាចៅហ្វាយខេត្តម្នាក់ផង ហាក់ឡើងកូដខ្លាំង ហើយមាននារីចោមរោមច្រើនសម្រាប់ការផ្ដល់ជម្រើសខុសប្លែកពីមុន ។ មិនខុសគ្នាដែរកញ្ញា ហែមថុន វិទិនី ឯណោះវិញ ក៏មិនអន់ដែរ ដោយសារតែនាងជាកីឡាការិនីស្រស់ស្អាត ហើយល្បីឈ្មោះទៀត ក៏មានកន្លង់ចោមរោមចែចង់លែបខាយធ្វើឱ្យភាគីម្ខាងៗមិនខ្វល់ពីការផ្សះផ្សាស្នេហា ។
ប្រភពដែលអាចទុកចិត្តបានអះអាងថា លោក ចាន់ វឌ្ឍនាកា និង ហែមថុន វិទីនី កំពុងលេងឫកដាក់គ្នា ទើបបណ្ដាលឱ្យភាគីទាំងពីរមិនទាន់មានឱកាសចរចាស្នេហាណាមួយ ក្រោយពីបានប្រកាសចែកផ្លូវគ្នា។ ប៉ុន្តែចំណងស្នេហ៍មួយគូនេះ ក៏អាចវិលជួបវិលបែកដូចគ្នានឹងគូស្នេហ៍ទាំងឡាយនោះដែរ ប្រសិនបើពួកគេបន្ទន់ចិត្តដាក់គ្នា ។ ម្នាក់ៗបានលើកឡើងថា ក្នុងអំឡុងនៃការផ្ដើមស្នេហ៍កំលោះក្រមុំមួយគូបានសាងនូវអនុស្សាវរីយ៍ស្អិតល្មួត និងល្អូកល្អិនមិនខុសពីប្ដីប្រពន្ធទើបតែចូលរោងការទាំងឡាយឡើយ ទើបបណ្ដាលឱ្យស្នេហ៍ដែលបានកើតឡើងហាក់ទទួលបាននូវជោគជ័យ និងមានស្នាមស្នេហ៍បន្សល់ទុករាប់មិនអស់ ដែលពិបាកធ្វើឱ្យពួកគេបំភ្លេចគ្នាងាយៗ។ បើទោះជាក្នុងពេលនេះ ម្នាក់ៗនៅតែបន្តសម្ដែងឫកមិនទាន់ចង់ត្រូវគ្នា ប៉ុន្តែបើពួកគេចង់ត្រូវគ្នាវិញ គឺមិនពិបាកនោះទេ ដោយសំអាងថា ភាគីទាំងសងខាងសុទ្ធតែមានស្នាមចងចាំគ្នាច្រើនអនេកក្នុងពេលមិនទាន់បែក។ អ៊ីចឹងហើយទើបនៅតែមានការសង្ស័យថា កីឡាករ និងកីឡាការិនីទាំងពីរអាចនឹងសម្ងំត្រូវរ៉ូវគ្នាវិញក៏ថាបានក្នុងពេលភាគីម្ខាងៗមិនចេញមុខបញ្ជាក់បន្ថែមពីការបែកបាក់ ស្របពេលដែលម្នាក់ៗក៏មិនទាន់ឃើញរំលេចពីស្នេហាថ្មីបែបនេះ។
នៅលើគណនីហ្វេសប៊ុក គេឃើញម្នាក់ៗខ្វល់តែរឿងបង្អួតស្នាដៃ និងសកម្មជាមួយការងាររៀងខ្លួនប៉ុណ្ណោះ។ ប៉ុន្តែយូរៗម្ដងគេឃើញគូស្នេហ៍មួយគូនេះ បង្ហោះសារឌឺគ្នាដែលមិនខុសពីនៅតាមដានរាល់សកម្មភាពរបស់គ្នា។ ប្រភពមួយនិយាយថា ហែមថុន វិទិនី ប្រចណ្ឌខ្លាំង ប៉ុន្តែប្រភពដដែលក៏បានបង្ហាញថា ចាន់ វឌ្ឍនាកា ជាកីឡាករពូកែទាំងស៊ុតបាល់ និងពូកែទាំងឌឺចំពោះគូស្នេហ៍ផងដែរ។ គេនៅតែជឿថា អ្នកទាំងពីរនឹងឈានទៅត្រូវរ៉ូវគ្នាវិញ ប្រសិនបើពួកគេមានបំណងឱ្យស្នេហាមួយនេះត្រឡប់ដូចដើម ៕
ចែករំលែកព័តមាននេះ