ខេត្តកណ្តាល ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា ចំណតផែកុងតឺន័រថ្មី នឹងរួមចំណែកបំពេញឱ្យតួនាទីកំពង់ផែស្វយ័តភ្នំពេញ ដែលមានស្រាប់ឱ្យទៅជាមជ្ឈមណ្ឌលផ្គត់ផ្គង់ភស្តុភារ ប្រមូលនិងចែកចាយទំនិញដ៏ធំរបស់ជាតិសំដៅរួមចំណែកដល់ការធ្វើសមាហរណកម្មផ្ទៃក្នុងជាតិទាំងមូល ការធ្វើពាណិជ្ជកម្មអន្តរជាតិ តំបន់ ជាពិសេសក្នុងការជំរុញអនុវត្តផែនការនាំចេញអង្ករប្រមាណ១លានតោននៅឆ្នាំ២០១៦ ខាងមុខរបស់រាជរដ្ឋាភិបាលកម្ពុជា ។
សម្តេចតេជោនាយករដ្ឋមន្ត្រីបានមានប្រសាសន៍បែបនេះ នាព្រឹកថ្ងៃទី៩ មីនា ក្នុងឱកាសអញ្ជើញជាអធិបតីក្នុងពិធីសម្ពោធបើកការដ្ឋានសាងសង់ចំណតផែកុងតឺន័រថ្មីរបស់កំពង់ផែស្វយ័តភ្នំពេញ ស្ថិតនៅភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល ដោយប្រើប្រាស់ប្រាក់កម្ចីរបស់សាធារណរដ្ឋប្រជាមានិតចិនដែលត្រូវចំណាយទឹកប្រាក់ជាង២៨លានដុល្លារអាមេរិក ។
សម្តេចតេជោនាយករដ្ឋមន្ត្រីមានប្រសាសន៍ថា នេះគឺជាការកសាងសម្រាប់អភិវឌ្ឍប្រទេសកម្ពុជាតម្រូវការនៃការដឹកជញ្ជូនទាំងការនាំចេញ និងការនាំចូល ។ នៅពេលខាងមុខកម្ពុជាពិតជានឹងមានទំនិញយ៉ាងច្រើនក្នុងការនាំ ចេញ និងមានទំនិញនាំចូលផងដែរ ដោយសារតែកម្ពុជាក៏ជាសមាជិកនៃអង្គការពាណិជ្ជកម្មពិភពលោក ហើយដែលមានលទ្ធភាពនាំចេញទៅកាន់ទីផ្សារអន្តរជាតិកាន់តែច្រើន ។
សម្តេចតេជោនាយករដ្ឋមន្ត្រីបញ្ជាក់ បើសិនជាមិនកសាងកំពង់ផែកុងតឺន័រថ្មីនេះទេ ស្ថានភាពនៅទីក្រុងភ្នំពេញ មានចំណុចពីរដែលត្រូវយកចិត្តទុកដាក់ ។ ទី១-គឺសមត្ថភាពនៅពេលដែលទំនិញមានការរីកចម្រើនទាំងការនាំ ចេញ និងការនាំចូលនោះ កំពង់ផែភ្នំពេញ សព្វថ្ងៃនេះទ្រទ្រង់មិនគ្រប់ទេ ។ ទី២-ពេលខ្លះកំពង់ផែត្រូវផ្អាកសកម្មភាពទាំងស្រុងតែម្តង នោះគឺនៅត្រង់ថា រៀងរាល់ឆ្នាំត្រូវប្រារព្ធពិធីបុណ្យអុំទូក សំពះព្រះខែ ដូច្នេះពេលនោះកំពង់ផែភ្នំពេញ ត្រូវផ្អាកទាំងអស់ ។ ដូច្នេះបញ្ហានេះគឺមានការពាក់ព័ន្ធ នឹងការរកស៊ី ។ អាស្រ័យហេតុនេះយើងបានជ្រើសរើសទីតាំងសាងសង់ចំណតផែថ្មីនៅស្រុកកៀនស្វាយនេះ ដើម្បីរួមចំណែកបង្កើនសមត្ថភាពកំពង់ផែស្វយ័តភ្នំពេញ សម្រាប់ទទួលកុងតឺន័រដែលកំពុងកើនឡើងជាលំដាប់ និងបញ្ចៀសបាននូវការកកស្ទះចរាចរក្នុងរាជធានីភ្នំពេញ ។
ទន្ទឹមនឹងនេះសម្តេចតេជោនាយករដ្ឋមន្ត្រីសូមឱ្យលោកផាន គ័ងស៊ា ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំនៅកម្ពុជា ពាំនាំការអរគុណរបស់រាជរដ្ឋាភិបាល និងប្រជាជនកម្ពុជាជូនចំពោះប្រជាជន និងរដ្ឋាភិបាលនៃសាធារណរដ្ឋប្រជាមានិតចិនដែលជាមិត្តភក្តិដ៏ជិតស្និទជាប្រវត្តិសាស្ត្រ និងជាម្ចាស់ហិរញ្ញប្បទានសហប្រតិបត្តិការឥតលក្ខខណ្ឌសម្រាប់ការអភិវឌ្ឍកម្ពុជា លើគ្រប់វិស័យ ជាពិសេសលើការស្តារ និងការអភិវឌ្ឍហេដ្ឋារចនាសម្ព័ន្ធដឹកជញ្ជូន គឺផ្លូវ ស្ពាន និងកំពង់ផែ ។
ទាំងនេះបញ្ជាក់ឱ្យឃើញច្បាស់ថា ជានិច្ចកាលសាធារណរដ្ឋប្រជាមានិតចិនតែងតែគិតគូរ និងជួយលើវិស័យអាទិភាពនានាដែលជាកម្លាំងចលករដ៏សំខាន់ក្នុងការជួយជំរុញកំណើនសេដ្ឋកិច្ច និងការអភិវឌ្ឍសង្គម តាមរយៈការផ្តល់នូវការឧបត្ថម្ភគាំទ្រជាបន្តបន្ទាប់ពីការសាងសង់ប្រព័ន្ធធារាសាស្ត្រ វារីអគ្គិសនី ផ្លូវ ស្ពាន កំពង់ផែ ការបណ្តុះបណ្តាលធនធានមនុស្ស និងជំរុញវិនិយោគគិនចិន ឱ្យមកធ្វើវិនិយោគនៅកម្ពុជា សំដៅរួមចំណែកជំរុញកំណើនសេដ្ឋកិច្ច បង្កើតមុខរបរ និងការងារ និងលើកកំពស់កំរិតជីវភាពរស់នៅរបស់ប្រជាជនកម្ពុជា ។
ទន្ទឹមនឹងនេះសម្តេចតេជោជូនពរដល់សន្និបាតលើកទី១២ របស់ចិនដែលបាននិងកំពុងប្រព្រឹត្តទៅនេះទទួលបានជោគជ័យនៅក្នុងដំណើរការនៃការអភិវឌ្ឍសេដ្ឋកិច្ចសង្គមថ្មី ព្រោះការរីកចំរើននៃសេដ្ឋកិច្ចថ្មីមិនមែនគ្រាន់តែជួយចិនខ្លួនឯងទេ គឺចិនបានជួយដល់បណ្តាប្រទេសកំពុងអភិវឌ្ឍន៍ទៀត។ ជាងនេះជានាទីសំខាន់ណាស់ ក្នុងពេលដែលសេដ្ឋកិច្ចពិភពលោកមានវិបត្តិយ៉ាងធ្ងន់ធ្ងរ ជាពិសេសសហរដ្ឋអាមេរិក និងសហភាពអឺរ៉ុប ។ បើសិនជានៅកាលនោះទាំងចិន និងឥណ្ឌាជួបប្រទះវិបត្តិថែមទៀត គឺមិនដឹងជាអ្នកណាជួយអ្នកណាទេ ។ ពីរលើករួចមកហើយ ចិនបានបង្ហាញតួនាទីរបស់ខ្លួននៅក្នុងការសង្គ្រោះ គឺលើកទី១ នៅឆ្នាំ១៩៩៧ ពេលនោះវិបត្តិហិរញ្ញវត្ថុក្នុងតំបន់ចិនមានតួនាទីជួយដោះស្រាយនូវវិបត្តិនេះ។ ឆ្នាំ២០០៨-២០០៩ រហូតមកដល់ពេលបច្ចុប្បន្ននេះ អ្នកទទួលរង ទើបតែនឹងងើបបន្តិចៗទេ ចិននៅរក្សាកំណើនសេដ្ឋកិច្ច៧-៨% របស់ខ្លួន ។ ដូច្នេះចិនមិនបានធ្លាក់ទៅក្នុងវិបត្តិទេ ដែលក្នុងនោះមានប្រជាជនជាង១.៣០០លាននាក់ ។ ចិនបានបង្ហាញអំពីតួនាទីរបស់ខ្លួននៅក្នុងជោគជ័យសេដ្ឋកិច្ចផ្ទៃក្នុងរបស់ខ្លួនផង និងចូលរួមចំណែកវិនិយោគទៅដល់បណ្តាប្រទេសកំពុងអភិវឌ្ឍន៍។
លោកត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូនបានឱ្យដឹងថា គម្រោងសាងសង់ចំណតផែកុងតឺន័រថ្មីនៅពេលនេះប្រមាណជា១០ហិកតា មានទីតាំងស្ថិតនៅលើដងទន្លេមេគង្គ តាមបណ្តោយផ្លូវជាតិលេខ១ ចម្ងាយប្រមាណជា៣០គីឡូម៉ែត្រ ពីរាជធានីភ្នំពេញ ត្រូវចំណាយអស់ទឹកប្រាក់ជាង២៨លានដុល្លារអាមេរិក ដែលជាប្រាក់កម្ចីឥណទានរបស់សាធារណរដ្ឋប្រជាមានិតចិន សាងសង់ដោយក្រុមហ៊ុនសំណង់សៀងហៃគ្រុប រយៈពេលសាងសង់ចំនួន៣០ខែ។
លោករដ្ឋមន្ត្រីបានបញ្ជាក់ឱ្យដឹងទៀតថា បន្ទាប់ពីសាងសង់ហើយចំណតផែកុងតឺន័រថ្មីនេះ អាចទទួលនាវាដែលមានចំណុះផ្ទុក៥.០០០តោន ឱ្យចូលចតបានចំនួន២កន្លែងទន្ទឹមគ្នា និងអាចមានសមត្ថភាពទទួលបានកុងតឺន័រចំនួន១២០.០០០ TEUS ក្នុងមួយឆ្នាំ ។
បន្ទាប់ពីសាងសង់រួច ចំណតផែថ្មីនឹងត្រូវដាក់ឱ្យដំណើរការសម្រាប់ប្រតិបត្តិការលើក ដាក់ ផ្ទេរ ផ្ទុកទំនិញនៅទីនេះ ដែលនឹងស្រូបយកទំនិញសរុបពីកំពង់ផែភ្នំពេញ ដែលមានស្រាប់បច្ចុប្បន្នប្រមាណជា៧៥% ហើយនៅសល់២៥%ទៀត គឺប្រតិបត្តិការនៅចំណតផែបច្ចុប្បន្នក្បែរគល់ស្ពានជ្រោយចង្វាដដែល ។
លោកផាន់ គ័ងស៊ា ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជាបានថ្លែងថា រដ្ឋាភិបាលចិនយកចិត្តទុកដាក់យ៉ាងខ្លាំងចំពោះទំនាក់ទំនងជាដៃគូសហប្រតិបត្តិការយុទ្ធសាស្ត្រ គ្រប់វិស័យរវាងចិន និងកម្ពុជា និងបន្តពង្រឹងសហប្រតិបត្តិដែលមានផលប្រយោជន៍ទៅវិញទៅមកជាមួយគ្នា និងវិស័យកសាងហេដ្ឋារចនាសម្ព័ន្ធ ការអភិវឌ្ឍតំបន់សេដ្ឋកិច្ចពិសេស ការបណ្តុះបណ្តាលធនធានមនុស្សជាមួយភាគីកម្ពុជា។
លោកឯកអគ្គរដ្ឋទូតចិន បន្តថា ប៉ុន្មានឆ្នាំកន្លងទៅនេះរាជរដ្ឋាភិបាលកម្ពុជា កំណត់ទិសដៅនៃការធ្វើសហប្រតិបត្តិការ ហើយរដ្ឋាភិបាលចិនទទួលការគាំទ្រខាងកម្ចីសម្បទានឥណទាន។ កិច្ចសហប្រតិបត្តិការនេះទទួលបានសមិទ្ធផលគួរកត់សំគាល់ជាច្រើន ។ ភាគីទាំងពីរបានធ្វើកិច្ចសហប្រតិបត្តិការប្រកបដោយប្រសិទ្ធភាពក្នុងវិស័យកសាងហេដ្ឋារចនាសម្ព័ន្ធដូចជាផ្លូវថ្នល់ ស្ពាន ប្រព័ន្ធធារាសាស្ត្រ អគ្គិសនីជាដើម ។
ថ្ងៃនេះកំពង់ផែថ្មីផ្ទុកកុងតឺន័រ បានបើកការដ្ឋានសាងសង់ គឺជានិមិត្តសញ្ញាមួយនៃការធ្វើសហប្រតិបត្តិការរវាងចិន និងកម្ពុជាកំពុងបោះជំហានទៅមុខឆ្ពោះទៅកាន់តែធំទូលាយ និងកាន់តែស៊ីជម្រៅលើគ្រប់វិស័យ។ កំពង់ផែជាបង្អួចរបស់ប្រទេសមួយសម្រាប់ទាក់ទងជាមួយក្រៅប្រទេសដែលជានិមិត្តសញ្ញាមួយនៃការអភិវឌ្ឍផ្នែកពាណិជ្ជកម្មទំនិញចេញ-ចូល និងផលិតកម្មឧស្សាហកម្ម ផ្នែកសំណង់ ផ្នែកបំពាក់សំភារ បរិក្ខារ អាជីវកម្ម សុទ្ធតែទទួលបាននូវការអភិវឌ្ឍ ៕
ចែករំលែកព័តមាននេះ