ការសិក្សាមួយធ្វើឡើងដោយអ្នកស្រាវជ្រាវជនជាតិហ្វាំងឡង់និងចុះផ្សាយក្នុងព្រឹត្តិបត្រ Circulation បានបង្ហាញថា បណ្តាមនុស្សធំពេញវ័យដែលកាលពីវ័យកុមារភាពធ្លាប់ទទួលបានភាពរីករាយ និងសុខភាពផ្លូវកាយផ្លូវចិត្តពេញបរិបូរ
ការសិក្សាមួយធ្វើឡើងដោយអ្នកស្រាវជ្រាវជនជាតិហ្វាំងឡង់និងចុះផ្សាយក្នុងព្រឹត្តិបត្រ Circulation បានបង្ហាញថា បណ្តាមនុស្សធំពេញវ័យដែលកាលពីវ័យកុមារភាពធ្លាប់ទទួលបានភាពរីករាយ និងសុខភាពផ្លូវកាយផ្លូវចិត្តពេញបរិបូរ សុខភាពបេះដូងរបស់ពួកគេគឺល្អប្រសើរបំផុតធៀបទៅនឹងបុគ្គលដែលជួបតែក្តីនិរាសព្រាត់ប្រាសកាលពីវ័យកុមារ ។
នៅក្នុងការពិសោធតាមដានលើមនុស្សជាង១ពាន់នាក់ចាប់ពីកុមារភាពដល់វ័យពី៣០ទៅ៤៥ឆ្នាំ ក្រុមអ្នកស្រាវជ្រាវបានពិនិត្យមើលថាតើពួកគេទាំងនោះមានគុណសម្បត្តិផ្លូវចិត្តអំឡុងកុមារភាព តួយ៉ាងដូចជា រស់នៅក្នុងគ្រួសារមួយដែលមានទម្លាប់រស់នៅល្អ មានការអប់រំប្រៀនប្រដៅល្អ និងការផ្គត់ផ្គង់សេដ្ឋកិច្ចគ្រប់គ្រាន់ដែរឬយ៉ាងណា ។
ជាលទ្ធផល ពួកអ្នកស្រាវជ្រាវបានរកឃើញថា បុគ្គលពេញវ័យដែលទទួលបានគុណសម្បត្តិផ្លូវចិត្តច្រើនបំផុតកាលពីវ័យកុមារ ១៤ភាគរយមានទម្ងន់ខ្លួនធម្មតា ១២ភាគរយមិនជក់បារី និង១១ភាគរយមានកម្រិតស្ករក្នុងឈាមធម្មតា ។ កត្តាទាំងអស់នេះនឹងញ៉ាំងសុខភាពបេះដូងបានល្អប្រសើរ ។
Laura Pulkki-Raback អ្នកដឹកនាំការស្រាវជ្រាវមកពីសាកលវិទ្យាល័យ University of Helsinki ប្រទេសហ្វាំងឡង់និយាយថា ជម្រើសរបស់ឪពុកម្តាយគឺបានជះឥទ្ធិពលរយៈពេលវែងលើសុខភាពនាពេលអនាគតកូនរបស់ពួកគេ ។ មួយវិញទៀត ការធ្វើឱ្យល្អប្រសើរក្នុងផ្នែកណាមួយជាពិសេសគឺអាចផ្តល់អត្ថប្រយោជន៍យ៉ាងធំធេង ។
អ្នកស្រាវជ្រាវរូបនេះបានបន្ថែមថា ភស្តុតាងវិទ្យាសាស្ត្រលើកនេះបានបន្ថែមទម្ងន់ទៅលើការពិតដែលថា ការវិនិយោគលើសុខុមាលភាពរបស់កូននិងគ្រួសារគឺជាការចំណាយដ៏មានប្រសិទ្ធភាពរយៈពេលវែង ។ ពីព្រោះ វាបានជួយកាត់បន្ថយ ការចំណាយលើការថែទាំសុខភាពនៅក្នុងជីវិតពេលអនាគត ៕
ចែករំលែកព័តមាននេះ